"Vulverxempton" futbolchisi Adama Traorening "Barselona"ga yo‘l olishi, APLning eng tezkor futbolchisi bo‘lishga katta imkoniyat yaratdi. Endilikda, boshqa o‘yinchilar tezlik borasida Traoredan qolgan taxtni o‘ziniki qilishga harakat qilib ko‘rishadi. Ispaniya terma jamoasi a’zosi Angliyadagi eng tezkor futbolchisi sifatida tan olingan edi. Hozir u yo‘q. Xo‘sh, unda kim yetakchiga aylandi. Quyida Angliya Premyer-ligasining eng tezkor o‘nta futbolchisini sanab o‘tamiz.
10. Muhammad Saloh
"Liverpul" futbolchisi yaqindagina Afrika Millatlar kubogidan vise-chempion bo‘lib qaytgan edi. U tezlik borasida "Brentford" futbolchisi Yoan Vissa bilan to‘qnash keldi. Ammo umumiy statistika Muhammad Saloh 90 foizlik tezlikka ega ekanini ko‘rsatdi. Vissada bu ko‘rsatkich 88 ga teng. Saloh o‘z tezligidan juda ham unumli foydalana oladi. U shuningdek, dunyoning eng yaxshi chap-oyoq futbolchilaridan biridir. Uning bu mavsumda raqib darvozasi tomon yo‘llagan zarbalari soni 80 tani tashkil etadi. U bu borada Krishtianu Ronaldudan ham ustunlik qilmoqda. Joriy mavsumda APLning "Oltin butsa"siga eng asosiy da’vogar sifatida e’tirof etilayotgan misrlik yulduz tezlik borasida Adama Traore ketgach, kuchli o‘ntalikdan joy oldi. Uning hisobida hozirga qadar 16 ta gol mavjud.
9 Riko Genri
Garchand o‘yindagi mahsuldorlik borasida 74 foiz ko‘rsatkichga ega bo‘lsada, Riko APLdagi eng yaxshi qanot himoyachilaridan biri sanaldi. Uning asosiy ishi o‘z qanoti bo‘lmish chap tomonni "yondirish"dan iborat. Ingliz futbolchisi esa bu ishni o‘zining yuqori tezligiga tayanib ijro etmoqda. 24 yoshli "Brentford" a’zosi tezlik borasida 91 foizlik ko‘rsatkichga ega. Bu esa tezlik va shiddatga quriladigan "Brentford"ning 3-5-2 taktik sxemasiga aynan mos keladi. Genri bu mavsumda o‘rtacha har bir o‘yinda 0,9 marta dribling ishlatgan. Vazifasi asosan jarima maydonchasi ichiga to‘p yetkazib berish bo‘lgan futbolchining hisobida hozirga qadar ikkita gol bor. Ular noyabr oyida "Nyukasl" hamda "Norvich" darvozasiga kiritilgan edi.
8. Rafinya
"Lids Yunayted" futbolchisi bir necha yildan beri APLni o‘zining janubiy amerikaliklarga xos bo‘lgan layoqati bilan boyitib kelmoqda. Uning sprinterlik mahorati 91,5 foizga baholangan. Rafinyaning maydondagi yuqori mahsuldorligi sabab, uni jahon darajasidagi futbolchi deyish mumkin. Bekorga u uchun ko‘plab top-klublar og‘iz solib turgani yo‘q. Chunki u charchoq bilmas mashina kabi harakatlanadi. Uning maydondagi tezligi soatiga 21 kilometrni tashkil etadi. Braziliyalik o‘tgan mavsum davomida har bir o‘yinda o‘rtacha 2,4 ta dribling ijro etgan.
7. Rayan Freyder
"Vest Xem"ning Rayan Frederiks deb ataladigan futbolchisi top tezligi 92 foizni tashkil etadi. Bu degani yuqori darajali tezkorlikdir. Ha, afsuski, shunday tezlikka ega futbolchi bu mavsumda deyarli maydonga tushirilmayapti. Chunki jamoa ustozi Devid Moyes uning o‘rniga Vladimir Soufal hamda Ben Jonsonlarni afzal ko‘rgan. Rayan hozirga qadar atigi ikkita bahsda, 22 daqiqa maydonda harakat qildi. Himoyachi 2018 yilda "Fulxem" bilan APLga ko‘tarilgan edi. U shundan so‘ng, eng tezkor o‘yinchi sifatida e’tirof etila boshladi. Xususan, uning FIFA kartasidagi ko‘rsatkichi 86 ni tashkil etadi.
6. Leon Beyli
Yozda "Bayer Leverkuzen"dan sotib olingan vinger ro‘yxatimizning oltinchi o‘rniga joylashtirildi. Leon bu mavsumda jarohati sabab faqatgina 9 ta bahsda ishtirok eta oldi. Ammo mavsum boshida "Aston Villa" uchun bitta gol hamda bitta golli uzatma amalga oshirgan. Futbolchining dribling qobiliyati juda ham kuchli. Agarda jarohatlar halal bermaganida Leon bundan ham yuqori o‘rinda bo‘lardi.
5. Kayli Uoker
Angliya terma jamoasi a’zosi bir necha yillardan buyon APLning eng tezkor futbolchilaridan biri bo‘lib kelmoqda. Garchand 31 yoshni qarshi olgan bo‘lsada, Uoker jismoniy tomondan yetuk futbolchi sanaladi. U 2020 yilning iyun oyida APLda 23,49 km/soat tezlikka chiqib, o‘ziga xos tarix yoza olgandi. Uning tezlik darajasi esa 94 foizga baholangan. Futbolchining jarohatidan forig‘ bo‘lib jamoaga qaytishi, "Man Siti"ni kuchaytiradi, albatta.
4. Pshemislav Plaxeta
Polshalik vinger Plaxeta "Norvich"ga o‘tgan yilning boshida kelib qo‘shilgan edi. Ha, uning olib kelinishi, jamoasiga ko‘p ham foyda keltirmagan bo‘lishi mumkindir, ammo Plaxeta tezlik borasida ro‘yxatning old o‘rinlarida qayd etiladi. Futbolchi 94 foiz tezlik ko‘rsatkichiga ega. Plaxeta bu mavsumda jami 7 bahsda, 368 daqiqa harakat qilgan.
3. Patson Daka
Yozda "tulkilar" safiga "Zalsburg"dan olib kelingan Zambiya terma jamoasi a’zosi, APLga tezda moslashib keta oldi. Uning "Lester" safida amalga oshirgan eng katta ishi Yevropa ligasida edi. O‘shanda Daka "Spartak Moskva" darvozasiga to‘rtta gol kiritib, jamoasining g‘alabasini ta’minlaydi. APLda Daka hisobida so‘nggi uchta o‘yinda uchta gol bor. U yettita golda bevosita ishtirok etgan. Hujumchining tezligini qanday ekanini hamma yaxshi biladi.
2. Ismaila Sarr
Afrika chempioni bu ro‘yxatda ikkinchi o‘rinda qayd etiladi. "Uotford" hujumchisida 94 foizlik ko‘rsatkich mavjud. Ammo u bu orqali g‘oliblikka da’vo qila olmaydi. Sarrga bir qator top-jamoalardan takliflar mavjud. Uning hisobida esa 12 ta o‘yinda 5 ta gol bor. Senegallikning dribling foizi 57,9 ga teng bo‘lib, har bir o‘yinda o‘rtacha 1,8 tani tashkil etadi.
1. Deniyel Jeyms
Ro‘yxatimiz boshida "Lids"ning uelslik futbolchisi turibdi. Deniyel mavsum boshida "Manchester Yunayted"dan xarid qilingandi. U hozirga qadar 19 marta APL o‘yinlarida ishtirok etib, 2 ta gol va shuncha assist ijro etgan. Jeyms jamoadoshi Rafinya singari juda ham mahsuldor o‘yinchi sanaladi. Sobiq "Svonsi" a’zosi unchalik ham gavdali bo‘lishiga qaramay, 95 foizlik tezlik ko‘rsatkichiga ega. Bu esa Ismaila Sarrnikidan yaxshiroqdir. Shunday qilib, APLning eng tezkor futbolchisi Adama Traoredan keyin Deniyel Jeyms bo‘lib turibdi.
Jaloliddin ISMATOV tarjimasi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
