Siz hayolan kelajakda paydo bo‘lib qolganmisiz yoki zamonamizning eng so‘nggi texnika yutuqlari mujassamlashgan shaharidachi? Kecha Yaponiya poytaxti Tokio shahrida jurnalistlar uchun kelasi yili bo‘lib o‘tadigan XXXII Olimpiya va XVI Paralimpiya o‘yinlariga bag‘ishlangan press-brifing boshlandi. Brifingning birinchi kunida tashkiliy qo‘mita vakillari dunyoning turli chekkalaridan tashrif buyurgan jurnalistlar xayolida kelasi yilgi Tokio qiyofasini jonlantira olishdi.
Press-brifingga Milliy olimpiya qo‘mitasi hisobidan yurtimizning yetakchi OAVlarida faoliyat olib borayotgan jurnalistlar ham jo‘natilgan. Tadbir davomida tashkilotchilar musobaqada jurnalistlar uchun yaratilgan qulayliklar, bahslar translyasiyasi qanday texnika yutuqlari yordamida amalga oshirilishi xususida batafsil gapirib o‘tishdi. Ahamiyatlisi, Tokio-2020 tashkiliy qo‘mitasi o‘yinlar davomida to‘liq va uzliksiz ishlaydigan ultra 5G internet, ya’ni dunyodagi eng tez tarmoqni va’da qilishdi.
Ma’lumki, Tokio dunyodagi eng gavjum va aholisi ko‘p shaharlardan. Shubhasiz, Olimpiada paytida shahardagi aholi soni yana bir necha millionga ortishi mumkin. Bunda transport va logistika bo‘yicha muammo bo‘lish ehtimoli mavjudligi sayyohlarni tashvishga solib qo‘yishi turgan gap. Mezbonlar bu muammo yechimi uchun tayyorlangan o‘ta qulay va tezkor transport tizimi haqidagi taqdimot davomida berilgan ma’lumotlar ko‘pchilikning hayratini yanada oshirdi.
Shuningdek, Tokio Olimpiadasining boshqalardan ajralib turadigan yana bir jihati unda ilk bor barcha bellashuvlarni onlayn tomosha qilib borish imkoniyatini yaratuvchi “jonli saytlar” ishga tushirilishida. Bunda barcha muxlislar parallel ravishda o‘tayotgan istalgan musobaqani maxsus ilovalar orqali tomosha qilib borish imkoniyatiga ega bo‘lishadi. Kechagi brifing mana shu kabi texnik masalalarga bag‘ishlandi. Bugundan mehmonlar uchun musobaqalar bo‘lib o‘tadigan sport ob’ektlari, Olimpiya shaharchasi va shaharning Olimpiadani qabul qilishdagi barcha imkoniyatlarini ochib berishga qaratilgan media-tur tashkil qilinmoqda.