Muhammad Saloh 2017 yilda “Liverpul” a’zosiga aylanadi. O‘shanda klub muxlislarining hech biri hali misrlik hujumchining nimalarga qodir ekanligini bilmas edi. “Roma”dagi faoliyati bilan tanila boshlagan futbolchining o‘zi ham, Angliyaga qaytib, haqiqiy yulduzga aylanishini hatto tasavvur ham qilmagan bo‘lsa kerak. Bugungi kunga kelib, Saloh dunyodagi istalgan hujumchi havas qilishi mumkin bo‘lgan natijalar qayd etmoqda. U aynan “Liverpul” futbolchisi sifatida bir-biridan ajoyib va hayratlanarli statistikaga erisha oldi. Quyida Salohning eng yaxshi natijalarining ayrimlariga nazar tashlaymiz.
APL tarixida bir mavsumda 30ta va undan ko‘p gol urgan birinchi Afrika qit’asi vakili
Angliya futboli tarixida ko‘plab fantastik o‘yin ko‘rsatgan afrikalik futbolchilar bor. Bunga misol qilib, Didye Drogba, Nvanku Kanu, Yahyo Ture, Yakubuni keltirishimiz mumkin. Ushbu ro‘yxat yana uzoq davom etadi. Ularning hammasi Angliyadagi faoliyati chog‘ida hayratlanarli natijalarga erishgan. Biroq hech biri Salohning 2017-2018 yilgi mavsumda qayd etgan 30talik dovonidan osha olmagan. Muhammad esa nafaqat bu natijaga erishgan, balki ikkita golga o‘zib ham ketgandi.
“Liverpul” tarixida uchta mavsumda ketma-ket 20tadan ko‘p gol urgan ilk o‘yinchi
Mersisaydliklar tarixida Salohgacha hali hech bir futbolchi uch marta qatorasiga 20 tadan ko‘proq gol bilan mavsumni yakunlamagan edi. Misr terma jamoasi a’zosi esa 2020-2021 yilgi mavsum yakunida buni uddalaydi. Hatto u, bu natijaga bir yil ilgari ham erishishi mumkin edi, ammo Muhammad “Liverpul”dagi dastlabki yilida 19 ta gol bilan mavsumni yakunlashga majbur bo‘lgan.
APLning bir mavsumida eng ko‘p gol urgan futbolchi (32)
Bu borada ingliz futboli tarixida Luis Suares (2013-2014), Krishtianu Ronaldu (2007-2008) hamda Alan Shirer (1995-1996) yetakchilik qilayotgan edi. Ularning hammasida bir mavsumda 31 tadan gol mavjud bo‘lgan. Muhammad ushbu trioning rekordini butunlay buzib tashladi: u 2017-2018 yilgi mavsumda 32ta gol urishga muvaffaq bo‘ldi. Bunda yana bir jihatga e’tibor qaratish kerak: Saloh 32 ta gol urgan mavsumida 24 ta bahsda raqiblar darvozasiga yӯl topa olgandi. Bu esa o‘ziga xos yana bir rekord sanaladi.
Aslini olganda, bu borada Shirer va Endi Koulda yaxshiroq natija qayd etilgan. Ular uzoq o‘tmishda bir mavsumda 34 tagacha gol ura olishgan. Biroq u paytlarda mavsum 38 ta turdan emas, balki 42 turdan iborat bo‘lardi. Salohda yana to‘rtta ko‘p o‘yin o‘tkazish imkoni bo‘lganida, shubhasiz, gollari soni 32 tadan oshardi. Lekin, baribir 38 talik tizimda mutlaq rekordchi Salohdir.
Angliyada Krishtianu Ronalduni ortda qoldira olgan futbolchi
Ronaldu bir paytlar “MYU”ni dunyodagi eng yaxshi futbolchilar qatorida tark etgan. U Angliyadagi oltita mavsumi davomida jami 118 ta golga mualliflik qiladi. Saloh esa bu natijaga erishish uchun to‘rt mavsum sarflagan, xolos. Mos ravishda kamroq o‘yinda ham ishtirok etgan. Ushbu ikki futbolchini solishtirish uchun faqatgina APLdagi gollarini hisobga olsak, “Old Trafford”dagi ilk davrida Ronaldu uchun 84 ta gol urishga 196 ta uchrashuv kerak bo‘lgan. Saloh esa bu ko‘rsatkichga 133 ta APL bahsida erishdi. Hatto u Ronaldudan bitta golga oshib ham ketdi (133/85).
“Liverpul” tarixidagi APLning dastlabki 100ta uchrashuvida eng ko‘p gol muallifi
Muhammad Saloh “Liverpul” safida APL doirasida o‘zining 100-yubiley o‘yinini 2020 yilning mart oyida o‘tkazgan edi. U o‘shanda mersisaydliklar tarixidagi 70-golini darvozaga yo‘llay olgan. U bu orqali avvalgi eng yaxshi natija muallifi bo‘lgan Fernando Torresni butunlay ortda qoldirib ketadi. Torres bu borada 63 ta golga egalik qilardi.
Angliya futboli tarixida bundan ham yaxshiroq natija ko‘rsatganlar mavjud. Biroq ular bu ishni turnir Premyer-liga deb atalishidan ilgari bajargan. Ulardan biri “Liverpul”ning afsonaviy hujumchisi Rojer Xantdir. U Liganing 100ta bahsida 72 marta raqib darvozasini ishg‘ol eta olgan. Yangi tarixda esa baribir Saloh tengsizdir.
YECHL yarim finalida 2 ta gol va 2 ta uzatma ijro etgan tarixdagi ikki futbolchidan biri
Ko‘pincha muxlislar Salohni katta-katta bahslarda maydonda ko‘rinmay qolishda ayblashadi. Ammo amalda ham shundaymikin? Har holda, u YECHL yarim finalida 2ta gol va 2ta assist hosil qila olgan tarixdagi ikkita futbolchining biri sanaladi. Muhammad buni 2018 yilning aprel oyida, “Roma” qarshi 5:2 hisobidagi g‘alabali o‘yinda ijro etgan. O‘shanda italyanlar atigi 60 daqiqa ichida taslim etilgan va maydonni yig‘lab tark etishgan edi.
“Liverpul”ning barcha davrlardagi eng yaxshi Chempionlar ligasi to‘purari
Misrlik futbolchi 2017 yilda, atigi bundan to‘rt yil oldin jamoaga kelgan bo‘lsa ham, allaqachon klubning YECHLdagi eng yaxshi hujumchisiga aylana oldi. Saloh yaqindagina “Atletiko Madrid”ga qarshi bahsda o‘zining 31-golini kiritdi va bu boradagi natijasini yanada yaxshilab oldi. Ushbu gol Muhammadning Jerrarddan o‘tib ketishiga imkon berdi. Unga yevrokuboklarda 31ta gol urish uchun atigi 48 ta o‘yin kerak bo‘ldi, xolos. Bu Stivennikidan 39 taga kamroq degani (Stiven Jerrard 87ta bahsda 30ta gol ura olgan).
APL tarixida 100 golga eng tez erishgan “Liverpul” hujumchisi
Mavsumning “Brentford”ga qarshi bahsida Muhammad Saloh APLda “Liverpul” uchun o‘zining 100-goliga mualliflik qiladi. U bu orqali avvalgi klub rekordchisi Rojer Xantdan o‘tib keta oldi. Saloh 100talik dovonga yetish uchun 151ta uchrashuv sarflagan. Tarixda faqat uchtagina futbolchi 100 gol urish uchun Salohdan kamroq o‘yin sarflagan. Bular: Alan Shirer (124), Xarri Keyn (141) hamda Serxio Aguero (147).
APL tarixida eng ko‘p gol urgan afrikalik futbolchi
Shu kungacha Angliya milliy chempionatidagi eng yaxshi natijaga ega afrikalik hujumchi Didye Drogba edi. Ammo yaqinda, Muhammad undan o‘zib ketishga muvaffaq bo‘ldi. APLning 9-turidan o‘rin olgan “Manchester Yunayted” va “Liverpul” o‘rtasidagi bahsda qayd etilgan 0:5 hisobidagi natijadan hammaning xabari bor. Salohning ushbu o‘yinda qayd etgan xet-trigi esa Drogbaning 104ta gollik rekordini yangiladi. Endilikda Saloh hisobida 107 gol mavjud va u bu borada Afrika qit’asining haqiqiy faxriga aylandi. Uning jamoadoshi Sadio Maneda ham natijalar yomon emas. Shunday ekan, bundan buyon ikki jamoadoshning gollar borasidagi kurashini ko‘rsak ajab emas.
Jaloliddin ISMATOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
