Sportchilarimizni Tokio Olimpiadasiga har tomonlama puxta tayyorlash O‘zbekiston Milliy olimpiya qo‘mitasining ayni paytdagi eng asosiy vazifasidir.
Sir emaski, ayni zamonda sport sohasida nafaqat atletlar, balki sport tibbiyoti va farmakologiyasi borasida ham keskin raqobat kechmoqda.
Bugun Milliy olimpiya qo‘mitasida Respublikamizdagi yetakchi farmasevtika korxonalarining vakillari bilan uchrashuv o‘tkazilib, unda MOQ qoshidagi Respublika sport tibbiyoti ilmiy-amaliy markazi (RSTIAM) rahbariyati va professorlari, OAV vakillari ham ishtirok etishdi. Tadbirni MOQ prezidenti Rustam Shoabdurahmonov olib bordi va sohadagi kamchiliklar borasida o‘z fikr-mulohazalarini bildirib o‘tdi.
“Mana, Tokio Olimpiadasiga ham roppa-rosa 1 yil qoldi. Kelasi yil shu kuni barchaning e’tibori Yaponiyada bo‘lib o‘tadigan Olimpiya o‘yinlariga qaratilgan bo‘ladi. Biz Olimpiada yo‘llanmasiga da’vogarlik qilayotgan 400 nafar sportchimizni saralab oldik va ularni munosib tayyorlash borasida katta hamjda ish olib borilmoqda. Ob-havoni ko‘rib turibsiz. Mana shu issiqda atletlarimiz kuniga 2 mahal mashg‘ulot o‘tkazishmoqda. Ularning har bir mashg‘ulotga fiziologik jihatdan to‘liq tiklanib olishida, bunday jaziramada samarali shug‘ullanishida tibbiy preparatlarning o‘rni beqiyos. Bizdagi eng katta muammolardan biri terma jamoalarimizda shifokor, diyetolog, massajchi va farmakologning yetishmasligi. O‘ylaymanki, bugungi yig‘ilishimiz kamchiliklarimizning bir qismini bo‘lsa-da bartaraf etadi”, – dedi Rustam Shoabdurahmonov.
MOQ rahbari yig‘ilish ishtirokchilarini Tokio Olimpiadasiga tayyorgarlik uchun ishlab chiqilgan tezkor reja bilan tanishtirdi. Tadbir davomida RSTIAM direktori, professor Abdushukur Sodiqov ham sohada oqsayotgan jihatlar va ularni bartaraf etish yuzasidan o‘z fikrlarini bildirib o‘tdi. O‘z navbatida tashrif buyurgan mutasaddilar ham o‘zlarini qiziqtirgan savollariga javob olishdi.