O‘zbekistonlik legionerlarning o‘tgan haftadagi faoliyatiga nazar tashlaymiz.
S.Arabistoni. «Al-Nasr» mamlakat chempionati 21-turida «Al-Batin» maydonida hamyurtimiz Jaloliddin Masharipovsiz o‘ynab, 4:3 hisobida g‘alaba qozondi. Yangilik shuki, UPL nashri xabariga qaraganda, O‘zbekiston milliy jamoasining 28 yoshli hujumkor yarim himoyachisi yozda «Al-Nasr»dan Angliyaning «Xall Siti» klubiga o‘tishi mumkin. Ta’kidlanishicha, ayni payt Chempionship turnir jadvalining 20-o‘rnida borayotgan klub bosh murabbiyi Shota Arveladze sobiq shogirdini o‘z yonida ko‘rish niyatida. Ma’lumot uchun, transfermarkt portali talqiniga ko‘ra, Masharipovning transfer bahosi 3 million yevroga teng.
Belarus. Belarus chempionatining yangi mavsumiga hozirlik ko‘rayotgan «Energetik-BGU» navbatdagi o‘rtoqlik uchrashuvida Makslin» klubini 7:1 hisobida dog‘da qoldirdi. «Talabalar» safidagi hamyurtimiz Bobur Abduxoliqov bu uchrashuvda o‘z hisobiga 1ta gol yozdirib qo‘ydi. BATE esa «Shaxtyor» (Petrikov)ga qarshi kechgan o‘rtoqlik uchrashuvida 2:2 hisobini qayd etdi. O‘yinni Borisov jamoasi boshlang‘ich tarkibida boshlagan yarim himoyachi Shahboz Umarov 37-daqiqada o‘rnini zaxira vakiliga bo‘shatib berdi. Bunga futbolchi va murabbiy o‘rtasidagi kelishmovchilik sabab bo‘lgani aytilmoqda. To‘g‘ri, Umarovning o‘zi hech qanday muammo yo‘qligini bildirdi.
Moldova. «Sherif» Portugaliyaning «Braga» jamoasiga qarshi kechgan YEL 1/16 finali birinchi o‘yinini 2:0 hisobida o‘z foydasiga hal qildi. Jamoa hujumchisi Jasur Yaxshiboyev Tiraspolda bo‘lgan uchrashuvda 89 daqiqa faol harakatlanish barobarida birinchi bo‘lim oxirida penalti ishladi. «Sherif» aynan shu vaziyatda hisobni ochdi va keyinchalik ustunlikni mustahkamladi.
Italiya. Kadrlar masalasida muammolar girdobida qolgan «Roma» Italiya «A» seriyasi 26-turida «Verona»ni qabul qilib, mag‘lubiyatdan zo‘rg‘a qutulib qoldi - 2:2. Oldinroq «bo‘rilar» hujumchisi Eldor Shomurodovda koronavirus aniqlangani aytilgandi va tabiiyki, hamyurtimiz «Verona»ga qarshi bahsda ishtirok etmadi.
Eron. Aziz Amonov asosiy tarkibda maydonga tushib, 60 daqiqa harakatlangan o‘yinda uning klubi - «Istiqlol» navbatdagi g‘alabani rasmiylashtirdi. Gap Eron Pro-ligasi 18-turidan o‘rin olgan «Traktorsozi»ga qarshi safar o‘yini haqida ketmoqda. Unda tehronliklar yagona gol evaziga 3 ochko olishdi. Aytish o‘rinli, shu bilan «Istiqlol»ning mag‘lubiyatsiz seriyasi aynan 18ta o‘yinga yetdi.
BAA. Mamlakat chempionati 16-turi doirasidagi «Al-Vasl» - «Sharja» o‘yinida hisob ochilmadi. Mehmon jamoa yarim himoyachisi Otabek Shukurov mazkur bahsda doimgidek to‘liq vaqt harakatlandi. «Sharja» ayni payt 30 ochkoga ega va turnir jadvalining 4-qatorida bormoqda. Aziz G‘aniyev esa «Shabab Al-Ahli»ning «Al-Aruba»ga qarshi uy uchrashuvi (3:1)da qatnashgani yo‘q.
Qatar. «Yulduzlar ligasi» 19-turidan o‘rin olgan «Umm-Salal» - «Al-Sayliya» uchrashuvi mehmon jamoaning minimal hisobdagi g‘alabasi bilan yakunlandi. Yaqinda «Sayliya» safiga qo‘shilgan Doston Hamdamov bu safar bir bo‘lim o‘ynadi va tanaffusda almashtirildi. Shu bilan hamyurtimiz jamoasining ochkolari soni 11taga yetdi, biroq u hamon turnir jadvalining oxirgi pog‘onasida.
Qozog‘iston. O‘zbekiston futzal terma jamoasi darvozaboni Ravshan Eliboyevning yangi klubi - «Kaspiy» Qozog‘iston chempionati 15-turida mamlakatning 18 karra chempioni «Qayrat» mehmoni bo‘ldi. Aytish o‘rinli 1:1 hisobida yakunlangan dastlabki o‘yinda boshlang‘ich tarkibga kirgan hamyurtimiz ko‘plab «seyv»lar ko‘rsatib, jamoasi joniga oro bo‘ldi. «Kaspiy» ayni payt chempionat turnir jadvalida 3-o‘rinni egallab turibdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
