Toshkent shahri mezbonlik qilgan og‘ir atletika bo‘yicha o‘smirlar va yoshlar o‘rtasidagi Osiyo chempionati o‘z nihoyasiga yetdi. Har qanday musobaqa faqat sportchi uchun emas, balki ularning ustozlari uchun ham muhim sinov hisoblanadi. Supachaga chiqqan vaqtida shogirdidanda ko‘proq hayajonlanadigan, yutuqlaridan sevinadigan inson ham ustozdir.
Osiyo chempionati yakunida shogirdlarining muvaffaqiyatidan quvonayotgan O‘zbekiston yoshlar terma jamoasi murabbiyi Jo‘rabek Zoirovning musobaqa borasidagi fikrlariga quloq tutdik.
“Yurtimizda o‘tkazilgan o‘smirlar va yoshlar o‘rtasidagi Osiyo chempionati o‘z nihoyasiga yetdi. Musobaqada 25dan ortiq davlatdan kelgan sportchilar g‘oliblik uchun kurash olib borishdi. Ushbu qit’a birinchiligida to‘liq tarkib bilan ishtirok etdik. Asosiy raqiblarimiz Eron, Vyetnam, Turkmaniston, Qozog‘iston, Qirg‘iziston va Indoneziya davlatlaridan kelgan sportchilar bo‘lishdi. Murosasiz kechgan bellashuvlarda yoshlarimiz har bir vazn toifasida o‘zlarining shaxsiy rekordlarini yangilashdi. Musobaqaning so‘nggi kunida esa og‘ir vazn toifasidagi shogirdim Mirhosil Mirzaboyev yoshlar o‘rtasida oltin, ikki kurashda kumush medal sohibiga aylandi.
O‘smir va yoshlar o‘rtasida umumjamoa hisobida o‘g‘il bolalarimiz 1-o‘rinni qo‘lga kiritishdi. Qizlar o‘rtasida esa yoshlar umumjamoa hisobida 1-o‘ringa, o‘smir qizlar esa 2-o‘ringa sazovor bo‘lishdi. Boshqa davlatlardan kelgan sporchilar ham yaxshi natija bilan o‘z vatanlariga qaytishdi. Bu kabi musobaqalarning yurtimizda o‘tkazilishi avvalo O‘zbekiston nomini dunyoga tanitish uchun katta imkoniyat bo‘lsa, qolaversa, sportchilarimizga Jahon chempionati, Olimpiada o‘yinlarida ishtirok etish uchun zamin yaratadi. Keyingi musobaqamiz joriy yilning avgust oyida Turkiyaning Konya shahrida bo‘lib o‘tadigan Islom birdamlik o‘yinlaridir. Ushbu musobaqada yangi tarkib bilan ishtirok etamiz. V Islom birdamlik o‘yinlaridan ham yuqori natijalar bilan qaytish niyatimiz bor,” – deya so‘zini yakunladi murabbiy Jo‘rabek Zoirov.
Ma’lumot uchun, o‘smirlar va yoshlar o‘rtasidagi Osiyo chempionati bahslarida qatnashgan Tursunoy Jabborova, Sharofiddin Amriddinov, Nigora Suvonova kabi iste’dodli sportchilarimiz Islom birdamlik o‘yinlarida ishtirok etishadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
