Ayni paytda uning joyi Pro “A”ga ham “tortishi” qiyin, ammo boshlangan ishlar ko‘lami ijobiy bahoga ham loyiq ko‘rilmoqda.
Keyingi paytlarda Termizning “Surxon” jamoasi bilan bog‘liq shov-shuvlar ko‘paysa ko‘payyaptiki, kamayayotgani yo‘q. Tajribali mutaxassis Ilhom Mo‘minjonovning bosh murabbiy bo‘lishi, keyin ma’lum muddatga chetlashtirilishi, jamoa Anvar Soliyev qo‘lga o‘tishi, tarkibning tobora kuchayib borishi, jamoa kun yoki haftalab emas, balki oylab poytaxtda o‘quv-mashg‘ulot yig‘ini o‘tkazishi, hammasidan ham jamoaning Super ligaga da’vogarlik qilishi shov-shuvlarning bosh sababchisi bo‘lib keldi.
Rostdan ham Surxondaryo vakili hisoblangan jamoa yanvar oyidan buyon mashg‘ulotlarini poytaxtda o‘tkazyapti. Tarkibga kelib qo‘shilgan futbolchilarga e’tibor bering - Asilbek Omonov, Sherzod Karimov, A’zam Aliyev, Azamat Allaniyozov, Dilshod Jabborov, Zabixillo O‘rinboyev, Vladimir Bubanya, Darko Stanoyevich... Kelgan va kelayotganlarning o‘zi bir jamoa. Bugun “Surxon” “lagerida” yana bir taniqli inson jamoaga tanishtirildi. Ilhom Mo‘minjonov o‘rniga vaqtinchalik bosh murabbiy vazifasini Anvar Soliyev bajarib turgandi, bugun klub mutasaddilari uni sport direktori lavozimiga o‘tkazishdi. Jamoa bosh murabbiyi deb esa asli kelib chiqishi surxondaryolik bo‘lgan, 2016-2018 mavsumlarda Toshkentning “Lokomotiv” jamoasida bosh murabbiy va yordamchi murabbiy lavozimlarida faoliyat yuritgan, “PRO” murabbiylik lisenziyasiga ega Andrey Miklyayev tanishtirildi. Tarkib-ku kuchaytirilyapti, mashg‘ulotlar, o‘rtoqlik uchrashuvlari Superliga darajasida amalga oshirilyapti. Lekin “Surxon”ning manzili – Termiz shahridagi sharoitlar Super liga talabiga javob bera oladimi?
Yaqinda O‘zbekiston Professional futbol ligasining maxsus guruhi vaziyatni o‘rganish maqsadida Termizga tashrif buyurdi. Ma’lum bo‘lishicha, barcha e’tibor Toshkentga – tarkibni kuchaytirishga qratilgan-u, bu yerda – Termizda deyarli ish qilinmagan. Sharoit Superligaga emas, hatto Pro “A”ga ham javob bera oladigan darajada bo‘lmagan.
To‘g‘ri, klub O‘zPFL tomonidan Super va Pro “A” liga klublari zimmasiga yuklayotgan talablar sifatida birinchilardan bo‘lib futbol akademiyasiga ega bo‘ldi – viloyat futbol akademiyasi bilan hamkorlik shartnomasi tuzdi, yangi ta’mirdan chiqqan stadion va uning chimi yuqori toifadagi musobaqa o‘tkazish talabiga javob bera oladi. Ammo shundan boshqa talablarga e’tibor qaratilmagan.
Aytaylik, muhim talablardan biri stadionning yoritgich masalasi hal etilmagan, qad rostlab turgan eski yoritgichlarning quvvati ancha past, stadion o‘rindiqlari o‘tgan yili zamonaviy o‘rindiqlar bilan almashtirilishi boshlangan-u, chala qolib ketgan. Stadionni ta’mirdan chiqqan dedik, biroq jihozlanmagan, futbolchilarning kiyim almashtirish, matbuot anjumani o‘tkazish xonalari, umuman, hali jihozlar xarid qilinmagan. Yana boshqa kamchiliklar ham talaygina.
Bu kechaning manzarasi edi, bugun esa Termizda, aynan “Surxon” sport majmuasida butunlay boshqacha manzara. O‘zPFL vakillarining so‘roq-so‘rog‘i ta’sir qildimi yoki viloyat hokimiyati-yu klub mutasaddilarining ish boshlashi bo‘yicha rejasi shu muddatga belgilanganmidi, xullas bugun Termizda katta ko‘lamdagi ishlar boshlanib ketdi.
Avvaliga klubning to‘rt-besh kishilik vakillari, stadion direktoridan iborat katta guruh qurilish tizimi bo‘yicha birxillikka ega bo‘lgan AGMK stadioniga tashrif buyurdi va u yerdagi sharoit bilan yaqindan tanishdi. Ko‘p o‘tmay, barcha e’tibor “Surxon” sport majmuasini ham AGMK darajasiga keltirish harakatlariga qaratildi. Shu tariqa ayni paytda Termizda chinakam tayyorgarlik ishlari boshlab yuborilgan.
Ish shu tarzda davom etadigan bo‘lsa, kim biladi, “Surxon”ning Superligaga da’vogarlik urinishlari haqiqatga aylanadimi? Klub Superligadan joy oladimi-yo‘qmi, ruxsat berilsa kimning o‘rnini to‘ldiradi yoki Pro “A”da faoliyat yuritadimi, endi bu boshqa masala...
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
