Biz stadionlarni yoritish masalasiga e’tibor qaratishni boshladik. Mana shu havolada Coca Cola Superliga stadionlaridagi holat haqida to‘liq ma’lumot berilgan. Rejamiz bo‘yicha, 2021 yilgi mavsumda Superliga stadionlari minimum 1200 lyuksni tashkil qilishi kerak.
Yaqinda biz stadionlar maysasi yuzasidan fikr almashishni boshladik. Bunda "Navbahor", "Nasaf", "Paxtakor", "Lokomotiv", "Qizilqum" kabi stadionlar maysasini parvarish qilgan mutaxassislar O‘zPFLga tashrif buyurdi. Uchrashuvlarni kuzatayotgan bo‘lsangiz, aynan shu klublar maydoni gazoni boshqalarnikidan ajralib turadi.
Birinchi galdagi mavzu boshqa maydonlar holati haqida bordi. Bilasizmi, o‘sha "Lokomotiv", "Nasaf" yoki "Paxtakor" klublari bunday maydonlarni parvarish qilish uchun yaxshigina chiqim qiladi. Bu butun dunyoda bor narsa. Ammo afsuski, bizda maydonlar uchun mablag‘ ajratmaydiganlar yetarlicha. Legionerlar yoki boshqa xarajatlar uchun milliardlar topilishi mumkin, biroq maydon holatini ushlab turadigan texnikalar sotib olinmagan, maysalar uchun vitaminlar deyarli berilmaydi. Vaholanki, translyasiyalar Yevropanikiga yaqinlashishi uchun nafaqat sifatli TV texnikalar, balki projektor hamda yaxshi maysalar ham zarur.
Shuningdek, uchrashuvlardan avval maysani namlash, ya’ni, unga suv sepish masalasi ham ko‘tarildi. Tezkor va kombinasion futbolni yaxshi ko‘radigan murabbiylar bunga jiddiy e’tibor beradi, ularni siz ham yaxshi bilasiz. Bunda to‘p tezroq yumalaydi, hujumkorlik ortadi, futbolchilar futboldan rohat olib to‘p suradi. Ammo natija yo‘lida bundan qochadigan murabbiylar ham bor. Ularni ham tushunish mumkin, tarkibi kuchsizroq ekanini bilgani uchun, yetakchi klublarni shu yo‘l bilan qurolsizlantirishga, yopiqroq futbol o‘ynashga, keng front bo‘ylab harakat qilmaslikka urg‘u berishadi.
Bundan tashqari, maysalar xarakteri va iqlim sharoiti ham bor. Aytaylik, uchrashuvdan avval maysa sug‘orilsa, futbolchilarda o‘yin yaxshiroq chiqadi, ammo maysa nisbatan ko‘proq talofat ko‘radi. Nima demoqchiman, yaxshi futbol uchun ko‘p mutaxassislar o‘sha qurbonlikka tayyor turadi. Ispaniya, Angliya, Germaniya kabi chempionatlarda gol urgan futbolchilar maysa ustida qanday “uchishlarini” siz yaxshi bilasiz, bu ular uchun odatiy holat. Biz ham mana shu bosqichga yetib borishimiz kerak.
Yaxshi maydon katta xarajat talab qiladi. Shundan kelib chiqib, klublarda ikki yo‘l bor: yo yaxshi infrastruktura qilish va kamchiqim futbolchilar bilan to‘p surish yoki yaxshi futbolchilarni jalb qilib, infrastrukturaga pul yetkaza olmaslik. Masalan, men birinchi yo‘lni yoqlagan bo‘lardim. Bu yoshroq futbolchilarga katta turtki beradi, ular tekis va ravon maydonlarda futbol sabog‘ini chiqarishga muhtoj. Bu ularga qo‘rqmasdan, o‘ziga ishonch bilan to‘p surish, to‘p bilan muomala qilayotganda qiyshiq maydonga emas, ochilayotgan sheriklariga nazar tashlash kabi ko‘nikmalarini beradi. Afsuski, ravon bo‘lmagan futbol maydonlarida katta bo‘lgan avlod ketma-ket chiqaveradi va biz ulardan Yaponiya yoki Janubiy Koreyani yutishni talab qilamiz.
Ha, ba’zi murabbiylar viloyatdagi maydonlardan nolishi mumkin. Ammo ular buni ba’zida futbolning bir qismi sifatida qabul qilishlari kerak. "Barselona" ham har yerda "Kamp Nou"dagi sharoitni topa olmaydi. Kimdadir maysa 1,5 sm qilib, yana kimda 2,2 va hokazo uzunlikda o‘riladi, futbolchilar, murabbiylar buni juda yaxshi his qiladi, hamma joyning o‘z tosh va tarozisi bor, hamma jamoa shuning uchun ham o‘z uyida, o‘z maysasi ustida yaxshiroq ko‘rinadi, maydonga tezroq moslashadi.
Bugunga kelib Superliga va Pro liga maydonlari ancha yaxshilangan. Endi biz tezroq ikkinchi bosqichga — o‘sha maydonlar uchun chiqimlar qiladigan davrga yetib kelishimiz kerak. O‘yingohlar maydonini asrab, mashg‘ulotlar uchun boshqa maydonlar barpo etishimiz shart. Kerak bo‘lsa, buning uchun qimmat futbolchilardan vaqtincha voz kechish mumkin, evaziga o‘zimizning bolalar kelajakda ulardan ancha saviyaliroq futbolchi bo‘lish imkoniyatini qo‘lga kiritadi.
Diyor Imomxo‘jayev.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
