InterFUTBOL gazetasizning 29 mart kuni nashrdan chiqqan 25 (1929)-sonida o‘tgan asrning 80-yillari yorqin nur sochgan sobiq ittifoq futbolini e’tirof etib, o‘sha vaqt yulduzlarini eslagan edik. Bugun hukmingizga o‘sha fotojamlanmaning ikkinchi qismini havola etishni lozim topdik. Birinchi qismda asosan Kiyev «Dinamo»si vakillari haqida so‘z borgandi, endi navbat «Spartak» (Moskva) va boshqa klublarni buyuklik darajasiga ko‘targan futbolchilarga. Marhamat...
Vagiz XIDIYATULLIN
O‘sha vaqt: «Spartak» himoyachisi
Hozir: 63 yosh, faxriylar jamoasi a’zosi
«Spartak»ning afsonaviy himoyachisi va Yevro-88 kumush medali sovrindori futbolchilik faoliyati davom etayotgan vaqtdayoq o‘zini murabbiylikka tayyorlagan. Deylik, o‘tgan asrning 90-yillari o‘rtalarida Fransiyada maxsus kurslarni tamomladi. Biroq Xidiyatullin yangi sohada muvaffaqiyatga erisholmadi, baribir. Yakunda u o‘zini kasaba uyushmasi harakatiga bag‘ishladi. Xullas, 20 yil davomida Rossiya futbolchilar va murabbiylar kasaba uyushmasini boshqargan Vagiz shundan so‘ng nafaqaga chiqdi. Muhimi, sobiq himoyachi hozirgacha faxriylar jamoa safida ko‘rinish bermoqda.
Igor BELANOV
O‘sha vaqt: «Chernomores», «Dinamo» K. va «Borussiya» M. hujumchisi
Hozir: 61 yosh, Ukraina futbol assosiasiyasi Professional qo‘mitasi raisi
«Oltin to‘p» sohibi va sobiq ittifoq futbolining eng sermahsul hujumchilaridan biri butsalarini mixga ilgach, salohiyatini ko‘p joylar va turli sohalarda sinab ko‘rdi. Xususan, yangi asr boshida Shveysariyaning «Vil» klubi prezidenti lavozimida ishladi. Kamtarin jamoa Belanov boshqaruvi payti mamlakat kubogini qo‘lga kiritdi. Igor shundan so‘ng 2010 yili siyosatga yuzlandi: Odessada «Rodina» partiyasidan deputatlikka saylandi, ma’lum vaqt shahar kengashi jismoniy tarbiya va sport bo‘limi boshlig‘i vazifasini bajardi. Keyin Odessada shaxsiy maktab ochdi, mini-futbol turnirlarini yo‘lga qo‘ydi. 2018 yildan esa UFAda professional futbolni strategik rivojlantirish bilan shug‘ullanmoqda.
Sergey ALEYNIKOV
O‘sha vaqt: «Dinamo» Mn. va «Yuventus» yarim himoyachisi
Hozir: 60 yosh, FIFA instruktori
Mavsum-1982da Minsk «Dinamo»si bilan chempionlikni nishonlagan Belarus futboli afsonasi 90-yillar boshida Italiyaga yo‘l oldi. Aleynikov murabbiylik faoliyatini ham aynan Apennin orolida boshladi. Ya’ni avvaliga «Anani Fontana» va «Pontederra»da ishlagan sobiq yarim himoyachi orada 1 yil Rossiyaning «Torpedo-Metallurg» va «Vidnoye» klublarini shug‘ullantirdi, keyin Italiyaga qaytib, navbati bilan «Lechche» akademiyasi hamda sobiq jamoasi «Yuventus»da faoliyat yuritdi. Italiya quyi divizionlaridan biri ishtirokchisi «Kras» va «Daynava» (Litva)dagi ish ham Aleynikovga katta yutuq keltirgani yo‘q. Xullas, murabbiylikda o‘zini ko‘rsatolmagan Minsk «Dinamo»si faxri hozirda Lechche shahrida istiqomat qilib, mahalliy bolalarni shug‘ullantirmoqda. U shuningdek, FIFA instruktori sifatida yosh murabbiylar uchun seminarlar olib boradi.
Oleg KUZNESOV
O‘sha vaqt: «Desna» va «Dinamo» K. himoyachisi
Hozir: 58 yosh, Ukraina U-17 termasi murabbiyi
Kiyev «Dinamo»si tarixida yorqin iz qoldirgan sobiq himoyachi deyarli 25 yildan buyon murabbiylik qilmoqda. Kuznesov bu orada Kiyevning SSKA, «Arsenal» va «Dinamo» klublarini shug‘ullantirdi, 2002 yili Ukraina milliy jamoasi shtabiga qo‘shildi, JCH-2006da ishtirok etdi. 2008 yili esa Oleg Bloxinga «Moskva»ni boshqarishga yordam berdi. Shundan so‘ng Ukraina o‘smirlar termasi boshqaruvini qo‘lga olgan Kuznesov hozirga qadar 3ta avlod jamoasi bilan ishlashga ulgurdi.
Vasiliy RAS
O‘sha vaqt: «Dinamo» K. va «Espanyol» yarim himoyachisi
Hozir: 60 yosh, ekspert
JCH-86da Fransiya termasi darvozasiga urilgan afsonaviy gol muallifi faoliyatini Vengriyaning «Ferensvarosh» klubida yakunlagach, darhol biznesga bosh suqdi. Aniqroq aytsak, «Laslo Ras» kompaniyasi tijorat direktori lavozimida ishladi, tez orada polietilen ishlab chiqarishga mo‘ljallangan yangi firmaga asos soldi: «Ras va o‘g‘illari». Biroq futbolsiz yurolmadi, chog‘i, 1996 yili «Ferensvarosh»ga murabbiy sifatida qaytdi. Vasiliy shundan so‘ng «Zoltan Varga» shtabiga qo‘shildi, Kiyev «Dinamo»sida Yojef Saboga assistentlik qildi, «Obolon»ni mustaqil boshqardi. 2011 yili salomatligida yuzaga kelgan muammolar tufayli murabbiylik bilan xayrlashgan Ras hozirda Kiyevda yashab, Ukraina futboli eksperti sifatida chiqish qilmoqda.
Sergey GOSMANOV
O‘sha vaqt: «Dinamo» Mn. yarim himoyachisi
Hozir: 62 yosh, AQSHda avtobus haydovchisi
Minsk «Dinamo»sida katta rol bajargan Gosmanov faoliyatining oxirgi 2 mavsumida «Minnesot Tander» (AQSH) sharafini himoya qildi va o‘sha yerda muqim yashab qoldi. Turmush o‘rtog‘i gimnastika zalini ochgan bo‘lsa, ikki o‘g‘li Amerika maktabida tahsil olish barobarida futbolchi bo‘ldi. To‘ng‘ich o‘g‘li MLSda ham o‘ynadi, ammo jarohatlar ortidan butsalarini mixga ildi. Kichik o‘g‘li esa Minnesot kolleji yulduzi darajasiga chiqib, «Nyu-Ingland Revolyushn»dan taklif oldi, ammo o‘qish-bilim olishni ma’qul ko‘rdi. Sergey Gosmanov ham Amerika futbolida o‘z joyini topolmadi va bir necha yildan buyon avtobus haydovchisi sifatida ishlamoqda.
R.IBROHIMOV
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
