Doston Tursunovning «J Liga»ga o‘tishi ko‘pchilik muxlislar uchun kutilmagan hol bo‘ldi desak, adashmagan bo‘lamiz. Osiyo kubogidagi terma jamoamizda birorta uchrashuvda maydonga tushmagani esa ikki xissa qiziqish uyg‘otdi. Bugun shu va boshqa qiziq ma’lumotlar to‘g‘risida.
Savollarni boshidan boshlaymiz.
Sizning transfer protsesingiz haqida ma’lumotlar deyarli berilmadi. Birdaniga bo‘lib ketdi, goyo. Yaponiya klubi e’tiboriga qanday tushdingiz?
-Avvaliga, klubim murabbiyi mening o‘yinlarimni Xitoydagi Osiyo chempionatida ko‘rgan ekan. O‘sha turnirdan so‘ng, men bilan shaxsan o‘zi bog‘landi va uning rejalarida borligimni aytdi. Transferim esa Osiyo kubogidan avval hal bo‘ldi. Tibbiy ko‘rikdan o‘tish uchun BAA dagi turnirdan so‘ng uchib ketdim.Mana klubga kelganimga 20 kundan oshgan bo‘lsa, juda ko‘p narsalarni o‘rgandim va o‘rganishda davom etyapman.
Klubdagi sharoitlar qanday?
-Tan olish kerak, Yaponiya bejiz bu qadar futbolda ilgarilab ketmagan ekan. Jamoa menga alohida uy, mashina, tarjimon berdi.
Yaponiya klublari bilan bizning klublar o‘rtasida qanday farqlar bor ekan?
-To‘g‘risi, juda ham katta. Bizda uchrashuvlarda stadionlar to‘lmasa, bu yerda hatto mashg‘ulotlarni ko‘rish uchun ham stadioning yarmi to‘lar ekan. Bunaqangi muxlislar ko‘z o‘ngida shug‘ullangan sari shug‘ullangin keladi.
Yaponiya futbolidagi legionerlarga munosabat qanday?
Bu yerga kelgan kunim menga mahalliy futbolchilardan kerak bo‘lsa, 10 barobar yaxshiroq o‘ynashim shart ekanligini aytishdi.
Til borasida muammolarga duch kelmayapsizmi?
-(Kuladi) shundan qiynalyapman. Klub menga tarjimon ajratgan, lekin u bilan doimo birga bo‘lishning imkoni yo‘q. Shu sabab qo‘ldan kelgancha til o‘rganishga harakat qilyapman
Osiyo kubogidagi terma jamoamizning o‘yinlaridan sizning ko‘nglingiz to‘ldimi?
-(Kuladi) Bilmadim. Bu haqida muxlislarimiz fikr bildirishgani ma’qul.
Kuper sizni birorta uchrashuvda maydonga tushirmadi. Buning sababi nima deb o‘ylaysiz?
Kuper tajribali futbolchilarni maydonga tushirdi. Krimets, Islom aka, Anzur akalar xalqaro tajribaga ega futbolchilar.
Demak, Kuper sizga ishonmadi?
-Yo‘q! Ishonmaganida o‘zi bilan Osiyo kubogiga olib ketmas edi.
Avstraliya bilan o‘yinda Krimetsning o‘rniga siz tushishingizni ko‘pchilik kutgan edi?!
-To‘g‘risi, o‘zim ham kutgan edim. Kuper meni maydonga tushirmagach, biroz hafa bo‘lib qoldim. O‘zimni g‘alati his etdim. Shunda u meni oldiga chaqirib: Sen bu himoyachilarni yaxshilab kuzat, xato va yutuqlarini o‘rgan. Mening jamoamning asosiy himoyachisi ertaga yo indinga baribir sen bo‘lasan, deya ko‘nglimni ko‘tarib qo‘ydi. To‘g‘ri, Osiyo kubogida u menga ishonmadi, lekin oldimizda turnirlar ko‘p. Men bor imkoniyatlarimni ko‘rsatib uning ishonchiga erishaman deb o‘ylayman.
Terma jamoaning asosiy himoyachisi bo‘lish uchun sizga hozircha nima yetishmayapti?
-(Kuladi) Siz to‘g‘ri javob bermaguncha qo‘ymas ekansiz. Akalarimdan farqim legioner emasligimda edi. Mana shukur legioner ham bo‘ldim. Endi bu yerda bor kuchim bilan ishlayapman. Mashg‘ulotlarda ikki xissa harakat qilyapman. Umid qilaman, yangi klubda orttirgan xalqaro tajriba orqali terma jamoaning asosiy himoyachisiga aylanaman.
Har bir insonning o‘z oldiga qo‘ygan oliy maqsadi bo‘ladi. U shunday maqsadki, unga erishgach, ko‘ngil biroz xotirjam tortadi, shuncha yillik mehnatining mevasini his qilgach, o‘z ishidan mamnunlik his qiladi. Sizning oliy maqsadingiz nima?
-CHiroyli savol. Menimcha JCH da O‘zbekiston bayrog‘I ostida ishtirok etish. O‘ylashimcha bu nafaqat mening, balki muxlislarimizning ham orzulari bo‘lsa, ajab emas.
Bir necha kun avval Saytimiz O‘rta Osiyo kubogiga o‘xshash turning tashabbusi bilan chiqqan edi. Nima deb o‘ylaysiz shunday turnirlarning foydasi bormi?
-Albatta, o‘yin amaliyoti futbolchilarimiz uchun har doim kerak. Ayniqsa, xalqaro musobaqalarda o‘ynamagan futbolchilarni sinab olish uchun qulay imkoniyat. Menimcha, bu faqat foyda bo‘ladi.
Siz qaysi futbolchining o‘yinlarini ko‘rganingizda zavqlanib ketasiz? Kumiringiz kim?
-YOshligimdan Serxio Ramos. Uning o‘yinlarini ko‘rganimda mazza qilaman.
Savollarga to‘g‘ri va haqqoniy javob berganingiz uchun rahmat. Ishlaringizga rivoj tilab qolamiz.
-Sizlarga rahmat. O‘zingizga ham omad tilayman.
Yahyoxo‘ja Ulug‘xo‘jayev suhbatlashdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
