Biz hamon Rio Olimpiadasida sportchilarimiz qo‘lga kiritgan fantastik natijani unutganimiz yo‘q. Braziliyadagi Olimpiya o‘yinlaridan keyin ko‘z ochib yumguncha 3 yil o‘tib ketdi. Yana roppa-rosa 1 yildan so‘ng kun chiqar yurt poytaxti navbatdagi Olimpiadaga mezbonlik qiladi.
O‘zbekiston Respublikasi Prezidentining 2017 yil 9 martdagi “O‘zbekiston sportchilarini 2020 yil Tokio shahri (Yaponiya)da bo‘lib o‘tadigan XXXII yozgi Olimpiya va XVI Paralimpiya o‘yinlariga tayyorgarlik ko‘rish to‘g‘risida”gi qarori doirasida katta hamjdagi ishlab olib borilmoqda. Yana 366 kundan so‘ng XXXII yozgi Olimpiya o‘yinlarining ochilish marosimida o‘zbekistonlik sportchilardan iborat katta delegasiyani “Tokio Olimpiya” stadionida mag‘rur hilpirayotgan bayrog‘imiz ortida ko‘rish nasib etishini tilab qolamiz. Ishonamizki, Tokio Olimpiadasi xalqimiz uchun Rio-de-Janeyrodan ham unutilmas va yorqin xotiralar taqdim etadi.
Tokio Olimpiadasining ochilish marosimi 2020 yil 24 iyul kuni mahalliy vaqt bilan 20:20 da boshlanadi. Toshkent vaqti bilan esa 16:20 ga to‘g‘ri keladi. Bugun saytimizda roppa-rosa shu vaqtdan boshlab Olimpiadaning ochilishiga qancha vaqt qolganini bildiruvchi teskari sanoq ishga tushadi.