Yevropadagi futbol mavsumi laureatlari xususidagi hikoyamizni Fransiya chempionati sharhi bilan davom ettiramiz.
E’tiborlisi, uzoq yillar davomida sermazmun va sermahsul o‘yinlari bilan shuhrat qozongan Lionel Messi nafaqat Liga 1da, hatto «PSJ» doirasida ham sovrindorlar safidan chetda qoldi. Marhamat, Fransiya oliy divizionidagi mavsum qahramonlari bilan tanishing.
** Eng yaxshi to‘purar: Kilian Mbappe («PSJ») - 28ta gol;
** «Gol+pas» tizimida eng sermahsul o‘yinchi: Kilian Mbappe («PSJ») - 45 ochko (28+17);
** Eng yaxshi assistent: Kilian Mbappe («PSJ») - 17 samarali uzatma;
** Eng ko‘p g‘alaba keltirgan gollar muallifi: Kilian Mbappe («PSJ») - 13ta gol.
23 yoshli fransuz o‘z faoliyatidagi eng sermahsul mavsumni o‘tkazdi. Snayperlar poygasida faqat «Monako» vakili Vissam Ben-Yedder tengi yo‘q kasbdoshiga munosib raqobat ko‘rsata oldi. Knyazlik klubi to‘purari 37 uchrashuvda 25 marta raqiblari darvozalarini ishg‘ol etdi.
«Gol+pas» nominasiyasida ham Kilian bilan tenglasha oladigan raqobatchi topilmadi: u eng yaqin ta’qibchisidan naq 15 ochkoga o‘zib ketdi. Hatto samarali uzatmalar bo‘yicha ham Mbappe yaqqol ustunlikni namoyish etdi. Bu masalada tajribali Messi (14) va «Renn» vakili Benjamen Burigo (13) Kilian ko‘rsatkichiga yaqinroq natijani qayd etishdi.
Jamoasini qimmatli 3 ochko bilan ta’minlagan g‘alaba gollarini Kilian boshqa kasbdoshlariga nisbatan ko‘proq amalga oshirdi. Uning ichki chempionat doirasidagi 28 golidan 13tasi «PSJ»ga maydonni g‘olib sifatida tark etish imkoniyatini berdi. Chinakam xaloskorga xos ko‘rsatkich! Bu borada ikkinchi natijani qayd etgan Lyudovik Ajorkning natijasi ham chakki emas: uning Liga 1 doirasidagi 12 golidan 8tasi «Strasburg»ga g‘alaba keltirdi va jamoa mavsumni 5-o‘rinda yakunladi.
** Eng muhim to‘purar: Vissam Ben-Yedder («Monako») - jamoa gollarining 38,5 foizini amalga oshirdi;
** Eng sermahsul zaxira o‘yinchisi: Vissam Ben-Yedder («Monako») - 6ta gol.
Mbappedan boshqa futbolchiga nasib etgan dastlabki yuksak natija. Mavsumning hal qiluvchi bahor bosqichida qayd etilgan «Monako»ning 9 o‘yindan iborat g‘alabali seriyasida Vissamning hissasi katta bo‘ldi. Knyazlik klubi hisobidagi 65 golning 25tasi - 31 yoshli faxriy hujumchining xizmatlari samarasi. Bu borada keyingi o‘rinni Liga 1 debyutanti - «Klermon» hujumchisi Muhammad Bayo band etdi. «Klermon» gollarining 36,8 foizi aynan unga tegishli.
Bundan tashqari, Ben-Yedder 6 marta zaxiradan maydonga tushganiga qaramasdan, gol urishga muvaffaq bo‘ldi. Boshlang‘ich tarkibdan chetda qolgan yana 2ta uchrashuvda esa, 2ta samarali uzatmani amalga oshirdi. Ya’ni, zaxiradan tushgan 8ta o‘yinda 8 ball to‘pladi. Ugo Ekitike («Reyms») va Seru Girassilar («Renn») jamoadoshlari o‘rniga maydonga tushgan o‘yinlarida 4tadan gol urishni uddalashdi.
** Eng yaxshi darvozabon: Valter Benites («Nissa») - 37ta o‘yinning 14tasi «quruq» (37,8 foiz)
Argentinalik posbon o‘tgan mavsumga nisbatan sezilarli taraqqiyotga erishdi. Ya’ni, joriy mavsum 35ta gol o‘tkazib yubordi (o‘tgan mavsumda 53ta edi), 14 uchrashuvda darvoza daxlsizligini ta’minladi. Lekin bu Valterning rekord ko‘rsatkichi emas: 2018|2019 yillar mavsumida 16ta o‘yinda to‘p o‘tkazmagandi.
** «Temir o‘yinchilar»: Alban Lafon («Nant»), Predrag Raykovich («Reyms»), Aleksandr Nyubel («Monako»), Marko Bizot («Brest»), Joze Fonte («Lill») - mavsumning barcha uchrashuvlarida to‘liq to‘p surdilar.
Mazkur nominasiyada yoppasiga darvozabonlar qayd etilishi o‘ziga xos an’ana. Biroq joriy mavsumda «Lill» himoyachisi Joze Fonte bu an’anani buzdi. Faoliyati yakunlanib borayotgan portugaliyalik futbolchi to‘p surgan vaqti bo‘yicha (3420 daqiqa) rekord o‘rnatib, Chempionshipning 2011|2012 yillar mavsumida «Sautgempton» safida erishgan natijani takrorladi. Darvozabonlar xususida to‘xtaladigan bo‘lsak, «Monako» vakilidan tashqari, qolgan barcha kiperlar o‘rtamiyona jamoalar vakillaridir.
** Eng yosh o‘yinchi: Matis Tel («Renn») - 16 yosh, 3 oy, 19 kunligida debyutini nishonladi.
Matis Liga 1dagi ilk uchrashuvini 2-tur doirasidagi «Brest»ga qarshi bellashuvda o‘tkazdi. O‘shanda murabbiy unga 5 daqiqa vaqt bergandi. Yigitcha keyinchalik yana 6 marta maydonga tushdi (eng ko‘pi 15 daqiqaga), ammo samarali harakatni amalga oshira olmadi.
** Eng keksa o‘yinchi: Eyzi Kavasima («Strasburg») - 38 yosh, 9 oy, 20 kunligida maydonga tushdi.
Kavasima o‘tgan mavsum 24 uchrashuvda «Strasburg» sharafini ichki chempionatda himoya qilgan bo‘lsa, bu yil faqat bir marta murabbiy unga ehtiyoj sezdi - 20-turda yaponiyalik posbon «Mes»ga qarshi maydonga tushib, darvozasi daxlsizligini ta’minladi, 5ta seyvi bilan 2:0 hisobidagi ishonchli g‘alabaga munosib hissa qo‘shdi.
Kavasimaning shartnomasi yangi mavsum oxirida nihoyasiga yetadi. Shu sababli, Liga 1ning «bosh bobosi» rolidagi faoliyati davom etadi.
Manba: championat.com,
S.RAHMONOV tayyorladi
Xolidiya
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
