Yaqinda Paragvayning «Guarani» yoshlar jamoasi Ekvadorda o‘tkazilgan 20 yoshgacha bo‘lgan futbolchilar o‘rtasidagi Libertadores kubogida 2022 yildagi dastlabki yutug‘ini qo‘lga kiritdi. Olimpiada-2004 kumush medali sohibi Aureliano Torres shogirdlari murakkab guruhda Argentina, Ekvador va Chilidan tashrif buyurgan tengdoshlaridan ustun kelishdi. Yarim finalda mezbonlarning yana bir vakili - «Independyente del Valye»ga yengilgan bo‘lsalarda, Venesuelaning «Karakas» klubini mag‘lubiyatga uchratib, bronza medallarini o‘zlariniki qilishdi. Sports.ru shu bahona «Guarani»dagi iqtidorli futbolchilar bilan tanishtirishni ma’qul ko‘rdi.
Ehtimol, «aborigenlar» bosh murabbiyi Fernando Xubero ushbu yoshlarga hozirdanoq imkon bersa bo‘laverar. Garchi «aurinegroslar» kattalar o‘rtasidagi Libertadores kubogida «Atletiko Mineyro»ni yagona gol evaziga yengishgan, javob uchrashuvidan oldin kichik ustunlikka erishgan bo‘lsada, ularning ichki arenadagi starti qoniqarli chiqmadi. Dastlabki to‘rt turtdan so‘ng «Guarani» ikki ochko bilan turnir jadvali quyi pog‘onalaridan joy olib turibdi, boz ustiga, Xubero shogirdlari gollar hisobini 4-tur doirasidagi «Resistensi» bilan bahs (3:3)da ochishdi.
VIKTOR RIVAROLA (2002 yil 16 mayda
tug‘ilgan), hujumkor yarim himoyachi|hujumchi
«Rivagol» «Guarani» tizimiga futzal orqali o‘tgan. Viktor ushbu sport turidan jamoaviy o‘yin, universallik va to‘pni tanasi orqali to‘sish kabi xususiyatlarni o‘zlashtirgan. Rikelme, Ozil va Neymarning o‘yinlariga ishtiyoqmand Rivarola 2021 yili Paragvayning U-19 chempionatida to‘purarlik salohiyatini ham namoyish etib, 14ta gol bilan faqat klubdoshi Romeo Benitesdan ortda qoldi, xolos.
ROMEO BENITES (2002 yil 14 noyabr), hujumchi
Fernando Xubero «Guarani»ga ilk bor 2012 yilda sport direktori sifatida kelgan, bir yildan keyingina murabbiylik faoliyatini boshlagandi. Qatardagi ASPIRE akademiyasida tajriba orttirgan kataloniyalik mutaxassis klubning bolalar-o‘smirlar sektorini qayta shakllantirdi, «aborigenlar»ning barcha yosh toifasidagi jamoalarini tajovuzkor 4-2-2-2 sxemasiga o‘tkazdi, ushbu konveerdan hujumkor futbolchilar chiqishini yo‘lga qo‘ydi. O‘zgarishlar samarasi o‘laroq, Robert Roxas, Rodey Redes, Ramon Martines va boshqa ko‘plab klub tarbiyalanuvchilari chetga sotildi. Hozir ham «Guarani»da salohiyatli hujumchilar bisyor, ular orasida U-19 jamoasi mergani Romeo Benites ham bor. Bu yigitcha - tezkor, yengil harakatlanadigan forvard, ofsayd chegarasida o‘ynaydi, yakkama-yakka kurashda raqib himoyachilari va darvozabonlariga haqiqiy boshog‘riq.
RENE RODRIGES
(2002 yil 13 yanvar), markaziy himoyachi
Iqtidorlar ro‘yxatini mudofaa vakillarisiz tasavvur qilish mushkul. Rene yoshlar o‘rtasidagi Libertadores kubogida barcha besh uchrashuvda qatnashdi, zamonaviy markaziy himoyachilarga xos sifatlari, o‘yinni yaxshi o‘qiy olishi, aniq birinchi pas hamda hujumni boshlashini namoyish etdi. Xususan, Rodriges «Nyuellz Old Boyz» darvozasiga g‘alaba goli urilishida qatnashdi: Renening uzun uzatmasidan so‘ng to‘pni Rivarola qabul qilib, so‘ngra Segoviya-ga golli pas berdi. Shuningdek, «Universidad» darvozasiga urilgan to‘rtta golning ikkinchisi ham paragvayliklarning qarshi hujumidan so‘ng urildi, bu hujum esa aynan Rodrigesning to‘pni olib qo‘yishidan so‘ng boshlangandi.
MILSIADES ADORNO (2005 yil 27 yanvar), hujumchi
Bugungi ro‘yxatimizdagi eng yosh va tez rivojlanayotgan futbolchi. O‘tgan yili Adorno U-16 jamoasida o‘ynagan, garchi «aborigenlar»ni chempionlik sari yetaklay olmagan bo‘lsada, 16ta gol bilan jamoaning eng yaxshi to‘purariga aylandi va Ekvadordagi turnirga chaqiruv oldi. Mazkur musobaqada ham baquvvat, bo‘sh hududlarga ochilish ustasi, ko‘pincha bir urinishda vaziyatlarni golga aylantirgan Adorno raqiblar darvozasini uch bor ishg‘ol qilib, turnir merganlaridan biriga aylandi. Aynan uning «Universidad de Konsepsyon» bilan o‘yinda urgan ikki goli paragvayliklarni yarim finalga olib chiqdi - «Guarani»dan tashqari «Nyuellz Old Boyz» va «Orense» ham 6 ochkodan jamg‘ardi, lekin Aureliano Torres jamoasi urilgan va o‘tkazib yuborilgan gollari farqiga ko‘ra keyingi bosqichga chiqdi. Agar Adorno o‘sish tempini pasaytirmasa, uni nafaqat «Guarani» asosiy jamoasida ko‘ramiz, balki yoshlar o‘rtasidagi LKdan ham mashhurroq bo‘lgan musobaqa - iqtidorlar yarmarkasi hisoblangan 2023 yilgi yoshlar o‘rtasidagi Janubiy Amerika chempionatida ham ko‘rishimiz mumkin.
MATIAS SEGOVIYA (2003 yil 4 yanvar), hujumkor yarim himoyachi
Yuqorida nomi qayd etilgan futbolchilar singari, Segoviyaning nomi ham Paragvay tashqarisida hozircha mashhur emas, ammo o‘z yurtida uch yildan buyon e’tibor markazida. Mati o‘zini ilk bor 2019 yili Braziliyada o‘tkazilgan jahon chempionati-U17da namoyon etgandi. O‘sha mundialda Meksika (0:0), Italiya (2:1) va Solomon orollari (7:0) termalariga guruhda raqiblik qilgan «albirroxita» 7 ochko jam-g‘arib, «pley-off»ning birinchi raundida Argentinani ham yengdi (3:2). Chorak finalda esa Niderlandiya jamoasiga 1:4 hisobida yutqazdi. 16 yoshli Segoviya paragvayliklarning Okeaniya vakillari darvozasiga urgan 7ta golidan biriga mualliflik qildi, janublik qo‘shnilarga qarshi bahsda 0:2 ko‘rinishida yutqazishayotganda mas’uliyatni o‘z zimmasiga olib, raqib himoyachisi Lautaro Kanoning avtogol qayd etishiga sababchi bo‘ldi. O‘sha 2019 yilda u Paragvay Primerasida debyutini nishonladi. Joriy yilda esa yoshlar o‘rtasidagi LKda «gol}pas» tizimida 4 ochko jamg‘argan Segoviya turnir ramziy termasidan joy oldi.
Matias yarim himoyaning istalgan pozisiyasida o‘ynay oladi, maydonni va sheriklarini yaxshi ko‘ra oladi, to‘pni shu qadar faol nazorat qiladiki, himoyalanayotganlar qoida buzmay to‘pni olib qo‘yishda juda qiynalishadi. Ammo Segoviya intizomini to‘g‘rilash borasida hali qiladigan ishlar bor. «Independtyente del Valye»ga qarshi bahsning ikkinchi bo‘limida hissiyotlarini jilovlay olmagan vunderkind dastlab o‘z darvozasi oldidan to‘pni uzoqlashtirishda xavfli harakat qildi, 79-daqiqada esa raqibini tepgani uchun qizil kartochka oldi. Natijada, yosh «aborigenlar» bronza medallarini usiz qo‘lga kiritishdi.
Umuman, «Made in Guarani» o‘ziga xos savdo belgisiga aylanib qoldi - so‘nggi taqvim yilining o‘zida «aborigenlar» maktabidan chiqqan markaziy yarim himoya vakillari Xorxe Morel va Xose Florentin xorijga, aniqrog‘i, Argentina chempionatiga yo‘l olishdi. Yaqin kelajakda Segoviya bilan ham shunday hol kuzatilishi mumkin. «Fevral oyida Matias bo‘yicha ikkita taklif oldik - biri Yevropa, biri MLS klubidan», - dedi «Guarani» sport direktori Akosta.
JAHONGIR tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
