Bundesliga va YECHLda goleadorlik qobiliyatini namoyish etayotgan Erling Braut Xolandning hozirgi shaxsiy statistikasi har qanday kishini hayratga solishi tayin. Deylik, norvegiyalik hujumchi elit darajada 100ta gol marrasini atigi 146-o‘yinida zabt etib, bu borada Lionel Messi, Krishtianu Ronaldu va Zlatan Ibragimovich kabi aslarni ortda qoldirdi. Ammo ko‘pchilik Erlingning yaqin qarindoshi Norvegiyada yanada hayratlanarli statistika qayd etayotganini bilmasa kerak.
17 yoshli Albert Braut Tyaland hozirda «Molde» yoshlar jamoasida o‘ynaydi (Erling Xoland 2017-2019 yillar oralig‘ida aynan shu klubda porlagan). Endi uning joriy mavsumdagi shaxsiy statistikasiga qarang: 37ta o‘yinda 64ta gol! Ha, Tyaland hozircha Xolandning futbolga kirib kelish yo‘lini to‘liq takrorlamoqda: Erling «Molde» safiga qo‘shilishidan oldin Norvegiyaning «Bryun» klubida o‘ynagandi. Albert ham bu jamoada to‘p surgan va natijalari hozirgidan aslo kam bo‘lmagan:
2017 yil - 8ta o‘yinda 20ta gol
2018 yil - 12ta o‘yinda 20ta gol
2019 yil - 31ta o‘yinda 33ta gol
Norvegiya matbuoti Erlingning ammavachchasini kuchli va tezkor, jismonan baquvvvat hujumchi sifatida ta’riflamoqda. To‘g‘ri, ikkisining jismoniy ko‘rsatkichlari o‘rtasida farq ham bor: Erlingning bo‘yi Albertnikidan 9 santimetr balandroq (194ga 185ga). Qolaversa, «Borussiya» D. yulduzi chap oyog‘i bilan ko‘proq gol urayotgan bo‘lsa, «Molde» bag‘rida kamol topayotgan yangi yulduzchaning o‘ng oyoq zarbasi o‘ta dahshatli. «Erling meni chinakamiga ilhomlantirmoqda. Uning hozirgacha erishgan yutuqlari hayratlanarli. Asosiysi, har bir uchrashuvda yuqori darajada futbol namoyish etmoqda. Albatta, men ham futbolda iloji boricha uzoqroqqa borishni xohlayman. Bilaman, tezkor va jismonan baquvvatman. Qisqasi, men uchun turtki beradigan asosiy o‘yinchi - bu aynan Erling», - deydi Albert Braut.
Faoliyati rivojiga qarab, mantiqan taxmin qilish mumkinki, Tyaland yaqin orada «Molde»dan Avstriyaga yo‘l olsa kerak, albatta, «Zalsburg»ga. Ehtimolki, u katta imtihonni tezkor ravishda topshirishni xohlab, birdaniga Yevropaning kuchli 5ta ligasi klublaridan birini tanlar... Har holda, yigitchaning dahshatnamo statistikasi, qolaversa, yaqin qarindoshining yevrofutbol markazida qanday karomatlar ko‘rsatayotganini hisobga olsak, ikkinchi variantni hech kim inkor etolmaydi. Hattoki, buning ehtimoli balandroq ko‘rinmoqda...
A.AHMEDOV tayyorladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
