«Shaxtyor» o‘smirlari yetakchisi - Aleksandr Zinchenko o‘z vaqtida UYEFA o‘smirlar ligasi turnirida finalgacha yetib borgan, tez orada asosiy jamoa safida yorqin o‘yinlar ko‘rsatishiga jamoadoshlari va muxlislarni ishontirib ulgurgandi. Lekin taqdir unga hech kimning xayoliga kelmagan ajib yo‘lni ravo ko‘rdi.
Xorijdan omad izlab...
Iqtidorli yarim himoyachi «konchilar»ning yangi shartnoma xususidagi taklifini rad etib, Rossiyaning kamtarin «Ufa» klubiga yo‘l oldi. Shu bois jamoatchilik o‘rtasida Zinchenkoni «Shaxtyor»dagi jiddiy raqobat cho‘chitib yubordi, degan taxmin tarqalib ketdi. Chunki Mircha Lucheskuning bu pozisiyaga xorijlik shogirdlarini qo‘yishi an’ana tusini olgandi. Ammo Zina (jamoadoshlari va muxlislari o‘rtasidagi nomi) atigi 1,5 yildan keyin jahonning eng sara grandlaridan biri - «Manchester Siti» safida paydo bo‘ldi.
Mankunianlar ukrainalik legioner tashrifini kutishmagandi. Chunki jamoaning oldingi chiziqlarida yuksak saviya sohiblari yetarli edi. Shu bois Sasha PSVga ijaraga yuborildi. «Surgun»dagi malaka oshirish ham naf bermadi - Zinchenkoning saviyasi «Siti» talabini qondira oladigan darajada emasdi. Oqibatda o‘yin amaliyotining yetarli emasligi tufayli o‘tgan mavsumda Aleksandrning chempionlik oltin medallarini olishi xavf ostida qolgandi.
Tasodif qo‘l keldi
So‘l qanot himoyachisi Benjamen Mendi jarohat tufayli safdan chiqqach, Gvardiola uning o‘rniga tayanch yarim himoyachisi Fabian Delf va yarim himoyachi Zinchenkolarni maydonga tushira boshladi. Jamoa uslubidagi bu yangilikni muxlislar katta qiyinchilik bilan qabul qilishdi. Lekin Zinchenko uchun ayni muddao bo‘ldi. Yuzaga kelgan imkoniyatga yelimdek yopishib olgan holda u o‘zi uchun begona bo‘lgan taqdir sovg‘asi sir-asrorlarini o‘rganishga kirishdi. To‘g‘ri, yangicha shart-sharoitlarga moslashib olguniga qadar Sashaning o‘yin saviyasi pasayib ketdi, bir qator vaziyatlarda u yakkakurashlarda raqiblariga imkoniyatni boy berdi. Shunga qaramasdan, Zinchenko tirishqoqlik bilan ter to‘kishni davom ettirdi.
Yozgi ta’til davrida ukrainalik futbolchi xizmatiga «Vulverxempton» va «Betis» klublari ehtiyoj bildirishdi. Ispaniyaliklar lateral pozisiyasini va’da qilishgan paytda «Siti» unga o‘yin amaliyoti ajrata olmasligini ma’lum qilgandi. Biroq futbolchi Manchesterni tark etmaslikka qaror qildi. Qiziq, ehtiyoj sezilgan vaqtda u granddan qochib ketgandi, kerak emassan, deyishganida ketishni istamadi.
Qishki parvoz
Xosep Gvardiola chindan ham ukrainalik legionerga umuman ishonch bildirmay qo‘ygandi. Biroq Zinchenkoning baxtiga, so‘l qanotda tez-tez yamoqchi vazifasini ado etadigan Lyaport ham Mendi va Delf safiga qo‘shildi. Aleksandr esa fevralga qadar APL doirasida atigi uch marta maydonga tushdi, 6 marta zaxira tarkibiga kiritildi. To‘g‘ri, murabbiy unga Liga kubogining barcha uchrashuvlari va YECHLning guruh bosqichida g‘oliblik masalasi ijobiy hal etilganidan keyin tajriba to‘plash imkonini bergandi. Fevraldagi vaziyat Gvardiolani yana Zinchenkodan foydalanishga majbur etdi.
Buni qarangki, fevralda Zina o‘zining yetuk o‘yinlari bilan barchani lol qoldirdi. Muxlislar uni oyning eng yaxshi futbolchisi maqomiga munosib ekanligini e’tirof etishdi. APL tomonidan g‘olib deb topilgan Aguero ham bir chetda qolib ketdi.
Xo‘sh, oyning oxirida nima bo‘lganidan xabaringiz bormi? Mendi safga qaytdi. Shundan beri necha marta maydonga tushganini-chi? Bor-yo‘g‘i 3 marta - APL, kubok va YECHL uchrashuvlarida. Shunda ham yengil shikastlangan Zina o‘rniga. Jarohatdan qisqa vaqt ichida forig‘ bo‘lgan Zinchenko «Tottenxem» va «MYU»ga qarshi muhim bahslarda maydonga tushdi.
Aprel oxirida qanday natijalarga guvoh bo‘ldik? O‘zining mehnatsevarligi va tirishqoqligi evaziga Angliyaning eng kuchli jamoasi asosiy tarkibidan mustahkam joy olgan ukrainalik futbolchini ko‘rdik. Vaholanki, uni jamoadan ketishni istamagani uchun ko‘pchilik «Telba Zina» deya rosa kalaka qilishgandi...
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
