Bugun O‘zbekiston futbol assosiasiyasida FIFA koordinatorlari Andrey Vashkevich va Lorenso Fofi bilan uchrashuv bo‘lib o‘tdi.
Uchrashuv davomida tomonlar o‘zbek futbolini rivojlantirish bilan bog‘liq bir qator masalalarni muhokama qilishdi. Xususan, terma jamoalar uchun yaratilgan shart sharoitlar, bo‘lajak musobaqalar va oldindagi rejalar haqida fikr almashildi.
“O‘zbekiston yosh iqtidorli futbolchilarga juda boy, ular uchun o‘z mahoratini ro‘yobga chiqarish borasida zamonaviy futbol infratuzilmasi zarur. Biz futbolchilarni tizimli ravishda milliy terma jamoalarga tayyorlash uchun erkaklar, ayollar, futzal, sohil futboli jamoalari sonini 19 taga yetkazdik. Agar ilgari yosh terma jamoalar chet ellik tengdoshlari bilan o‘rtoqlik o‘yinlarida juda kam ishtirok etishgan bo‘lsa, endi ular doimiy ravishda xalqaro turnirlarda qatnashish imkoniyatiga ega bo‘lishmoqda va bu ularga xalqaro tajriba to‘plashga imkon yaratyapti” dedi Ravshan Irmatov.
Suhbat davomida O‘zbekiston terma jamoalari uchun qurilayotgan “Do‘stlik” bazasining qurilish-rekonstruksiya jarayoni, markazdan o‘rin olgan obektlar, jumladan, mashg‘ulot maydonchasi va stadion loyihasining texnik-tashkliy jarayonlari borasida fikr almashildi. Ushbu loyihalarga oid asosiy rejalar muhokama qilinib, obektda 2 ta gibrid va 2 ta sun’iy qoplamali futbol maydonlari barpo qilinishi bo‘yicha fikr almashildi.
FIFA vakillari amalga oshirilgan ishlarni yuqori baholab, rejalarni yanada takomillashtirish bo‘yicha o‘z takliflari bilan o‘rtoqlashdilar.