Toshkentdagi "Paxtakor" stadionida JCH-2022 saralashidan o‘rin olgan O‘zbekiston hamda Yaman milliy terma jamoalari o‘rtasidagi uchrashuv terma jamoamizning yirik 5:0 hisobidagi g‘alabasi bilan yakunlandi. O‘yindan keyingi matbuot anjumanining ikkinchi qismida mezbonlar ustozi Vadim Abramov savollarga javob berib o‘tdi.
— Barchani g‘alaba bilan tabriklayman. Futbolchilarda biroz hayajon sezildi, chunki o‘yin ahamiyati yuqori edi. Ammo ular bu bosimni yengib o‘ta olishdi va g‘alaba qozonishdi. Buning uchun ularga minnatdorchilik bildirmoqchiman.
— Jamoangiz yirik hisobda g‘alaba qozondi, ammo nima uchun sizning kayfiyatingiz yaxshi emas?
— Men u yoshdan o‘tganman. G‘alaba qozondik, bu yaxshi. Ammo xursandchilikni baralla nishonlash shart emas.
— Kecha «Yamanni doskada yutib bo‘ldik, endi maydonda yutish qoldi», degan edingiz. O‘yin doskada bo‘lganidek chiqdimi yoki o‘xshamagan joylari bormidi?
— Bu endi sizga yaxshiroq ko‘ringan bo‘lishi kerak. Chunki tepada o‘tirdingiz, men esa pastda.
Men bugungi o‘yinni to‘liq tahlil qilishim uchun videoni ko‘rib chiqishim kerak. Albatta menga yoqmagan joylar bo‘ldi va o‘xshamagan joylarni to‘g‘rilash uchun harakat qilamiz.
— Yirik hisobdagi g‘alaba aldamchi taassurotga sabab bo‘lmaydimi? Kuchliroq raqibga qarshi kechadigan o‘yinda bunday taassurot pand berib qo‘yishi mumkin.
— Hisob o‘yinga mos bo‘ldi. Biroq hammasi risoladagidek bo‘ldi, deb aytmagan bo‘lardim. Menga yoqmagan joylari bor, ammo bu haqda gapirishni istamayman. Biz xatolarni to‘g‘rilashga harakat qilamiz.
— Sanjar Qodirqulov MTJning dastlabki yig‘inida yo‘q edi, keyinchalik uni chaqirdingiz. Bu haqida nima deya olasiz?
— U «Bunyodkor»da qo‘l ostimda o‘ynaydi va uning imkoniyatlarini yaxshi bilardim. Ammo shunda ham darhol milliy jamoaga chaqirmadim, avval olimpiyachilar safidagi o‘yinini ko‘rib, ishonch hosil qilgandan so‘ng tarkibga jalb etdim. Agar u bugun omadli o‘ynamaganda menga nisbatan juda katta tanqidlar yog‘ilardi. Masalan, Lutfulla To‘rayev borasida ko‘plab tanqidlar bo‘ldi. Ishoning, agar u bugun maydonda bo‘lganda, o‘yinni buzib qo‘ymagan bo‘lardi. Ammo tanqidlar yomg‘iridan so‘ng biroz kayfiyati tushdi, «Buxoro» bilan ko‘ngildagidek o‘ynay olmadi. Shu bois termada olib qolib, uni qiynamaslikka qaror qildim.
— Maydon markazida futbolchilarning tizimli o‘yinini ko‘rmadik. Qanotlardan to‘pni uzatish sizning ko‘rsatmangiz edimi?
— Maydon markazidagi o‘yinni yo‘lga qo‘yib olishga bizda vaqt bo‘lmadi. Agar jamoa bilan hech bo‘lmasa 10 kun yig‘in o‘tkazib, ikkita o‘rtoqlik o‘yini tashkil etganimizda, o‘yinni ancha yaxshilab olgan bo‘lardik.
— Vitaliy Denisov murabbiyning rejalariga kiradimi?
— Uning imkoniyatlarini juda yaxshi bilaman. Ammo Denisov hozircha o‘yin amaliyotiga ega emas. Shu sababli sport formasida bo‘lgan o‘yinchilarni chaqirishga qaror qildim. Vitaliy Denisov hozir qanday holatda ekanini bilmayman. U o‘z klubida o‘ynay boshlagani hamono albatta o‘yinlarini ko‘rib chiqamiz. O‘zbekiston pasportiga ega barcha futbolchilar uchun terma jamoa eshigi ochiq.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
