Superliga bahslari ayni avj pallaga kirayotgan paytda O‘zbekiston yoshlar termasi Osiyo chempionati saralash bahslariga tayyorgarlik olib bormoqda.
O‘FA mazkur jamoaning muhim turnirga munosib tayyorgarlik ko‘rishi uchun zarur chora-tadbirlarni amalga oshirmoqda.
Xususan, Otabek G‘ulomxo‘jayev shogirdlari may oyining 21 va 23 sanalarida o‘rtoqlik uchrashuvida maydonga tushishlari rejalashtirilgan.
Ushbu murabbiydan umidimiz katta, «Bunyodkor» akademiyasida yoshlarga saboq berib kelgan mutaxassis uchun bu termada ishlash ortiqcha qiyinchilik tug‘dirmasligi aniq. U bo‘lajak o‘yinlar orqali nomzod futbolchilarni yana bir bor ko‘zdan kechirish barobarida, ikkita teng kuchli tarkib shakllantirishni maqsad qilgan. Yaqinda yuqoridagi masalalar va boshqa mavzular bo‘yicha Otabek G‘ulomxo‘jayev bilan suhbatlashdik.
- O‘zbekiston yoshlar terma jamoasining Osiyo chempionati saralash o‘yinlariga tayyorgarlik jarayoni qanday ketyapti? Kelgusidagi rejalar bilan o‘rtoqlashsangiz.
- Osiyo chempionati saralash o‘yinlariga tayyorgarlik reja asosida ketmoqda. Buning uchun noyabr oyigacha bo‘lgan maxsus dastur ishlab chiqqanmiz, mana shu dastur bo‘yicha har oy davomida yig‘in tashkil qilib, terma jamoaga nomzod futbolchilarni ko‘zdan kechiramiz va ularning ayni damdagi holati bilan yaqindan tanishamiz. Yig‘inlar doirasida o‘rtoqlik va nazorat uchrashuvlarida maydonga tushishni rejalashtirganmiz. Dastlabki yig‘in may oyining 11-18 va 19-24 sanalariga mo‘ljallangan. Yigitlarni har tomonlama taktik-psixologik jihatdan tayyorlash uchun o‘rtoqlik o‘yinlari muhim. Shu sababli oldin xabar berilganidek, Namangan va Andijonda nazorat uchrashuvlari o‘tkazamiz. Bundan ko‘zlangan asosiy maqsad - saralash o‘yinlarigacha optimal tarkibni shakllantirib, ikkita teng kuchli tarkib tuzish. Boisi, har bir chiziqda raqobatni kuchaytirish niyatidamiz. Bu futbolchining o‘sishi uchun xizmat qiladi: u asosiy tarkibdagi joy hech qachon kafolatlanmaganligini bilib turishi kerak.
- Tarkibni shakllantirishda nimalarga e’tibor qaratyapsiz?
- Barcha jihatlarga. Ammo o‘z klubida yaxshi o‘ynayotgan futbolchi terma jamoaga kelganda o‘zini ko‘rsata olmasligi mumkin yoki aksincha. Bu yoshda ular balog‘atga yetayotgan bo‘ladi, shuning uchun ayrimlariga nihoyatda ehtiyotkor munosabatda bo‘lish kerak, ba’zi futbolchilar bilan suhbatlashayotganda esa biroz qattiqqo‘llik ishlatish ziyon qilmaydi. Chunki vaziyat shuni taqozo etadi. Shunday bolalar borki, ko‘rsatmalaringizni tezda ilg‘ab oladi, bu ularning psixologik holatiga bog‘liq bo‘ladi. Shuni o‘ylagan holda, jamoamizga malakali psixolog Tatyana Vladimirovnani taklif qildik.
- Jismoniy tayyorgarlik bo‘yicha ham alohida ishlayasizmi?
- Ha. Lekin futbolchilar o‘z klublaridan jismoniy taraflama tayyor holda yetib kelishadi. Bilasiz, hozir taqvim tig‘iz, shuning uchun ham bunga jiddiy yondashmaymiz. Asosiy e’tiborni taktika va turli o‘yin uslublarini joriy etishga qaratamiz. Ularning individual shug‘ullanishlari uchun maxsus dastur ham yaratganmiz. Shuning barobarida barcha jamoalar murabbiylari bilan hamkorlikni yo‘lga qo‘yganmiz. «Nasaf» ustozi Ro‘ziqul Berdiyev, «So‘g‘diyona» yoshlar jamoasi bosh murabbiyi Bobur Zuhriddinovlar bilan aloqamiz mustahkam. Ular bilan o‘zaro kelishuvimiz bor, ya’ni ba’zi paytlarda murabbiylar iltimosiga binoan ayrim futbolchilarni qo‘yib yuboramiz. Ularning ko‘magi biz uchun muhim hisoblanadi. Chunki terma futbolchisi ko‘p vaqtini o‘z klubida o‘tkazadi, uning holatidan ko‘proq murabbiyi xabardor bo‘lib turadi. Terma ixtiyorida 15-20 kun bo‘ladi, klubda esa undan ko‘proq.
- Terma jamoa o‘zagi asosan poytaxt jamoalari vakillaridan tashkil topmoqda...
- To‘g‘ri, lekin «Bunyodkor» va «Paxtakor»dan chiqayotgan futbolchilarning aksariyati viloyatlardan kelishgan. Ya’ni, klub skautlari turli musobaqalar orqali ularni kuzatib, munosiblarini akademiyaga jalb etishgan. Faqat shu klublar bilan chegaralanib qolmasdan, O‘zbekiston U-21 chempionatini ham muntazam ravishda kuzatib boryapman. Viloyatlardagi turnirlarni ko‘zdan qochirmaslikka harakat qilyapman. Pro-ligada ishtirok etayotgan «Turon», «Mash’al», «Istiqlol» klublarida ham iqtidorlar bisyor. Ular hamisha nazoratimiz ostida.
- Yoshlar terma jamoasida o‘zini ko‘rsatayotgan futbolchilarning kutilmaganda yo‘qolib qolishiga mutaxassis sifatida qanday javob berasiz?
- Menimcha, bunga sabab futbolchilarning o‘zini-o‘zi nazorat qila olmasligida, bu yoshda katta natijalarga erishish har kimga ham nasib qilavermaydi. Shuning uchun bo‘lsa kerak, ko‘p hollarda katta futbolga kirib kelayotgan futbolchilarda yulduzlik kasali va o‘zini boshqara olmaslik vaziyatlari uchraydi. Bu jarayonda murabbiyning o‘rni juda muhim. Agar mana shunday holatlardan o‘tib olsa, marra uniki.
- Jasur Jaloliddinov katta futbolga erta kirib keldi. Bu unga ortiqcha bosim yuklamaydimi?
- Bosh murabbiyning uslubiga mos tushgan ekan, demak u shunga loyiq. Jasur bunga osonlikcha erishgani yo‘q, bu yo‘lda katta mehnat qildi. Bu uning o‘sishiga xizmat qilishi shubhasiz. Eng muhimi, o‘z ustida ishlashdan to‘xtamasligi darkor. Hali hayoti, kelajagi oldinda.
- «Bunyodkor» akademiyasida 2000 yilda tug‘ilgan futbolchilardan iborat jamoaga murabbiylik qilgansiz. Xo‘sh, ularning o‘yinlarini ko‘rib boryapsizmi? Qay birlari bildirilayotgan ishonchni to‘liq oqlashyapti?
- Darhaqiqat, ularning ko‘piga ustozlik qilganim rost. Hozirgi kunda Rasul Yo‘ldoshev, Abubakr Mo‘ydinov, Jasur Umrzoqov kabilar shular jumlasidan. Lekin afsuski, shogirdlarimning aksariyati ishonchni oqlashmadi. Qolganlar esa ikkinchi ligada Murod Otajonov qo‘l ostida to‘p surishmoqda.
- Ayrim jamoalarda futbolchi va murabbiy o‘rtasida masofa mavjud bo‘ladi, o‘z fikrlarini ustoziga bildira olmaydiganlar uchraydi... Sizda bu borada ish qanday yo‘lga qo‘yilgan?
- Bu borada hech qachon muammoga yo‘liqmaganman. Doimo shogirdlarim bilan do‘st tutinishga, ota-boladek munosabat o‘rnatishga harakat qilaman. Kimning qanday muammosi bor, qaysi futbolchidan qanday fikr chiqadi, u nimani xohlayapti, bajonidil, erinmay tinglayman. Shunchaki, o‘z holiga tashlab qo‘ymayman, kerak bo‘lsa, har biri bilan alohida gaplashaman. To‘g‘ri, ayrim futbolchilar murabbiyga gapini ochiq-oydin aytishga qo‘rqadi. Bu noto‘g‘ri deb o‘ylayman.
- Murabbiylar shtabida sizga kim yordam beradi?
- Doniyor Usmonov, Sarvar Haydarov, jismoniy tayyorgarlik bo‘yicha murabbiy Elnur Sigabatullin, darvozabonlar murabbiyi Valeriy Korpenkolar yordam berishadi. O‘ylaymanki, murabbiylar shtabidan tortib, futbolchilargacha ahil oilaga aylansak, niyatimizga yetamiz.
- O‘yin falsafangiz qanday: hujumkormi yoki himoyaga asoslangan?
- Avvaldan agressiv, hujumkor futbol tarafdori bo‘lib kelganman. Hozirgi zamonaviy futbolda himoyaviy o‘yin qilgan jamoa qiynaladi. To‘psiz yugurish ham jismonan, ham ruhan toliqtiradi.
- Lekin Karlush Keyrush mana shu uslub evaziga Eronni ikki bor mundialga olib chiqdi...
- Eron to‘liq 90 daqiqa himoyada o‘ynaydigan jamoa emas. E’tibor bering, so‘nggi Osiyo kubogida yarim finalgacha nechta gol urishdi? Buni himoyaviy o‘yin deyilmaydi, tartibli futbol desak to‘g‘ri bo‘ladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
