Bugun MOQda O‘zbekiston Milliy Paralimpiya assosiasiyasining navbatdan tashqari hisobot-saylov konferensiyasi bo‘lib o‘tdi. Unda Jismoniy tarbiya va sport vazirining birinchi o‘rinbosari Oybek Kasimov, MOQ vise-prezidentlari Aziz Kamilov hamda Saken Polatov, shuningdek, sport jamoatchiligi ishtirok etdi. Konferensiyada kun tartibiga qo‘yilgan asosiy masala assosiasiyaning amaldagi raisi Ulug‘bek Mirhaydarovning o‘z xohishiga ko‘ra lavozimidan ozod etilishi bo‘yicha yozgan arizasini ko‘rib chiqish va uning o‘rniga yangi rahbar saylash bo‘ldi.
Yig‘ilish davomida dastlab U.Mirhaydarov arizasi ko‘rib chiqildi. Konferensiya ishtirokchilari bir ovozdan uning iste’fosini qabul qilishdi.
Shundan so‘ng MOQ vise-prezidenti Aziz Kamilov so‘zga chiqib, assosiasiya rahbarligi uchun shu paytgacha O‘zbekiston Milliy Paralimpiya assosiasiyasi raisi o‘rinbosari lavozimida ishlab kelgan Muxtorxon Maxsudovich Tashxodjayev nomzodini ilgari surdi va yig‘ilganlarga nomzod haqida qisqacha ma’lumot berib o‘tdi. Ovoz berish jarayonida barcha bir ovozdan yangi nomzodni ma’qulladi va Muxtorxon Tashxodjayev O‘zbekiston Milliy Paralimpiya assosiasiyasiga yangi rahbar etib saylandi.
“Avvalo, menga bildirilgan ishonch uchun hammaga rahmat. Oldimizda Tokio-2020 Paralimpiya o‘yinlaridek mas’uliyatli musobaqa turibdi. Rioda qayd etilgan natija tasodif emasligini isbotlash uchun barchamiz birgalikda harakat qilamiz. Jamoaning hamjihatligisiz hech narsaga erishib bo‘lmaydi. Umid qilamanki, barchamiz bir jamoa bo‘lib, oldimizga qo‘yilgan vazifalarni ado etamiz”, – dedi Muxtorxon Tashxodjayev.
Shuningdek, yig‘ilish davomida Oybek Kasimov va Aziz Kamilov so‘zga chiqib, yangi rahbarning faoliyatida omad va zafarlar tilab o‘tishdi. Shuning bilan O‘zbekiston Milliy Paralimpiya assosiasiyasining navbatdan tashqari hisobot-saylov konferensiyasi o‘z ishini yakunladi.
Tadbir yakuniga yetgach, barcha Milliy Paralimpiya assosiasiyasida jam bo‘ldi. U yerda MOQ prezidenti Rustam Shoabdurahmonov Paralimpiya assosiasiyasi mutasaddilari, sportchi va trenerlar bilan suhbatlashdi. MOQ prezidenti uchrashuv davomida tashkilot a’zolariga yangi rahbarni yana bir bor tanishtirib, M.Tashxodjayevning faoliyatida omad tiladi.