Angliya Premyer-ligasi yo‘llanmalari taqdiriga oydinlik kirituvchi Chempionship «pley-off» o‘yinlari finalchilari ma’lum bo‘ldi.
Yakuniy uchrashuvda APLga chiqish uchun «Derbi Kaunti» va «Aston Villa» klublari o‘zaro bahs olib boradi. «Derbi» «pley-off» bosqichi yarim finali javob uchrashuvida «Lids»ni 4:2 hisobida mag‘lubiyatga uchratdi. Birinchi o‘yinda esa Marselo Byelsa boshqaruvidagi Lids klubi 1:0 hisobida ustun kelgandi. Xullas, ikki uchrashuv natijasiga ko‘ra, «Derbi» finalchiga aylandi.
Qayd etish lozim, Marselo Byelsa jamoasi yangi yilni Chempionship yetakchisi sifatida qarshi olgandi. Qisqasi, «Lids» oxirgi 10 yil ichida 25 dekabr kuni turnir jadvalida peshqadamlikni qo‘lga olgan va yakunda APL yo‘llanmasidan quruq qolgan ilk klub bo‘ldi. Bunday holat oxirgi marta 2007|2008 yillar mavsumida kuzatilgandi: Rojdestvoni peshqadam sifatida qarshi olgan «Uotford» yakunda chempionatni 6-o‘rinda yakunlagan va «pley-off» bosqichi yarim finalida yirik hisobda yengilgandi. Bundan tashqari, Byelsa shakllantirgan «Lids» oxirgi 9 yil badaliga «pley-off»ning safar o‘yinida g‘alaba qozonib, javob bahsi natijasiga ko‘ra, finalga chiqolmagan ilk jamoa bo‘ldi.
Endi hal qiluvchi o‘yinda «Derbi»ga «Aston Villa» raqiblik qiladi. Birmingemliklar yarim finalda «Vest Bromvich» to‘sig‘idan o‘tishdi (2:1, 0:1 va penaltilar bo‘yicha - 4:3). E’tiborlisi, finalga chiqqan har ikki klub murabbiylar shtabida «Chelsi»ning yaqin o‘tmishdagi yulduzlari faoliyat yuritishmoqda: Frenk Lempard «Derbi»ni mustaqil ravishda boshqarayotgan bo‘lsa, uning uzoq yillik klubdoshi Jon Terri «Aston Villa»da yordamchi murabbiy sanaladi. Ma’lumot uchun aytish kerak, Chempionshipda 1 va 2-o‘rinlarni egallagan jamoalar to‘g‘ridan-to‘g‘ri Premyer-ligaga yo‘l oladi, 3-6-pog‘onalarga joylashgan 4ta klub esa 3-yo‘llanma uchun «pley-off» turnirida qatnashadi. Aytgancha, final bahsi 27 may kuniga belgilangan. Demakki, yaqin orada Lempard va Terri Londondagi muhtasham «Uembli» stadionida o‘zaro to‘qnash kelishadi yoxud «Derbi Kaunti» - «Aston Villa» jangi kuzatiladi.
Aytish joiz, «Aston Villa» Angliya yuqori divizionida 28 yil uzluksiz ishtirok etganidan keyin mavsum-2015|2016 yakunida APL bilan xayrlashgandi. «Derbi Kaunti» esa yuqori divizionda oxirgi marta chempionat-2007|2008da ko‘rinish bergan. «Derbi» jamoasi o‘sha mavsum atigi 1ta o‘yinda g‘alaba erishgan va 11 ochko to‘plagan holda turnir jadvalining oxirgi pog‘onasini band etgandi.
APL-2018|2019 omadsizlari allaqachon ma’lum bo‘ldi - «Kardiff Siti», «Fulxem» va «Xaddersfild». Demak, yuqori divizionda ular o‘rnini «Norvich Siti», «Sheffild Yunayted» hamda «Derbi Kaunti» yoki «Aston Villa» egallaydi.