«Liverpul» nihoyat, sovrinsizlik domidan chiqdi. «Qizillar» 2012 yili Angliya Liga kubogini yutishgani bo‘yicha biror sovrin olishmagandi.
Mana, endi Yevropa Chempionlar Ligasi bosh sovrini - «shalpanquloq» kubokni bo‘ysindirishdi. O‘zi «Tottenxem»ga qarshi kechgan final Yurgen Klopp drujinasi uchun juda omadli boshlandi. Ilk hujumdayoq Sadio Mane to‘pni jamoadoshlari tomon uzatganida, u jarima maydonchasi ichida turgan Mussa Sissoko qo‘liga tegdi - penalti.
Muhammad Saloh esa vaziyatdan foydalanib, hisobni ochdi. Mersisaydliklar bunday ssenariyni rejalashtirishganmi yoki yo‘q - bunisi aniq emas, ammo ular tezda hisobdan kelib chiqib o‘ynashga o‘tishdi. Ya’ni tartibli himoyalanib, raqib xatosini kuta boshlashdi. «Tottenxem» ham tanaffusga qadar aytarli xavfli vaziyat yaratolmadi.
Xususan, hali sport formasini tiklay olmagan Garri Keyn ham jamoasiga naf berolmadi. Ikkinchi bo‘limda Maurisio Pochettino tavakkalga qo‘l urib, yarim himoyachi o‘rniga hujumchi Lukas Mourani tushirdi. Natijada «shporlar» o‘yinida hujumkorlik oshdi, zarbalar ko‘paydi. Bu vaqtda «Liverpul» posboni Alisson Beker barcha zarbalarni bartaraf etib, o‘z darvozasi daxlsizligini saqlab qoldi. Boz ustiga, o‘yin tugashiga 3 daqiqa qolganida, mersisaydlar barchasiga nuqta qo‘yishdi - yarim final qahramonlaridan biri Divok Origi o‘tkir burchak ostida yerlatib zarba yo‘llagach, «Tottenxem» butunlay taslim bo‘ldi - 0:2.
tottenxem - LIVERPUL - 0:2 (0:0)
1 iyun. Madrid. «Vanda Metropolitano» stadioni. 63272 tomoshabin.
Bosh hakam: Damir Skomina (Sloveniya).
Gollar: Saloh (2-pen.), Origi (87).
Tottenxem: Lyoris, Trippyer, Alderveyreld, Vertongen, Rouz, Sissoko (Dayer, 74), Uinks (Lukas Moura, 66), Eriksen, Alli
(Lyorente, 82), Son Xyun Min, Keyn.
Liverpul: Alisson, Aleksander-Arnold, Matip, van Deyk, Robertson, Xenderson, Fabinyo, Veynaldum (Milner, 62), Saloh, Firmino
(Origi, 58), Mane (Gomes, 90).
O‘yin statistikasi
tottenxem liverpul
KO‘RSATKICHLAR
78 Hujum 68
51 Xavfli hujum 40
16 Zarba 10
9 Aniq zarba 5
8 Burchak to‘pi 9
3 «Ofsayd» 2
5 Qoida buzish 6
0 Sariq kartochka 0
61 foiz To‘pni nazorat qilish 39 foiz
FINAL QAHRAMONI - VIRJIL VAN DEYK
«Liverpul» himoyachisi Virjil van Deyk CHL finalining eng yaxshi futbolchisi sifatida tan olindi. Laureatni taniqli murabbiylar - Devid Moyes, Garet Sautgeyt va Roberto Martinesdan iborat UYEFAning texnik kuzatuvchilari guruhi aniqladi. «Van Deyk yetakchilik xususiyatlarini namoyon etib, «Liverpul» himoyasida bosh rolni bajardi. U to‘pni olib qo‘yishda va hal qiluvchi vaziyatlarda sovuqqon harakati bilan ajralib turdi», - dedi texnik guruh rahbari Tomas Shaaf.
CHK|CHLning barcha g‘oliblari
2018-2019 - Liverpul (Liverpul, Angliya)
2017-2018 - Real (Madrid, Ispaniya)
2016-2017 - Real (Madrid, Ispaniya)
2015-2016 - Real (Madrid, Ispaniya)
2014-2015 - Barselona (Barselona, Ispaniya)
2013-2014 - Real (Madrid, Ispaniya)
2012-2013 - Bavariya (Myunxen, Germaniya)
2011-2012 - Chelsi (London, Angliya)
2010-2011 - Barselona (Barselona, Ispaniya)
2009-2010 - Inter (Milan, Italiya)
2008-2009 - Barselona (Barselona, Ispaniya)
2007-2008 - MYU (Manchester, Angliya)
2006-2007 - Milan (Milan, Italiya)
2005-2006 - Barselona (Barselona, Ispaniya)
2004-2005 - Liverpul (Liverpul, Angliya)
2003-2004 - Portu (Portu, Portugaliya)
2002-2003 - Milan (Milan, Italiya)
2001-2002 - Real (Madrid, Ispaniya)
2000-2001 - Bavariya (Myunxen, Germaniya)
1999-2000 - Real (Madrid, Ispaniya)
1998-1999 - MYU (Manchester, Angliya)
1997-1998 - Real (Madrid, Ispaniya)
1996-1997 - Borussiya (Dortmund, Germaniya)
1995-1996 - Yuventus (Turin, Italiya)
1994-1995 - Ayaks (Amsterdam, Gollandiya)
1993-1994 - Milan (Milan, Italiya)
1992-1993 - Marsel (Marsel, Fransiya)
1991-1992 - Barselona (Barselona, Ispaniya)
1990-1991 - Srvena Zvezda (Belgrad, Yugoslaviya)
1989-1990 - Milan (Milan, Italiya)
1988-1989 - Milan (Milan, Italiya)
1987-1988 - PSV (Eyndxoven, Gollandiya)
1986-1987 - Portu (Portu, Portugaliya)
1985-1986 - Styaua (Buxarest, Ruminiya)
1984-1985 - Yuventus (Turin, Italiya)
1983-1984 - Liverpul (Liverpul, Angliya)
1982-1983 - Gamburg (Gamburg, Germaniya)
1981-1982 - Aston Villa (Birmingem, Angliya)
1980-1981 - Liverpul (Liverpul, Angliya)
1979-1980 - Nottingem Forest (Nottingem, Angliya)
1978-1979 - Nottingem Forest (Nottingem, Angliya)
1977-1978 - Liverpul (Liverpul, Angliya)
1976-1977 - Liverpul (Liverpul, Angliya)
1975-1976 - Bavariya (Myunxen, Germaniya)
1974-1975 - Bavariya (Myunxen, Germaniya)
1973-1974 - Bavariya (Myunxen, Germaniya)
1972-1973 - Ayaks (Amsterdam, Gollandiya)
1971-1972 - Ayaks (Amsterdam, Gollandiya)
1970-1971 - Ayaks (Amsterdam, Gollandiya)
1969-1970 - Feyenoord (Rotterdam, Gollandiya)
1968-1969 - Milan (Milan, Italiya)
1967-1968 - MYU (Manchester, Angliya)
1966-1967 - Seltik (Glazgo, Shotlandiya)
1965-1966 - Real (Madrid, Ispaniya)
1964-1965 - Inter (Milan, Italiya)
1963-1964 - Inter (Milan, Italiya)
1962-1963 - Milan (Milan, Italiya)
1961-1962 - Benfika (Lissabon, Portugaliya)
1960-1961 - Benfika (Lissabon, Portugaliya)
1959-1960 - Real (Madrid, Ispaniya)
1958-1959 - Real (Madrid, Ispaniya)
1957-1958 - Real (Madrid, Ispaniya)
1956-1957 - Real (Madrid, Ispaniya)
1955-1956 - Real (Madrid, Ispaniya)
O‘yindan keyingi fikrlar
Muhammad Saloh («Liverpul» hujumchisi): - Juda xursandmiz, ketma-ket ikkinchi marta finalda maydonga tushganimdan ham. Bu safar 90 daqiqa o‘ynadim. Asosiysi, bugun bor kuchimizni ishga soldik. Hech kim o‘zini o‘ylamadi. Kelasi mavsumda APLda ham VARni ko‘ramiz, ammo hozirning o‘zida bu texnologiya menga yoqyapti. U zo‘r! Futbolchilik faoliyati uchun ko‘p qurbonliklar qilganman. Avvaliga qishloqdan Qohiraga ko‘chib o‘tdim, keyin yuqori saviyada to‘p suradigan misrlikka aylandim. Barchasi men uchun hayratlanarli...
Maurisio Pochettino («Tottenxem» bosh murabbiyi): - Oxirigacha kurashgan shogirdlarimdan faxrlanaman. Bizga omad yetishmadi - birinchi golni penaltidan qo‘yib yubordik. Ikkinchi bo‘limda yaxshi o‘ynadik va jang qildik. Bundan faxrlansam arziydi. Biroq omad biz tomonda bo‘lmadi. Finalni 0:1 hisobi bilan boshlash oson emas. O‘yin rejasini o‘zgartirishdan o‘zga choramiz qolmadi. Bunday penaltilarga oldindan tayyorgarlik ko‘rishning iloji yo‘q. Ruhan juda og‘ir bo‘ldi. Tajriba orttirishni o‘rganishimiz kerak. «Liverpul» o‘tgan yili xuddi bizning holatimizga tushgandi. Qo‘l ostimdagi jamoadan juda xursandman. «Liverpul»ni esa g‘alaba bilan tabriklayman.
Yurgen Klopp («Liverpul» bosh murabbiyi): - Jamoamga oson emasdi - salkam 3 hafta o‘yin amaliyotisiz qoldik. Finalda eng muhimi - natija. Yigitlar hech bir jabhada raqibga imkon berishmadi. Aynan shu jihat muhim edi. Alisson bir nechta ajoyib «seyv»larni amalga oshirdi. Ko‘p gapirmoqchi emasman, chunki biz g‘alaba qozondik. Shunchaki, yutuqdan rohatlanmoqchiman. Ehtiroslar avjiga chiqqan kecha, ammo barchasini bosiqlik bilan qabul qildim. Aslida men uchun kubok yutish u qadar muhim emasdi. Hammasidan ham yigitlarning aynan shu sovrin uchun jon-jahdlari bilan kurashganlari yoqdi.
Ugo Lyoris («Tottenxem» darvozaboni): - Juda tezkor gol raqibga katta ishonch bag‘ishladi. Bu aniq. Hammasi vaziyatlarni, ayniqsa, hal qiluvchi lahzalarni aql bilan boshqarishga bog‘liq. Qanchalik kuchli bo‘lmaylik, hal qiluvchi vaziyatlarni samarali yakunlay olmadik. Tezkor goldan keyin ham jamoaviy o‘yin borasida yaxshiroq o‘yin ko‘rsatishga harakat qildik. Ammo o‘yinni bu taxlit davom ettirish oson emasdi. Og‘riqli yakun. Umuman olganda, yana bu kabi imkoniyatga ega bo‘lish-bo‘lmasliging haqida hech qachon bilolmaysan...
final faktlari
* «Liverpul» o‘z tarixida 6-marta, Yurgen Klopp esa ilk bora Yevropa CHL|CHK g‘olibiga aylandi. Natijada mersisaydliklar bu borada 5 karra g‘oliblar - «Barselona» va «Bavariya»dan o‘zib ketishdi. «Qizillar»dan oldinda «Milan» (7ta kubok) va «Real» (13) bor, xolos.
* «Liverpul» muzeyidagi yevrokubok soni 12taga yetdi. Mersisaydliklar bu borada Angliya klublari orasida yaqqol peshqadam. 2-o‘rindagi «MYU» hisobida 6ta sovrin bor. «Liverpul» CHL|CHKda 6 marta zafar quchishdan tashqari, UYEFA kubogi va Yevropa superkubogida 3 martadan g‘olib chiqqan.
* Muhammad Saloh CHL finali tarixida urilgan 2-eng tezkor gol muallifiga aylandi. Eng yuqori natija 2005 yilgi finalda qayd etilgan. O‘shanda «Milan» sardori Paolo Maldini 55-soniyada aynan «Liverpul» darvozasini nishonga olgandi. Maldini hamda Salohdan keyingi o‘rinda Gaiska Mendyeta bor. U 2001 yilgi mavsum finalining 3-daqiqasi penaltini aniq bajarib, «Bavariya» posbonini ranjitgandi.
* Muhammad Saloh CHL finalida gol urgan afrikalik beshinchi va misrlik birinchi futbolchidir. Undan oldin afrikaliklardan Rabah Majer («Portu», 1987 yil), Samuel Eto~O («Barselona», 2006 va 2009 yillar), Didye Drogba («Chelsi», 2012 yil) va Sadio Mane («Liverpul», 2018 yil) kabi futbolchilar finalda gol quvonchini tuyishgandi.
* «Liverpul» hujumchisi Divok Origi finalda jamoasining 2-golini urib, g‘alabaga katta hissa qo‘shdi. Diqqatga sazovor tomoni, belgiyalik futbolchi CHLning 8ta uchrashuvida maydonga tushib, raqiblar darvozasi tomon 3ta aniq zarba berib, 3ta gol urdi. U avvalgi 2ta golini yarim final javob bahsida «Barselona» darvozasiga urgandi.
* «Liverpul» hujumchisi Daniel Starrij ham g‘aroyib natijaga erishdi. Squawka xabariga ko‘ra, 29 yoshli futbolchi CHL bosh sovrinini Angliyaning 2ta jamoasi bilan qo‘lga kiritgan yagona futbolchi bo‘ldi. U 2012 yili «Chelsi» safida zafar quchgandi.
* «Liverpul» himoyachisi Trent Aleksander-Arnold CHL finalida asosiy tarkibda maydonga tushgan eng yosh futbolchiga aylandi (20 yosh 7 oy 25 kun).
* «Barselona» hujumchisi Lionel Messi CHL-2018|2019 bosh to‘purari bo‘ldi. 10ta uchrashuvda 12ta gol urgan 31 yoshli argentinalik poygada «Bavariya» hujumchisi Robert Levandovski (8ta o‘yinda 8 gol)ni ortda qoldirdi. Shu tariqa Leo o‘zining asosiy raqobatchisi - Krishtianu Ronalduning 3 yillik hukmronligini to‘xtatdi. Ta’kidlash lozim, CHL tarixida eng ko‘p to‘purar bo‘lgan futbolchi Ronaldudir - 7 marta. Messi esa 6-karra birinchi bo‘ldi.
* Endi «Liverpul» EL g‘olibi - «Chelsi» bilan yana bir supersovrin uchun kurash olib boradi. Hisob bo‘yicha 44-Evropa superkubogi uchun bahs 14 avgust kuni Istanbul shahrida joylashgan «Vodafon-Arena» stadionida o‘tkaziladi.
CHL-2018|2019 RAMZIY TERMA JAMOASI
UYEFA CHL-2018|2019 yakuniga qarab, turnirning ramziy terma jamoasini shakllantirdi. Unda 20 nafar futbolchi bor. Eng ko‘p vakil «Liverpul»dan - 6 nafar.
Darvozabonlar: Alisson («Liverpul»), Mark-Andre ter Shtegen («Barselona»)
Himoyachilar: Trent Aleksander-Arnold («Liverpul»), Virjil van Deyk («Liverpul»), Endryu Robertson («Liverpul»), Matteys de Ligt («Ayaks»), Yan Vertongen («Tottenxem»)
Yarim himoyachilar: Jorjinyo Veynaldum («Liverpul»), Frenki de Yong («Ayaks»), David Neres («Ayaks»), Dushan Tadich («Ayaks»), Mussa Sissoko («Tottenxem»), Kevin de Bryuyne («Manchester Siti»), Rahim Sterling («Manchester Siti»), Tangi Ndombele («Lion»)
Hujumchilar: Hakim Ziyeh («Ayaks»), Sadio Mane («Liverpul»), Lukas Moura («Tottenxem»), Lionel Messi («Barselona»), Krishtianu Ronaldu («Yuventus»)
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
