Bu jamoa o‘yinidan zavqlaning, toki, futbolchilari tarqalib ketmagunlaricha. Ha, Gollandiya futboli faxri sanalgan «Ayaks» joriy mavsum barchaga shonli o‘tmishini bir eslatib qo‘yish harakatida.
Amsterdamliklar CHL «pley-off» raundlarida «Real» va «Yuventus», qolaversa, Krishtianu Ronalduni birin-ketin chiroyli tarzda kurashdan chetga chiqarishgach, jamoa tarkibidagi yosh iqtidorlarga nisbatan qiziqish yanada ortgani tayin. Aytish joiz, «Ayaks» shunqorlari Eredivizionda allaqachon 100ta gol marrasidan o‘tishdi, qolaversa, yevromaydonda ham mahsuldorlikni o‘rniga qo‘yishmoqda. Ayniqsa, Madrid va Turinda urilgan 6ta gol Erik ten Xag shogirdlari obro‘siyu, transfer bahosini ko‘tarib yuborsa, ajabmas. Soccer.ru sayti ijodkorlari hozirdan yakdil xulosa chiqarib bo‘lishdi: «Ayaks» bag‘rida porlayotgan yigitlar klubga hali gollaridan ko‘ra, ancha ko‘p millionlar keltirishadi». Bemalol taxmin qilish mumkin, CHL-2018|2019 bosh kashfiyoti hozirgi tarkibi bilan oxirgi oylarni boshdan kechirmoqda. Yaqqol sezilib turibdi, mavsum kashfiyotlari «Ayaks» bilan xayrlashish oldidan Gollandiyada chempionlikni tantana qilish barobarida CHL bosh sovrinini qo‘lga kiritmoqchilar. Ayni payt jamoa safidagi deyarli barcha futbolchilar grandlar skautlarining o‘tkir nigohlari ostida to‘p surishmoqda, Frenki de Yong esa «Barselona» bilan shartnoma tuzishga ulgurdi. Kataloniyaliklar jamoa safiga yozda qo‘shiladigan iqtidor transferi uchun gollandlarga 75 mln. yevro to‘lashadi. Takror bo‘lsada, aytamiz, u «Ayaks» bilan xayrlashadigan yagona o‘yinchi emas...
Matteys de LIGT
(markaziy himoyachi) - 19 yosh
Masala bahosi: 70 mln. yevro
Da’vogar klublar: «Barselona», «MYU», «Liverpul», «Yuventus», «PSJ»
Ha, «Yuventus» orzusini shunchaki, «ko‘mgan» yigitcha uchun yozda haqiqiy auksion bo‘ladi, chog‘i.
Hakim ZIYEH
(vinger) - 26 yosh
Masala bahosi: 50 mln. yevro
Da’vogar klublar: «Bavariya», «Inter», «Roma», «Atletiko», «Sevilya»
Ekspertlarning baholashlaricha, marokashlik futbolchining eng yorqin mavsumlari hali oldinda. Demakki, yozgacha xaridorlar safi yanada kengayishi va summa ham ancha oshishi mumkin.
Nikolas TALYAFIKO
(chap qanot himoyachisi) - 26 yosh
Masala bahosi: 25 mln. yevro
Da’vogar klublar: «Tottenxem», «Arsenal», «Real», «Atletiko»
Aslida Talyafiko va «Ayaks» o‘rtasidagi shartnoma 2022 yilgacha mo‘ljallangan, ammo argentinalik futbolchi yozda klubini o‘zgartirmoqchi. Aytishlaricha, u hamyurti Diyego Simeone jamoasi safiga qo‘shilmoqchi.
David NERES
(vinger) - 22 yosh
Masala bahosi: 50 mln. yevro
Da’vogar klublar: «Milan», «Borussiya» D.
Braziliyalik tezkor va mitti vinger hamyurti, «Milan» sport direktori Leonardoga «rossonerlar» libosini kiyishi xususida va’da bergan emish. Ammo oxirgi voqealardan keyin Neres xizmatiga qiziqish darajasi oshdi va u endi barqarorroq jamoada o‘ynashni istab qolar, balki...
Andre ONANA
(darvozabon) - 23 yosh
Masala bahosi: 30 mln. yevro
Da’vogar klublar: «Barselona», «Inter», «Roma»
«Barselona» xaridormi? Nahotki? Axir Kataloniya klubida Mark-Andre ter Shtegendek kiper bor-ku. Gap shundaki, 23 yoshli kamerunlik aynan «Barselona» tarbiyalanuvchisi hisoblanadi. U jonajon klubi zaxira o‘rindig‘ida o‘tirishga ham tayyor, to‘g‘ri, faqat vaqtincha...
Donni van de BEEK
(markaziy yarim himoyachi) - 21 yosh
Masala bahosi: 40 mln. yevro
Da’vogar klublar: «Roma», «PSJ», «MYU»
Skautlar ko‘zlari «o‘ynab» ketyapti! Donni atigi 21 yoshda bo‘lsada, raqib o‘yinini buzishda ham, yaratuvchanlikda ham benazir harakatlanmoqda. Taxminlarga ko‘ra, uning o‘zi Tomas Tuxel jamoasi safida to‘p surishga qarshi emas ekan.
Kasper DOLBERG
(hujumchi) - 21 yosh
Masala bahosi: 30 mln. yevro
Da’vogar klublar: «A» seriya va APL vakillari
Katta ehtimolki, daniyalik mallasoch Gollandiya chempionatida yana bir yil qoladi. Chunonchi, u hujumdagi yuqori raqobat tufayli har doim ham boshlang‘ich tarkibga kirmayapti. Umuman olganda, Dolberg 2 mavsum oldin kuchliroq taasurot uyg‘otgandi. Qolaversa, Kasper va «Ayaks»ni 2022 yilgacha mo‘ljallangan shartnoma bog‘lab turibdi.
Dushan TADICH
(vinger, hujumchi) - 30 yosh
Masala bahosi: 30 mln. yevro
Da’vogar klublar: «Bavariya», «Chelsi»
Yoshlar orasidagi «qariya». Eh, serb hujumchisi hozirgidan 4-5 yosh kichik bo‘lganidami, uning uchun Amsterdamdan Myunxen, Manchesterdan Madridgacha navbatda turishardi. Xabarlarga qaraganda, myunxenliklar yosh faktoriga e’tibor qaratmay, uni jamoa faxriylari - Aryen Robben va Frank Riberi o‘rniga mo‘ljallashmoqda. Har holda, Dushan universal futbolchi hisoblanadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
