Shveysariya termasi Yevro-2020 chorak finaligacha yetib borib, o‘z tarixidagi eng yaxshi natijalardan birini qayd etdi. Muvaffaqiyat kelib chiqishi bosniyalik bo‘lgan murabbiy Vladimir Petkovich bilan qo‘lga kiritildi. U jamoani naq 2014 yildan buyon boshqarib kelmoqda. Shu vaqt mobaynida Petkovich Bundesliga, «A» seriya va APLdan tushgan takliflarga rad javobini berdi - ammo uni hamon millionlab tomoshabinlar tanishmaydi. Quyidagi maqolada ushbu mutaxassis bilan tanishtirmoqchimiz.
Petkovich 25 yoshdaligida ota-onasi bilan Yugoslaviyadan Shveysariyaga ko‘chib o‘tdi. Barchasiga mamlakatdagi beqaror siyosiy vaziyat sabab bo‘lgandi. O‘shanda 80-yillar o‘rtalari edi, Yugoslaviya inqirozga yuz tutgan, ko‘p o‘tmay tarqalib ketgandi. «Shunchaki, futbol o‘ynash uchun qadrdon uyimni tark etdim. Hamma narsani barbod etayotgan siyosiy tizimning bir qismi bo‘lishni xohlamadim. Tinchlik va xotirjamlikni istadim, shu bois, stabil Shveysariyaga ketdim».
Dastavval Petkovich Caritas katoliklar cherkovi qoshidagi xayriya tashkilotida ishladi - parallel ravishda til o‘rgandi. U yerda boshqa yugoslaviyalik qochoqlarning moslashishlariga yordamlashdi. «Mening missiyam odamlarga ko‘mak berish ekanligini his qildim. O‘shanda Yugoslaviyadan kelgan qardoshlarimizning qulay hayot kechirishlarini ta’minlashga intildim. Hozir futbolchilarning o‘sishlari uchun harakat qilyapman».
Mavsum-2012/2013da «Lasio» bilan qo‘lga kiritilgan Italiya kubogi Petkovichning murabbiylik faoliyatidagi yagona sovrindir: uning jamoasi Rim derbisida «Roma» ustidan zafar quchgandi. Qahramonimiz tarixga nazar solarkan, shunday deydi: «O‘shanda bu g‘alabaning nechog‘li buyuk ekanligini tushunmagan ekanman. Fanatlar sovrin uchun quvonishyapti, deb o‘ylagandim. Ammo oradan ko‘p yillar o‘tdi va 26 may mening ikkinchi tug‘ilgan kunimga aylandi. «Lasio» muxlislari Italiya, Shveysariya, AQSHda kutib olishadi va o‘sha 26 may kungi muvaffaqiyat uchun rahmat aytishadi».
Petkovich «Lasio»ni bir yarim yil boshqardi va shu muddatni faoliyatidagi eng muhimi deb hisoblaydi. Nega unga shunchalik omad kulib boqdi? Buning bir sababi bor ekan: «Rafiqamni Shveysariyada qoldirdim. Shu bois, Rimda bor e’tiborim ishga qaratildi, meni hech nima chalg‘itmadi. Bu to‘g‘ri qaror edi, garchi turmush o‘rtog‘im ranjigan bo‘lsa ham. U Italiyaga borishni xohlagandi».
2014 yilning 3 yanvari. Shveysariya termasi JCH-2014dan keyin Vladimir Petkovichni bosh murabbiylikka tayinlashi haqida xabar berdi. 2014 yilning 4 yanvarida «Lasio» prezidenti Klaudio Lotito Petkovichni iste’foga chiqardi.
Petkovich keyinchalik o‘sha damlar haqida gapirgandi: «Lasio» bilan o‘rtamizda xunuk voqea ro‘y bergandi. Shveysariya sabrsizlik qilib, kutilmaganda mening tayinlovim haqida xabar berdi. Lotito bilan suhbatimiz xush kayfiyatda o‘tdi, deyish qiyin edi, u italyanchada nojo‘ya so‘zlarni aytib so‘kindi. Klaudio Yangi yil munosabati bilan menga mashina sovg‘a qilgandi. Uni qaytarishimga to‘g‘ri kelgandi».
Petkovich 8ta tilni biladi. Ularni rafiqasi bilan bahslashish natijasida o‘rgangan. Sanab ko‘ring: ingliz, italyan, fransuz, nemis, ispan, rus, bosniya va xorvat tillari. Ruschani maktabda yod olgan. Ispan tili masalasida esa quyidagilarni so‘zlab berdi: «Lilyen bilan tez-tez tortishib turardik. Bir safar u qaysidir yangi tilni o‘rgana olmasligimni aytdi. Men esa bu borada muammo yo‘qligini aytdim. Bir haftadan keyin ispan tili bo‘yicha muallimga qatnay boshladim».
Uning termasida mahalliylashtirilgan futbolchilarning ko‘pligiga izoh ham tayyor: «Agar xorijlik futbolchi Shveysariya termasida yomon o‘yin o‘tkazgan bo‘lsa - bu uning yomon o‘yin o‘tkazganini anglatadi. Hech kim uni chindan yurakdan o‘ynamaganlikda ayblamaydi. Shunaqasi ham bo‘ladi».
Hozir Shveysariya milliy jamoasida kelib chiqishi Albaniya, Dominikan, Chili, Portugaliya va boshqa mamlakatlardan bo‘lgan futbolchilar to‘p surishadi. Petkovich bundan zavqalanadi: «Tarkibingizda turli millat vakillari, turfa qarashga ega o‘yinchilarning borligi ajoyib. Hattoki, bu terma jamoa bo‘lsa ham. Nima uchun? Kimdir texnik jihatdan kuchli bo‘lishi mumkin. Kimdir ortiqcha tryuklarsiz o‘ynab, faqat natijani ko‘zlaydi. Ammo qiziqarli va yorqin jamoa shunday to‘planadi».
O‘.UMAROV tayyorladi
O‘zbekiston
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
