Oleksandr Zinchenko hozirda Ukrainaning asosiy futbol yulduzi hisoblanadi. Himoyachi olti yildan buyon “Manchester Siti”da to‘p tepadi va 10 ta sovrinni qo‘lga kiritdi (to‘rtta APL chempionligi va Liga kubogi hamda bittadan Angliya kubogi va Superkubogi). So‘nggi paytlarda Xosep Gvardiola jamoasidan Oleksandrning ketishi haqida gap-so‘zlar tarqala boshladi. Biroq unga Angliyaning o‘zida qiziqish bildirayotgan jamoalar juda ko‘p.
Zinchenkoning “chiqindi material”ga aylanishi ehtimoldan yiroq. Jarohat, koronavirus va mavsum boshini o‘tkazib yuborganiga qaramay, ukrainalik futbolchi “Manchester Siti” safida mavsum davomida barcha musobaqalarda 28 ta o‘yinda maydonga tushdi. Masalan, Chempionlar ligasida u 11 o‘yinning beshtasida maydonga tushdi va “Real”ga qarshi 210 daqiqaning 138 daqiqasida maydonda harakat qildi. Angliya chempionatida chap qanot himoyachisi ko‘proq vaqtini zaxirada o‘tkazdi (17), ammo baribir to‘rtinchi chempionlik uchun katta hissa qo‘shdi – to‘rtta golli uzatma.
Birinchi bo‘lib ESPN Zinchenkoning “Man Siti”ni tark etishi mumkinligi haqida yozdi. May oyi o‘rtalarida ushbu manba bir qancha klublar 25 yoshli ukrainalik futbolchini o‘z safiga qo‘shib olmoqchi ekanini aytgan, biroq jamoalar nomini oshkor qilmagan. Ma’lumotlarga ko‘ra, “shaharliklar” allaqachon markaziy va chap qanot himoyachisi qidirishni boshlashgan. Nomzodlar orasida, xususan, “Brayton” vakili Mark Kukurella asosiy nishonda.
“Arsenal” va “Vest Xem”
ESPN xabaridan 10 kun o‘tib Zinchenkoga birinchi davogar “Arsenal” ekani malum bo‘ldi. “Daily Mail” xabariga ko‘ra, londonliklar bosh murabbiyi Mikel Arteta ukrainalik futbolchiga qiziqmoqda. 40 yoshli mutaxassis yarim himoyada Oleksandrdan o‘zining sevimli pozisiyasida foydalanishni rejalashtirgan. “Manchester Siti”da esa Zinchenko chap qanotda harakat qilgan edi. Qayd etilishicha, bungacha “shaharliklar” murabbiylar shtabida ishlagan Arteta ukrainalik bilan alo darajadagi munosabatda. “Mirror” xabariga ko‘ra, “to‘pchilar” bosh murabbiyi Zinchenkoga London klubiga o‘tgan taqdirda yarim himoyachi o‘rnini va’da qilgan.
“Everton” va “Nyukasl”
“Everton”da Zinchenko albatta zerikmaydi – axir u yerda uning vatandoshi Vitaliy Mikolenko o‘ynaydi. “The Athletic” xabariga ko‘ra, “Manchester Siti” Oleksandrning xizmatlarini “Everton” va “Nyukasl”ga taklif qilgan. “Everton”da katta ehtimol bilan Zinchenkodan maydon markazida foydalaniladi. “Nyukasl”ga kelsak, ko‘p narsa klubning “Aston Villa”dan Mett Targettni sotib olishiga bog‘liq. “Siti” rahbariyati Zinchenkoga munosib pul taklif qilinsa va uning o‘zi buni xohlasa, futbolchini qo‘yib yuborishga tayyorligini malum qilgan. Ukrainalikning “Everton”ga o‘tishi mumkinligi haqidagi ma’lumotni taniqli insayder Fabrisio Romano ham tasdiqlagan. U yerda Zinchenko kreativ yarim himoyachi rolida paydo bo‘lishi mumkin.
“Inter” va “Barselona”
Yangiliklar faqat ingliz klublari bilan chegaralanib qolmadi. “Man Siti” klubi “Inter” himoyachisi Milan Shkrinyarga qiziqish bildirmoqda. “Inter Live” xabariga ko‘ra, Xosep Gvardiola jamoasi Zinchenkoni uning uchun qo‘shimcha 30 million yevro to‘lash evaziga taklif qilishga tayyor. Ma’lum qilinishicha, “Inter” slovakiyalikni tarkibda saqlab qolmoqchi, ammo bu foydali bo‘lsa, taklifni ko‘rib chiqishga tayyor.
Zinchenkoning shartlaridan biri – yarim himoyachi sifatida muntazam shug‘ullanish. “Barselona” unga ushbu pozisiyani berishga tayyormi yoki yo‘q, bu katta savol. Ammo Zinchenkoning transferi, agar ko‘k-anorranglilar “Chelsi” himoyachisi Markos Alonsoni o‘z safiga qo‘shib olmasa, amalga oshishi mumkin. Ferran Torresning taklifiga qaramay, Oleksandr “Barselona”da bo‘lmasligi ham mumkin. Ispaniyalik vinger bilan ukrainalik futbolchi “Man Siti”da birgalikda o‘ynagan. Jamoada eng katta figura bosh murabbiy Xavi ekanini inobatga olsak, ko‘k-anorranglilar ushbu transferni u istasagina amalga oshirishga harakat qilib ko‘rishi mumkin.
“Everton” Zinchenkoni sotib olishga asosiy da’vogar sifatida gavdalanmoqda. Ammo u qayerga bormasin, endi unga Chempionlar ligasida g‘alaba qozonish orzusini amalga oshirish ancha qiyin bo‘ladi. Bunga qadar ukrainaliklardan faqat Andriy Shevchenko va Anatoliy Timoshuk bunday sharafga sazovor bo‘lgan (“Real Madrid”ning zaxira darvozaboni Andriy Lunin UEFA reglamentiga ko‘ra Chempionlar ligasi g‘olibi hisoblanmaydi).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
