Angliyada mavsum-2018|2019ning eng yaxshi futbolchilarini aniqlashdi. Jurnalistlar Rahim Sterlingni e’tirof etgan bo‘lsalar, futbolchilarning o‘zlari Virjil van Deykni tanlashdi. Savol: futbolchilar (PFA - Professional Footballers’ Association) xulosalari kuchliroqmi yoki jurnalistlar (FWA - Football Writers’ Association)niki? Bu savolga javob yo‘q. Zero, Angliyada har ikki tashkilot sovrini bir xil qiymatga ega. Faqat aytish kerakki, futbolchilar o‘rtasidagi so‘rov ancha erta o‘tkaziladi. Qolaversa, bunda ma’lum darajada shaxsiy munosabatlar ta’siri ham bo‘ladi, albatta. Deylik, qaysidir futbolchi umumiy taassurotlariga tayanishi yoki shunchaki, o‘z do‘stiga ovoz berishi mumkin. Misol uchun, jurnalistlar talqini bo‘yicha APLning eng yaxshi futbolchisi maqomini olgan Rahim Sterling FWA so‘rovida «Tottenxem» hujumchisi Garri Keynga ovoz berdi va buni oddiy izohladi: «Nega aynan Keyn? Chunki u har yili juda ko‘p gol urib, jamoasiga katta manfaat keltirmoqda. Ha, ko‘pchilik van Deyk haqida gapirmoqda, bilaman, u yetarlicha ovoz oladi. Lekin men terma jamoadagi sherigimni tanlayman».
PFA laureati Virjil van Deykning o‘zi esa so‘rovda asosiy raqobatchilaridan biriga ovoz berdi. «Ha, Sterlingni e’tirof etdim, - dedi «Liverpul» himoyachisi so‘rov natijalari e’lon qilinganidan keyin. - Bu vijdon amri. O‘ylashimcha, Rahim eng yaxshi bo‘lishga munosib edi. Qisqasi, unga nisbatan adolatsizlik qilishni istamadim. Har holda, Rahim qo-yilmaqom mavsumni o‘tkazdi, o‘yinini sezilarli darajada yaxshiladi, yaqqol o‘sdi».
Van Deykning fikricha, PFA, ya’ni professional futbolchilar e’tirofi har bir o‘yinchi uchun eng katta mukofotdir: «Ushbu sovrinning salmoqli tosh bosishi o‘z-o‘zidan tushunarli. Futbolchi uchun bundan yaxshiroq mukofot bo‘lmasa kerak. Axir har hafta maydonda senga qarshi o‘ynagan raqiblar ovoziga ko‘ra, laureat bo‘lganingni bilish naqadar yoqimli». Darvoqe, «Liverpul» vakili 1974 yildan e’tiboran topshirilayotgan ushbu sovrinni qo‘lga kiritgan atigi 6-himoyachidir. Orqa chiziq vakili bundan oldin oxirgi marta mavsum-2004|2005 yakunida e’tirof etilgandi. O‘shanda futbolchilar «Chelsi»ning sobiq sardori Jon Terrini tanlashgan edi.
Rahim Sterling ham PFA sovrinisiz qolgani yo‘q. «Manchester Siti» vakilini mavsumning eng yaxshi yosh futbolchisi sifatida tan olishdi. So‘rovning ushbu yo‘nalishida 23 yoshdan kichik futbolchilar (chempionat startga chiqqan kun hisobga olinadi)ga ovoz beriladi.
FWA, ya’ni jurnalistlar sovrini - Angliya futbolidagi eng qadimiy mukofot hisoblanadi. Ilk marta mavsum-1947|1948 yakunida topshirilgan sovrin futbolchilar tomonidan hamisha alohida qadrlanadi.
PFA va FWA so‘rovi ko‘pincha bir xil natija taqdim etadi. Har holda, oxirgi 10 yillikni olsak, ikki tashkilotning yakuniy fikri atigi 3-marta bir joydan chiqmadi (2011 yili futbolchilar Garet Beyl, jurnalistlar Skott Parkerni, 2016 yili esa o‘yinchilar Jeymi Vardi, matbuotchilar Riyod Mahrezni e’tirof etishgandi).
Rahim Sterling jurnalistlar so‘rovida kutilmaganda, juda katta farq bilan g‘alaba qozondi. FWAning naq 62 foiz a’zosi aynan «Siti» hujumchisini yoqladi, natijada u eng yaqin ta’qibchisi van Deykdan 100ta ko‘p ovoz jamg‘ardi. Albatta, Rahimning ushbu g‘alabasida APLdagi statistikasi (37-turgacha 17ta gol va 10ta samarali uzatma) katta o‘rin tutadi, qolaversa, uning oxirgi oylarda futbolda irqchilikka qarshi kurash harakati timsoliga aylangani ta’siri ham bor. «Biz van Deyk butun mavsum davomida juda yaxshi o‘ynaganini tan olishimiz kerak. Himoyachilar xizmatini ham e’tirof etamiz, albatta. Biroq o‘ylashimcha, so‘rovimizda maydon tashqarisidagi ishlar ustunlikni Sterling tomon og‘dirdi», - dedi FWA boshlig‘i Kerri Braun. - Ishonamizki, Rahim nafaqat o‘z zamondoshlari, balki o‘tmish va kelajak avlodga ham o‘rnak bo‘ldi».
Uzoq 1969 yildan buyon «Manchester Siti»ning biror vakili jurnalistlar uyushmasining oliy e’tirofiga erishgan emasdi. Demak, Rahim Sterling «shaharliklar» uchun 50 yillik sukutni buzdi.
VAN DEYK futbolchilar talqini bo‘yicha APLning eng yaxshi futbolchisi
20ta «quruq» o‘yin,
3ta gol,
2ta samarali uzatma, 36ta o‘yin
STERLING jurnalistlar talqini bo‘yicha APLning eng yaxshi futbolchisi
17ta gol,
10ta samarali uzatma,
32ta o‘yin
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
