Xabaringiz bor, O‘zbekistonning amaldagi chempioni “Lokomotiv” yangi mavsumga tayyorgarlikni Turkiyada olib boryapti.
“Temiryo‘lchilar” Antaliya yig‘ini doirasida hozircha ikkita o‘rtoqlik uchrashuvi o‘tkazishdi. Jamoa ushbu mavsum hisobidan ilk rasmiy o‘yinini 23 fevral kuni O‘zbekiston Superkubogi uchun kechadigan bellashuvda AGMKga qarshi o‘tkazadi.
Bu o‘yinga, qolaversa butun mavsumga tayyorgarlik qanday ketayotganini bilish maqsadida jamoa yetakchilaridan biri Sardor Mirzayevga yuzlandik.
– Sardor, yangi mavsumga tayyorgarlik qanday ketyapti?
– Tayyorgarlik yaxshi bo‘lyapti. O‘tgan mavsumdan keyin jamoamizda bir qator o‘zgarishlar ro‘y berdi. Ba’zi futbolchilar ketib, o‘rniga yangilar kelib qo‘shildi. Endi bu – futbol, o‘zgarishlar har doim bo‘lgan. Yangi yildan so‘ng dastlabki yig‘inni Dubayda tashkil qilgandik. Bunda ba’zi futbolchilar yo‘q edi, hozir esa hamma jamoa safida birgalikda mashg‘ulot o‘tkazyapti.
– Turkiya yig‘inida asosiy e’tibor nimalarga qaratilyapti?
– Dubaydagi yig‘inda ko‘proq jismoniy tayyorgarlik ustida ishlagandik, bu yerda esa asosan taktika bo‘yicha mashg‘ulotlar olib boryapmiz. O‘rtoqlik o‘yinlari orqali bir-birimizni tushunishga harakat qilyapmiz.
– “Lokomotiv” hozircha Antaliyada ikkita o‘rtoqlik uchrashuvi o‘tkazdi. Shu o‘yinlar haqida fikringiz?
– Bu yerda avvaliga Moskvaning “Dinamo” klubiga qarshi, undan keyin Qozog‘istonning “Astana” klubi bilan kuch sinashib ko‘rdik. Har ikkala bahs 1:1 hisobida yakun topdi. Yaxshi bilasiz, o‘rtoqlik o‘yinlarida natija unchalik muhim emas. Asosiy e’tibor jamoa o‘yini sifatini oshirishga qaratilgan. Har ikkala bahsda taktik futbol ko‘rsatishga harakat qildik.
– Jamoa mavsumga qanchalik tayyor deb o‘ylaysiz?
– Buni rasmiy bellashuvlar boshlangach bilib olamiz. Joriy yil hisobidan ilk rasmiy uchrashuvni O‘zbekiston Superkubogi doirasida 23 fevral kuni AGMKga qarshi o‘tkazamiz. Shu o‘yinni ham o‘z foydamizga hal etishga harakat qilamiz. Undan keyin oldinda Osiyo chempionlar ligasi va ichki bellashuvlar kutib turibdi.
– Yangi kelib qo‘shilgan futbolchilar haqida qanday fikrdasiz?
– Shuni aytishim mumkin, jamoadagi hamma bor kuchi bilan harakat qilyapti. Muhimi, yangi futbolchilar tezda “Lokomotiv”ga moslashib ketishdi. Tarkibimizda yangilardan Aziz Haydarov, Arslonmurod Omonov, Yovan Jokich, Filip Rayevas, Javohir Ilyosov, Jamshid Iskaderov, Davron Hoshimov kabi futbolchilar mashg‘ulot olib boryapti. Maqsadimiz qisqa fursat ichida yakdil jamoaga aylanish.
“Lokomotiv” PFK matbuot xizmati.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
