O‘zbekiston milliy jamoasi tarixida yana bir antirekord kuzatildi. Hozirga qadar termamiz jahon chempionati saralashini bu qadar sharmandali tarzda yakunlamagandi. Ikkinchi bosqich yakunidayoq navbatdagi mundial orzulari sarobga aylandi. Oxirgi umid Saudiya Arabistoniga qarshi bahsdan edi. Jamoamizdan bor-yo‘g‘i yutqazmaslik talab etilardi. Ammo afsuski...
Saudiya Arabistoniga qarshi kechgan bahs arafasida termamiz eng yaxshi ko‘rsatkichga ega ikkinchi o‘rin egalaridan biri sifatida keyingi bosqich yo‘llanmasini qo‘lga kiritish imkoniyatini saqlab turgandi. Lekin so‘nggi imkoniyat ham ko‘kka sovurildi.
Tarkibda tajribalar o‘tkazishga moyil Vadim Abramovning mazkur uchrashuv uchun tanlagan futbolchilar ro‘yxati barchani birdek hayratga soldi. Avvalgi mundiallar saralashida ham ko‘plab e’tirozlar, bahs-munozaralarga sababchi bo‘lgan Oleg Zoteev yana maydonga tushirildi. E’tiborlisi, uning aynan qaysi pozisiyadan joy olgani haqiqiy jumboqqa aylandi, zero chap qanot himoyasida Ibrohimhalil Yo‘ldoshev to‘p surardi. Kutilganidek, Zoteev maydonda yo‘qolib qoldi, uning vazifasi nimadan iborat ekanligini baribir, tushunib bo‘lmadi: na mudofaada tayinli ishni bajardi, na boshqa pozisiyadagi sheriklariga ko‘maklashdi. Shunga qaramay, u 90 daqiqa to‘p surdi...
Boshqa futbolchilar masalasida ham Abramovga savollar bisyor. Nega so‘nggi paytlarda o‘yin amaliyotisiz qolib ketgan Odil Ahmedovni mudofaa markaziga qo‘ydi? Odil Hamrobekov va Ikrom Aliboyev singari futbolchilarning hali yirik o‘yinlarga tayyor emasligini nahotki avvalroq payqamagan bo‘lsa? Nima sababdan ixtiyorida Oybek Bozorov va Farrux Ikromov singari tezkor futbolchilar bor paytda bu imkoniyatdan ertaroq foydalanmadi? Nahotki, o‘zbek futbolining saviyasi shu qadar sharmandali mag‘lubiyatni qabul qilarli darajada pasayib ketgan bo‘lsa?
Ha, saralashning bu davrida javobgarlik to‘liq bosh murabbiy zimmasida. Bu safar biz aynan Abramovning tushunarsiz tajribalariyu, tavakkal qarorlaridan talafot ko‘rdik...
Bevosita Saudiya Arabistoni bilan o‘yinga to‘xtaladigan bo‘lsak, unda mezbonlar har taraflama ustunlikka erishishdi. 25-daqiqada Odil Ahmedovning to‘p uchun kurashda raqibiga imkoniyatni boy berishi Sanjar Quvvatov qo‘riqlayotgan darvoza oldida xavfli vaziyat yaratilishiga olib keldi. Oqibatda, darvozabon qarshisida yolg‘iz qolgan Salmon al Faraj hisobni ochdi - 1:0. 32-daqiqada saudiyaliklar sardori o‘z «dubl»ini nishonladi.
Garchi ikkinchi bo‘limda vakillarimiz biroz faollikni oshirgan bo‘lsalarda, navbatdagi gol ham aynan termamiz darvozasiga urildi. 51-daqiqada Ali al Hassan o‘z imkoniyatidan unumli foydalanib, hisobni 3:0 ko‘rinishiga keltirdi. Uchrashuvning qolgan qismida futbolchilarimizning barcha urinishlari besamar yakunlandi va milliy jamoamiz saralashning mazkur siklini sharmandali mag‘lubiyat bilan yakunladi.
O‘zbekiston termasi o‘z guruhida 15 ochko bilan ikkinchi pog‘onani egalladi. Lekin bu ko‘rsatkich 2-o‘rin bilan keyingi bosqichga chiqish uchun yetarli bo‘lmadi va bosh jamoamiz o‘z tarixida ilk marta jahon chempionati saralashining 2-bos-qichidayoq kurashni to‘xtatdi.
Endi termamiz Osiyo kubogi-2023 musobaqasi navbatdagi saralash raundidagi ishtirok bilan kifoyalanadi.
Saudiya Arabistoni — O‘zbekiston - 3:0 (2:0)
Gollar: Salmon al Faraj (25, 33), Ali al Hassan (52).
Saudiya Arabistoni: Muhammad al Ovays, Sulton al G‘anim, Abdulla Madu, Yosir al Shahroni, Hassan at Tambakti (Muhammad al Qabrani, 78), Salmon al Faraj, Ali al Hassan (Sami an Naji, 54), Ibrohim Otayf, Xolid ash Shahri (Firas al Birakan, 64), Abdulloh G‘arib (Saud Abdulhamid, 78), Muhammad Xalil Al Ovays.
O‘zbekiston: Sanjar Quvvatov, Hojiakbar Alijonov, Rustam Ashurmatov, Odil Hamrobekov (Ikrom Aliboyev, 54), Otabek Shukurov, Odil Ahmedov (Islom To‘xtaxo‘jayev, 80), Jaloliddin Masharipov, Oleg Zoteev, Eldor Shomurodov, Vagiz Galiulin (Doston Hamdamov 54; Farrux Ikromov 80), Ibrohimhalil Yo‘ldoshev (Oybek Bozorov, 54).
Paxtakor
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
