Fransiyalik yarim himoyachi Tyemue Bakayoko «Milan»ga qaytganidan so‘ng birinchi matbuot anjumanini o‘tkazdi.
- «Milan» o‘zgaribdimi?
- SPALga qarshi oxirgi o‘yinimni yaxshi eslayman. Afsuski, biz Chempionlar Ligasiga chiqa olmagandik, o‘shanda. Endi esa YECHLda qatnashadigan «Milan»ga qaytganimdan xursandman. Chunki bugungi jamoa men o‘ynagan paytdagisidan ancha kuchli.
- Bu yerda hamma narsani yaxshi bilasiz. Mazkur omil sizga motivasiya beradimi?
- «Milan» muxlislari bilan munosabatlarim durust. Tan olish kerak, avvaliga oramiz unchalik yaxshi emasdi, lekin keyin hammasi joyiga tushib ketdi va men ularning hurmatiga sazovor bo‘ldim.
- Pioli sizdan nimalarni kutmoqda va jamoaga boshqa yarim himoyachilaridan ko‘ra ko‘proq nima bera olasiz?
- Murabbiy bilan xotirjam gaplashdim va unga bor kuchim bilan harakat qilishimni bildirdim. Jamoa shundoq ham yaxshi ishlamoqda, men esa yoshlar bilan o‘z tajribamni bo‘lishmoqchiman.
- Paolo Maldini bilan munosabatlaringiz qanday?
- Hammasi zo‘r. Milanga kelganimda, u menga katta yordam berdi. Qiyin paytlarda doim «labbay» deb turdi. U ajoyib inson va men undan ko‘p narsa o‘rgandim.
- Bugungi «Milan» Gattuzoning «Milan»idan farq qiladimi?
- Ha, bu boshqa «Milan», fransuzlar ham ko‘p. Jamoa ham avvalgidan kuchliroq. Yangi jamoadoshlarim bilan o‘ynashni va yaxshi natijalarga erishishni sabrsizlik bilan kutyapman.
- Milanda o‘zingizni uydagidek his qilyapsizmi? Skudettoga erishishni xohlaysizmi?
- Ikki yillik sargardonchilikdan so‘ng endi shu yerda qolmoqchiman. Barcha mening ushbu klubga bo‘lgan munosabatimni biladi va o‘zimni uydagidek his qilyapman, albatta. «Milan»da o‘ynarkansiz, maksimal darajada harakat qilish talab etiladi. Iloji boricha ko‘proq sovrin yutish uchun bor kuchimni sarflayman.
- Ijarama-ijara yurish joningizga tekkandir?
- Bunday sayohatlardan keyin menga barqarorlik kerak, shuning uchun ham bu yerda uzoq vaqt qolishni xohlayman. Buni amalga oshirish uchun esa qo‘limdan kelganini qilaman.
- O‘yinga tayyormisiz?
- «Milan» kuchli yarim himoya chizig‘iga ega. Men ham o‘z hissamni qo‘shishga, har kuni bor kuchim bilan ishlashga tayyorman. Keyin, agar murabbiy qaror qilsa, maydonga chiqaman.
- Kessye haqida nima deysiz?
- Uning yonida o‘zimni yaxshi his qilyapman. U ancha o‘sibdi, har tomonlama rivojlanibdi. Umid qilamanki, u «Milan»da qoladi.
- Ibragimovich bilan gaplashishga ulgurdingizmi?
- Mashg‘ulotlar paytida biroz suhbatlashdik. Zlatan va uning faoliyatini barcha yaxshi biladi. Biz unga namuna sifatida qarashimiz va professionalligidan o‘rnak olishimiz kerak. U bilan birga o‘ynash imkoniga egaligimdan xursandman.
- Dastlabki kunlarda Pioli qo‘l ostidagi «Milan» haqida qanday fikrda edingiz?
- Jamoada atigi ikkita mashg‘ulot o‘tkazdim. Har doim murabbiyni, uning maslahat va ko‘rsatmalarini diqqat bilan tinglayman. Hozircha Gattuzoning menga aytganlaridan unchalik farqni ko‘rmadim.
- Skudettoni yutish uchun qaysi jamoalarni mag‘lub etish kerak?
- «Milan», shubhasiz, poyga yetakchilaridan. O‘tgan yili hozirgi jamoadoshlarim ikkinchi bo‘lishdi. Eng muhimi - o‘yindan o‘yinga o‘tish va albatta, raqiblar progressini tahlil qilish...
- Sizga ikkitalik tayanch yarim himoya sxemasi qulaymi yoki uchtalik?
- Qanday bo‘lmasin, shunga ko‘ra harakat qilaman, chunki men yolg‘iz emas, balki sheriklar bilan o‘ynayman. Tarkibni murabbiy tanlaydi va men qo‘limdan kelganicha harakat qilaman.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
