Stadion.uz Janubiy Amerikaning eng kuchli darvozabonlaridan biri – Klaudio Bravo borasida fikr almashadi.
Bugun “Manchester Siti”da juda kam ko‘rinish berayotganiga qaramay, Chili terma jamoasi darvozasini qo‘riqlayotgan va tez orada boshqa jamoaga o‘tishi mumkin bo‘lgan Klaudio Bravo borasida so‘z yuritamiz.
Yaqindagina “Manchester Siti” darvozasini Liga Kubogi finalida darvozani qo‘riqlagan Bravo o‘yindan so‘ng, jamoadan ketmoqchi ekanligi borasida fikr bildirdi. Bundan ko‘rinib turibdiki, Chili futboli tarixidagi eng kuchli darvozabon vaziyat taqozo qilganida emas, doimo o‘yin ichida bo‘lishni istamoqda. 36 yoshli darvozabonning bunday qarorga kelgani tahsinga sazovor!
Klaudio “Real Sosyedad” darvozasini klub uchun og‘ir kunlarda munosib himoya qilgan, “Barselona”ning nozik o‘yin uslubiga tezda moslashib ketgan posbon. Chililik kiper Ispaniyada ikkita chempionlik, ikkita mamlakat kubogi, YECHL, KO‘JCHni qo‘lga kiritibgina qolmay, “Barselona” tarixida eng uzoq muddat to‘p o‘tkazib yubormagan (754 daqiqa) darvozabon ekanligi ko‘pchilikning yodidan ham ko‘tarilib ketgan bo‘lsa, ajab emas. O‘z vaqtida Ter Shtegenni zaxira o‘rindig‘iga mixlab qo‘ygan Bravo ikki bor terma jamoa safida “Kopa Amerika” musobaqasi g‘olibiga aylandi. Bo‘yi atigi 180 sm bo‘lishiga qaramay, Bravo yakka kurashlarda va to‘p bilan munosabatda bo‘lish borasida benazir kiperlardan biri edi...
Aslida Bravo dunyoning eng kuchli darvozaboni sifatida Pep Gvardiola jamoasi safiga kelib qo‘shilganda, uning birinchi raqamli posbon bo‘lishiga hech kim shubha qilmagani aniq. Afsuski, “Kondora”(uning laqabi shunday)Angiliyada o‘zini yo‘qotib qo‘ydi. U o‘zining debyut uchrashuvidayoq jamoasi uchun muammolar yaratishni boshlab yubordi. Barchasi omadsizstart 2016-17-mavsumning ikkinchi qismida Bravoning zaxira darvozaboniga aylanishi bilan yakunlandi. O‘sha davrlarda, uning jarangdor familiyasi va maydondagi o‘yinlari sira bir-biriga mos kelmayotgani butun ingliz nashrlari uchun asosiy mavzuga aylangani yodingizda bo‘lsa, ajab emas. Achinarlisi shundaki, Ispaniyadagi 10 yillik faoliyat va Chili bilan ko‘rsatilgan qahramonliklarni barcha qisqa muddatda unutib yuborildi.
Oradan bir yil o‘tib “Benfika”dan Ederson o‘z omadini sinab ko‘rish uchun “shaharliklar” safiga kelib qo‘shildi. “Manchester Siti” Edersonni dunyoning eng qimmat darvozaboniga aylantirdi. Bu esa, o‘z-o‘zidan uning zaxirada o‘tirmasligini anglatib qo‘ydi. Bravo esa, ikkinchi darajali uchrashuvlarda o‘z imkoniyatini kuta boshladi. Asosan aralash tarkib harakat qiladigan kubok o‘yinlari davrida Bravo bir necha bor qahramonliklar ko‘rsatdi, penaltilar seriyasini bir o‘zi yutib bergan o‘yinlar ham bo‘ldi, biroq Bravo Konfederasiyalar kubogining eng yaxshi darvozaboni deb e’tirof etilishi ham vaziyatni yumshata olmadi. To‘g‘rirog‘i, Bravoga ikkinchi imkon taqdim etmadi. 2017/18-yilgi mavsumda “Kondora” atigi 3 ta APL o‘yinidagina darvozani qo‘riqlagan bo‘lsa-da, aynan uning ishonchli o‘yini evaziga “Man-Siti”Angliya Kubogini qo‘lga kiritdi. O‘tgan mavsumda darvozabon barchasiga nuqta qo‘yishi mumkin edi, biroq yana bir bor urinib ko‘rishga qaror qildi. Afsuski, jarohatlar uni deyarli boshi berk ko‘chaga olib kirib qo‘ydi.
Bu mavsumga kelib darvozabon oyoqdagi og‘riqlardan xalos bo‘lgach, yana o‘z ritmiga tushib oldi. E’tiborlisi shundaki, noyabryoyida taqdir Chili sardoriga YECHL uchrashuvida maydonga tushish imkonini taqdim etdi. “Atalanta”ga qarshi o‘yinda jarohat olgan Edersonni almashtirgan darvozabon qizil kartochka sababli o‘yinni yakunlayolmadi. So‘nggi daqiqalarda Kayl Uoker uning qo‘lqoplarini kiygani ko‘pchilikning yodidan ko‘tarilmagan bo‘lsa kerak.
Ederson kutilganidanda tezroq sog‘aygani bois, Bravo yana o‘z joyiga qaytarildi. Ushbu mavsumdagi Liga Kubogi final uchrashuvi ham “Kondora”ning benefisiga aylanib ketganini barcha ko‘rdi. Agar uning ishonchli va sovuqqon harakatlari bo‘lmaganida, “shaharliklar” sovrinni Grilish boshchiligidagi “Aston Villa”ning “bezorilari”ga berib qo‘yishi hech gap emas edi. Qaysidir ma’noda ikki mavsum YECHLdan chetda qolishi kutilayotgan jamoa uchun kubokdagi zafar katta yutuq bo‘lmasa-da, Bravoningo‘zi va muxlislar uchun hali hech narsa yakun topmaganini ko‘rsatib qo‘ydi.
Endilikda uning uchun sarflangan pullarni havoga uchdi deyishga hech kimning haqqi yo‘q! U omadsiz startni sovrinlar bilan berkitib tashladi. 36 yoshida dunyoning eng badavlat jamoasida katta maosh evaziga zaxira o‘rindig‘ida o‘yin tomosha qilish yoqimli, biroqBravo uchun emas! Britaniya nashrlari bergan xabarlarga qaraganda, darvozabon o‘z faoliyatini uchta jamoada davom ettirishi mumkin ekan.
“Shaharliklar” o‘z darvozabonini MLSdagi “Nyu-York Siti”ga “uzatib yuborishlari” haqidagi mish-mishlarga ko‘zingiz tushgan bo‘lsa, ajab emas. Aslida “Siti”ning MLS variantida Shon Jonson ancha ishonchli ko‘rinmoqda. Katta ehtimol bilan Bravo u yerda ham ikkinchi darvozabon maqomida bo‘ladi. MLSda zaxirada o‘tirish bilan APL o‘yinlaridan chetda qolishning farqi katta.
Ikkinchi variant – Meksikaning “Monterrey” klubi. Meksika klubi darvozasini qo‘riqlayotgan 36 yoshli Marselo Baroveroning ishlari chakki emas, biroq Yevropadan kelgan yulduz statusidagi darvozabon uchun uni chetga surib tashlashlari aniq. Bravo Meksikada chempionlik uchun kurashda asosiy da’vogar sanalgan “Monterrey” jamoasida o‘zini ancha erkin his qilishi turgan gap. Boz ustiga, u yerda darvozabonlardan oyoq bilan yaxshi o‘ynashni hech kim talab qilmaydi!
So‘nggi variant. Jonajon “Kola-Kola” klubiga qaytish va o‘sha yerda so‘nggi nuqtani qo‘yish. Bravo bundan 14 yil avval ushbu klubni tark etgan edi. Endi unda “Kola-Kola”ga mashhur bo‘lib qaytish imkoni mavjud. Brayn Kortes jamoaning faxri uchun o‘z o‘rnini bo‘shatib berishdan qattiq ranjimasligi aniq. Sababi, Bravo yana bir mavsum yuqori saviyada o‘yin ko‘rsatishi mumkin xolos, biroq qanday chiroyli yakun! Shunday emasmi?
Hozircha, qahramonimizning oldida bir-biridan qiziq uchta variant turibdi. Do‘ppini qo‘lga olib o‘ylasak, unda to‘rtinchi yo‘l ham bor ekan. Bu qanday yo‘l ekanligini anglagan bo‘lsangiz kerak. Manchester shaxrida qolish va yana bir kubokni qo‘lga kiritgancha boshni tik ko‘tarib barchasiga qalin nuqta qo‘yish.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
