Jahon sog‘liqni saqlash tashkiloti 1948 yil 7 aprelda tashkil etilgan edi. Tashkilot yilning bu sanasini Jahon salomatlik kuni deb e’lon qilgan.
Bu yil Jahon sog‘liqni saqlash tashkiloti karatinda bo‘lgan, kasallik alomatlari kuzatilmagan kishilar uchun koronavirus pandemiyasi paytida jismoniy faollikni saqlab turish yuzasidan o‘z tavsiyalarini e’lon qildi.
Ushbu tavsiyalarda quyidagilar qayd etilgan:
Haftasiga kamida 2,5 soat mo‘’tadil jismoniy mashqlarni bajarish. Ya’ni har kuni 20 daqiqadan, yoki haftasiga to‘rt marta 35 daqiqadan jismoniy mashqlarni bajarish. Shiddat bilan mashq qilishni xush ko‘radiganlar uchun haftasiga 75 daqiqa jismoniy faollik yetarli bo‘ladi.
Ko‘proq yurish. Turgan joyda, xona uzunligida, hovlisida (o‘z hovlisi bo‘lganlar uchun), qavatlar o‘rtasidagi zinapoyalarda yurish va hokazo. O‘rni kelganda olib borilgan ilmiy tadqiqotlar har kuni o‘rta sur’atda yurish yurak-tomir kasalliklaridan vafot etishni o‘rtacha 20 foizga kamaytirishini ko‘rsatgan.
Iloji boricha ko‘proq tikka turish. Hatto ishni ham turgan holda bajarishga harakat qilish yoki “o‘tirib-turib” holatida ishlash.
Shuningdek, Jahon sog‘liqni saqlash tashkiloti jismoniy mashqlarini bajarishda Internetning onlayn-maydonchalaridan foydalanishni tavsiya etadi. Jismoniy mashqlarini uy sharoitida bajarish mumkin bo‘lgan juda ko‘p turlari mavjud. Ulardan quyidagilar keltiriladi:
– doiraviy mashq. U 30 daqiqa davomida bajariladi va mushaklarning barcha guruhlariga mo‘ljallangan. Bu mashqlarning bir davrasi navbat bilan, qisqa muddat nafas rostlagan holda 6-8 ta mashqdan iborat;
– yuqori jadallikdagi mashqlar. Ularning asosiy xususiyati – yuqori faollik vaqti 1:2 nisbatda 5 daqiqadan 30 daqiqagacha davom etadi;
– Tabata tizimi (1996 yilda yaponiyalik fiziolog, fan doktori Izumi Tabata tomonidan ishlab chiqilgan). Ushbu tizim har biri 20 soniya faollik va 10 soniya nafas rostlash orqali 4 daqiqaga mo‘ljallangan mashqlar davrasidir.
Jahon sog‘liqni tashkiloti ana shunday jismoniy faollik koronavirus pandemiyasi bilan kurashda samarali vosita bo‘lishini ta’kidlagan.