Julio Sezar, Junior Vinisius, Mosart - bu o‘yinchilarni «Flamengo»da o‘ynashgani o‘zaro bog‘lab turibdi.
Braziliya klubi yaqinda ikki nafar yosh tarbiyalanuvchisi uchun deyarli 100 million yevro olib, butun Janubiy Amerika futbolida o‘zgacha havas uyg‘otgan bo‘lsa, ajabmas. Soccer.ru sayti xodimlarining transfermarkt.de ma’lumotlariga tayanib yozishlaricha, «Real» Vinisius Junior transferi uchun «Flamengo»ga jami 61 million yevro to‘laydi.
«Milan» esa qishki bozor chog‘i Lukas Paketani o‘z safiga chorlab, iqtidorli yarim himoyachini 35 million yevroga baholadi.
Tahlilchilarning taxminlariga muvofiq, «Flamengo» bag‘rida o‘sgan har ikki futbolchini «ko‘hna qit’a»da yorqin faoliyat kutmoqda. Lekin ular «Katta Mengo»dan yevroarenaga shuhrat izlab kelgan dastlabki yoki oxirgi futbolchilar hisoblanmaydilar. Yevropada munosib iz qoldirgan «Flamengo» vakillari shu qadar ko‘pki, ulardan bemalol ramziy terma jamoa shakllantirish mumkin.
Darvozabonlar. Rio-de-Janeyro jamoasi maktabida shug‘ullangan yoki o‘ynagan darvozabonlar turli vaqtlar Belgiya, Turkiya va Portugaliya chempionatlarida chakki o‘ynashmagan. Lekin ikki nafar golkiper alohida e’tiborga munosib. Ulardan birinchisi 1978 yili jahon chempioni bo‘lgan argentinalik Ubaldo Fulyoldir. Kutilmagan holat, to‘g‘rimi? Axir argentinalik futbolchining Yevropaga Braziliya orqali yuzlanishi... Xullas, XX asrning eng kuchli darvozabonlari qatoriga qo‘shilgan Ubaldo «Atletiko» (Madrid) safiga jonajon vatani - Argentina emas, balki Braziliyadan kelgandi. Fulyol garchi «Flamengo» sharafini atigi 2 mavsum himoya qilgan bo‘lsada, klub tarixida yorqin iz qoldirgan. Ikkinchi darvozabon - Julio Sezar bo‘lib, u aynan «Flamengo» maktabida tarbiyalangan. 2005 yili Milanning «Inter» klubi tarkibiga qo‘shilgan braziliyalik yetuk kiper uzoq vaqt «neradzurralar» yetakchilari qatorida yurdi, bir necha skudetto sohibiga aylandi. Julio yevroarenadagi asosiy g‘alabasini esa CHLda Joze Mourinyo qo‘l ostida nishonladi. «Muz ustida sirpangan» «Benazir» esingizdami?
Markaziy himoyachilar. Aldair - «Flamengo»dan Yevropa futboli markaziga kelgan eng mashhur himoyachi. 1994 yilgi jahon chempioni va JCH-98 vise-chempioni avvaliga «Benfika» safiga qo‘shilgan, lekin atigi bir mavsumdan keyin Lissabondan Rimga ko‘chib o‘tgan. Yakunda u «bo‘rilar» afsonasi darajasiga chiqdi, har holda, naq 13 yillik faoliyati bejiz ketgani yo‘q. Umuman, «Roma» hamisha «Flamengo» tarbiyalanuvchilariga alohida qiziqish bilan qaragan. Braziliya milliy jamoasining 80tadan ortiq o‘yinida ishtirok etgan Juan esa «Ba-yer» (Leverkuzen)da shuhrat qozondi. U 2003 yilgacha «Flamengo»da naq 6 mavsum o‘ta samarali o‘ynagandi. Xullas, Juan «Bayer» ravnaqi yo‘lida 5 yil to‘p surgach, aynan «Roma» nazariga tushdi. Diqqatga sazovor tomoni, Rimda 4 yil o‘ynagan himoyachi hozir 40 yoshda va hamon jonajon klubi - «Flamengo» sharafini himoya qilmoqda.
«Fla»ning markaziy himoyada o‘ynagan yana bir tarbiyalanuvchisi Enrike 9 yil davomida «Bordo» (2005-2014)da barqaror to‘p surdi. 2016 yili «Udineze» safiga qo‘shilgan tartibli markaziy himoyachi Samir esa hamon «zebralar» ixtiyorida. To‘g‘ri, 24 yoshli istiqbolli yigit hali bor mahoratini ko‘rsata olgani yo‘q. Braziliyadan ancha erta chiqib ketgan Karlos Martinsh ham «Benfika»da o‘sishdan umidvor. «Fla»ning sobiq vakili bir urinishda «burgutlar» tarkibiga kirolmadi va uning uchun ijara kelishuvlari boshlandi. Deylik, hozir Portugaliya chempionati o‘rtamiyona klubi - «Santa Klara»da o‘zini ko‘rsatish harakatida.
Qanot himoyachilari. Iqtidori baland chap qanot himoyachisi Jorje 2017 yilning boshida «Monako» tomonidan 8,5 mln. yevroga sotib olindi. Bu futbolchi joriy mavsumni ijara shartnomasi asosida «Portu»da o‘tkazmoqda. To‘g‘ri, Portugaliyadagi malaka oshirish safari Jorjega hozircha aytarli naf keltirgani yo‘q. O‘tgan asrning 80-yillari Braziliya milliy jamoasi safidagi qoyilmaqom o‘yinlari bilan e’tiborga tushgan Junior vaqtida «Torino» chap qanot himoyachisi va markaziy yarim himoyachisi sifatida gavdalandi. U Turinga ko‘chib kelishidan oldin naq 10 yil davomida «Flamengo»ga sidqidildan xizmat qilgandi. Junior Italiya bo‘ylab turnesini yakunlagach, yana Rio klubiga qaytdi va uning safidagi jami o‘yinlari sonini 857taga yetkazib qo‘ydi (klub rekordi). O‘ng qanot vakillariga kelsak, 1990-2000 yillar oralig‘ida «Bayer» va «Bavariya»da Bundesliga yulduziga aylangan Jorjinyo bor, Ze Mario esa Italiya «A» seriyasida chamasi 10 yil davomida chakki taassurot qoldirgani yo‘q. Yana Ukraina futbolida yorqin iz qoldirgan Leo Matosni ham aytish kerak. Odessaning «Chernomores» va «Dnepr» klublarida to‘p surgan bu futbolchi ayni payt PAOK sharafini himoya qilmoqda.
Yarim himoyachilar. «Milan» joriy yil yanvar oyi boshida «Flamengo»ning 21 yoshli istiqbolli tarbiyalanuvchisi - Lukas Paketatransferi uchun 35 million yevro to‘ladi. Bu Rio klubi tarixidagi ikkinchi qimmatbaho kelishuvdir. Muhimi, Paketa «rossonerlar» safida darhol ishga kirishdi va kutilishicha, hali butun yevroarenaga bo‘y cho‘zadi. «Fla»ning boshqa bir tarbiyalanuvchisi - Renato Augusto esa o‘z ishini bajarib bo‘ldi - Bundesligadagi bir necha yillik faoliyati davomida «Bayer»ni olg‘a boshladi. «Flamengo»dan «Portu»ga o‘tgan Ibson keyinchalik Valeriy Karpin qo‘l ostida «Spartak»da o‘ynadi. Yana bir sobiq «spartakchi» Mosart Evropa futboliga «Redjina» orqali qadam tashlagandi. «Flamengo» vaqtida «Real»ga ham futbolchi sotgan, albatta. Gap Madridda o‘zini ko‘rsatolmagan Rodrigo Fabri haqida ketmoqda, vaholanki, u faqat «Real» emas, «Atletiko»da ham o‘z omadini sinab ko‘rgandi.
Hujumchilar. Vinisius Junior - «Flamengo» tomonidan sotilgan eng qimmatbaho futbolchi. Unda «Katta Mengo» tarbiyalanuvchilari orasida bosh yulduzga aylanish uchun real imkoniyat mavjud. Junior faqat Adriano kabi ulkan muammolarga yo‘liqmasa, bas. Baquvvat hujumchi 19 yoshidayoq «Inter» safiga qo‘shilib, «A» seriyada o‘z gollari vositasida hukmronlik qila boshlagandi. Biroq keyinchalik alkogol ichimliklariga ruju qo‘ygan Adriano asta-sekin panaga chekindi. Aslida u kamida Ronaldo darajasidagi yulduz bo‘lish iqtidoriga ega edi. «PSJ» vakili Reynaldo, shuningdek, «Real»da o‘ynagan Savio uncha ko‘p gol urmagan bo‘lsalarda, o‘z klublariga yetarlicha manfaat keltirishdi. Agar uzoq o‘tmishga nazar solsak, XX asr o‘rtalarida «Barselona» safini to‘ldirgan, keyinroq «Real»da ham ko‘rinish bergan Evaristo ko‘zga tashlanadi.
Yevropada o‘ynagan «Flamengo» futbolchilaridan tuzilgan ramziy terma jamoa
Julio Sezar - Jorjinyo, Aldair, Juan, Ze Mariya - Renato Augusto, Junior, Paketa - Vinisius Junior, Savio, Adriano
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
