Pro-Liga mavsumining dastlabki yarmi yakuniga ko‘ra, «Dinamo» jamoasi ko‘zlangan o‘rinni band eta olmagan bo‘lsada, klub yil yakuniga ko‘ra Superligaga chiqish uchun hozirdanoq har taraflama jiddiy tayyorgarliklar ko‘rmoqda.
“YANGILANGAN” STADION
Qayd etib o‘tish joiz, joriy mavsum oldidan Superliga klublar sonini qisqartirishi natijasida O‘FA va PFL klublarni jiddiy nazoratdan o‘tkazishdi. Natijada aksariyat klublar singari “Dinamo” Pro-Ligaga tushgandi. O‘shanda klub oldiga bir qator talablar qo‘yilib, ulardan asosiysi stadion yoritishi tizimini yangilab, arenani barcha talablarga mos holatga keltirish edi. So‘nggi marta 2011 yilda rekonstruksiya qilingan Samarqand viloyatining bosh stadioni “Dinamo” oradan 7 yil o‘tib, Samarqand viloyati hokimi Turobjon Jo‘rayev qaroriga ko‘ra, yangicha qiyofa kasb etdi. Stadionga yangi zamonaviy raqamli katta ekran o‘rnatilib, o‘yingoh o‘rindiqlari yangilandi, stadion ichida ham rekonstruksiya ishlari olib borildi. Eng asosiysi, stadionga qariyb 1200 lyuksga teng qo‘shimcha yoritgichlar o‘rnatildi. Qisqa qilib aytganda, “Dinamo” stadioni shay holatga keltirildi.
“DINAMO” O‘ZGARISHLAR ARAFASIDA
Pro-Liga ikkinchi davrasidan keyin jamoa bosh murabbiyi va klub bosh menejeri Ilhom Sharipov taklifi bilan «Dinamo» jamoasi safida bir qator o‘zgarishlar kuzatildi.
PFL 18 iyundan yangi futbolchilarni ro‘yxatdan o‘tkazishga ruxsat bergach, “Dinamo” tarkibiga 5 nafar yangi futbolchi - Akmal Xolmurodov (“So‘g‘diyona”), Abbosbek Jumaqulov, Suhrob Izzatov (“Bunyodkor”), Pavel Purishkin (“Metallurg”) va Dilmurod Karimovlar (“So‘g‘diyona”) kelib qo‘shildi va ular bilan 2019 yil yakuniga qadar shartnoma imzolandi.
Davralar oralig‘ida esa “Dinamo” yana uch futbolchi – Avaz Agaliyev (“Neftchi”), Sherzod Jalilov (“So‘g‘diyona”) va Otabek Narzullayev (“Sho‘rtan”) singari futbolchilar bilan 1,5 yillik – 2019 yil yakunigacha shartnoma imzoladi.
Shu bilan birga yana bir qator futbolchilar bilan o‘zaro shartnomalar bekor qilindi. Jumladan, Muydin Mamazulumov, Zohir Qo‘ziboyev, Akmal Bozorov, Aziz Suyunov, Rustam Toshturdiyev singari futbolchilar bilan rasman do‘stona xayrlashildi. Yosh himoyachi Humoyun Tolibov esa “Sherdor” klubiga ijaraga berildi. Amirjon Safarov esa Qarshining “Nasaf” klubi e’tiboriga tushgach, “Dinamo” uni ijaraga berdi.
“SUPERLIGA UCHUN OXIRIGACHA KURASHAMIZ”
Mavsumning dastlabki qismi omadsizlik bilan boshlangach, klub rahbariyati bosh murabbiy lavozimiga jamoaning sobiq futbolchisi Davron Fayziyevni taklif etdi. Ushbu mutaxassis davralar oralig‘ida jamoa tarkibini kuchaytirib, Superliga yo‘llanmasi uchun kurash olib bora oladigan raqobatdosh jamoani tashkil etishni maqsad qilgan.
“Bir qator jamoalar singari ikkinchi davradan keyin jamoa safida jiddiy o‘zgarishlarga qo‘l urdik. Jamoani tark etgan jami 10 ga yaqin futbolchilar o‘rniga o‘yinimizni kuchaytiradigan yangi o‘yinchilarni jalb etayapmiz. Xususan, Akmal Xolmurodov, Pavel Purishkin, Dilmurod Karimov, Avaz Agaliyev, Otabek Narzullayev, Sherzod Jalilov singari tajribali futbolchilar, Abbosbek Jumaqulov, Suhrob Izzatov kabi iqtidorli yoshlar o‘yinimizni kuchaytira olishiga ishonaman.
Yangilangan tarkibimiz bilan mavsumning ikkinchi qismiga jiddiy tayyorgarlik ko‘ramiz. Xususan, 9-20 iyul kunlari Chimyon tog‘li hududida yig‘in tashkil etib, jamoaning jismoniy holatini yaxshilaymiz. Keyin esa avgustga qadar Toshkentda 3-4 ta nazorat o‘yinlari o‘tkazib, uchinchi davraga shay holatda bo‘lishimiz lozim. Har qanday holatda ham, “Dinamo”dan hujumkor, jangovar o‘yin kutib, Superliga yo‘llanmasi uchun oxirigacha kurashishni maqsad qilganmiz” – deydi “Dinamo” klubi bosh murabbiyi Davron Fayziyev.
FUTBOLCHILAR BO‘YICHA KLUB SIYOSATI
Albatta, jamoa tarkibida katta o‘zgarishlar bo‘layotgani, xususan, «futbolchilarning kelib-ketishi jamoaning moliyaviy holatiga salbiy ta’sir etmaydimi?» qabilidagi savollar yangrashi tabiiy.
Qayd etish joiz, bu borada “Dinamo” klubi jiddiy ish olib bormoqda. Xususan, jamoa futbolchilari bilan tuzilgan shartnomalarda futbolchilarning belgilangan shartnoma muddati davomida “Dinamo” jamoasining 70 % o‘yinlarida maydonga tushishlari shart. Aks holda klub hisob-kitob qilinayotganda o‘yinchilarning o‘yin statistikasiga qarab, moliyaviy jarimaga tortish huquqiga ega. Xususan, natijalar salbiy ko‘rinish olgani bois, shartnomaga muvofiq, mavsumning dastlabki yarmida jamoada yetarlicha o‘yin amaliyotiga ega bo‘lmagan va yakunda klubni tark etgan bir qator futbolchilar bilan hisob-kitob qilinayotganda inobatga olindi. Qolaversa, jamoa a’zolari bilan ham qat’iy tartibda ishlar olib borildi.
O‘FA VA PFL E’TIROFI
O‘zbekiston Professional Ligasi davralar oralig‘ida Superliga va Pro-Liga klublari uchun transfer oynasi ochilganligini e’lon qilar ekan, “Dinamo” jamoasini alohida e’tirof etdi. “18 iyun kuni yozgi transfer oynasi rasman ochilgan. Bu vaqtga kelib bir qator klublarda katta o‘zgarishlar bo‘ladi. Ya’ni, ayrim futbolchi va murabbiylarga javob berib yuboriladi. O‘z navbatida PFL ham klub bilan xayrlashayotgan futbolchilar haqidagi hisobotni klublardan talab qilib oladi. Ya’ni, qarzdorligi bor klubga transfer oynasidagi o‘zgarishlar uchun ruxsat etilmaydi. Shundan kelib chiqib, yangi futbolchilar masalasida PFLga kelishdan oldin, avval eskilar bilan hisob-kitob qilingani borasidagi hujjatlar taqdim etilishi shart. Hozirga qadar birgina “Dinamo” klubida bu borada qarzdorlik holati yo‘qligi bois, yangi futbolchilarni ro‘yxatdan o‘tkazishga ruxsat berildi” – deya yozadi PFL matbuot xizmati.
Darhaqiqat, bugunga kelib Samarqand viloyati hokimi, viloyat futbol federasiyasi prezidenti Turobjon Jo‘rayevning say’-harakati evaziga viloyatning bosh jamoasi “Dinamo”ga har tomonlama e’tibor qaratilmoqda. Qolaversa, viloyat futboli rivoji uchun katta ishlar amalga oshirilmoqda. Samarqand viloyat futbol federasiyasining viloyat bo‘ylab o‘tkazayotgan qator turnirlari, rejalashtirilgan nufuzli turnirlar bunga dalolat. Shuningdek, oradan 3-4 yil o‘tib, nihoyat Samarqanddan faqat “Dinamo” emas, shaharning yana bir klubi “Sherdor” jamoasi ham Pro-Ligada ishtirok etish huquqini qo‘lga kiritdi va hozirda samarqandlik mahalliy yoshlar bilan yaxshi natijalarga erishmoqda.
Shu bilan birga muhtaram prezidentimiz imzolagan qarorga ko‘ra, tez orada ko‘hna va hamisha navqiron Samarqandda ham ilk futbol akademiyasi tashkil qilinishi viloyat futboli rivoji sari qo‘yilgan eng muhim poydevor va dadil qadam bo‘lishiga ishonamiz.
Qo‘qon-1912
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
