Superliganing 18-turidan o‘rin olgan “Qo‘qon-1912” – AGMK (0:0) uchrashuvidan so‘ng o‘tkazilgan matbuot anjumanida mezbonlar bosh murabbiyi Davron Fayziyev ishtirok etdi.
– Nima deyishim mumkin? Hozir biror fikr bildirishim qiyin, chunki asabiy holatdaman. O‘yin shiddatli, juda qiziqarli bo‘ldi. O‘yinni gollar bezab bermadi. Tan olish kerak, uchrashuvning oxirgi 10 daqiqasida AGMK jamoasi zaxira o‘yinchilarining hisobiga tempni ushlab turishdi. Bizda zaxira o‘rindig‘imiz torligi uchun qiyinchilikka duch keldik. Hozirgi kunda har bir ochko bizga oltinga teng bo‘lyapti. Yaratilgan vaziyatlardan foydalanish kerak. Murabbiy sifatida bor tajribamni ishga solib futbolchilarga ko‘rsatma beryapman. Maydonda nimadir yetishmayapti. Bu bizning qatorasiga yettinchi duranggimiz bo‘ldi. 7 ta durang o‘ynagandan ko‘ra 4 ta g‘alaba qozonib, 3 ta yutqazish yoki buni aksi bo‘lsa ham mayli edi, shunda ochkolarimiz ko‘proq bo‘lishi mumkin edi. Bu – futbol, unda har xil holatlarga tayyor turish kerak. Bugun Yosovich bilan Toshmirzayev sariq kartochkalari 4 ta yetgani uchun o‘yinni o‘tkazib yuborishdi. Tarkib tuzishda yoki zaxiradan futbolchilarni chiqarishga qiynaldik. Bugun yigitlar har bir jamoa bilan futbol o‘ynash mumkinligini yana isbotlashdi. Muxlislarga yoqadigan o‘yin ko‘rsatyapmiz. Balki yomon o‘ynab turib natijaga erishish kerakmikin, bilmay qoldim. Bugun golli imkoniyatlarimiz AGMKga nisbatan ko‘proq bo‘ldi. Gol bo‘lmaganligi uchun bugungi o‘yinda durang adolatli natija bo‘ldi deb hisoblayman.
– Yosovich, Merzyakov, Hojimirzayev va Toshmirzayevlar safga qaytsa, jamoa hozirgi qiyin vaziyatdan chiqib ketishi mumkinmi?
– Merzlyakov mashg‘ulotlarga qo‘shilganiga endi o‘n kun bo‘ldi, u o‘zini hali to‘liq tayyor emasman deb hisobladi, shuning uchun asosiy tarkibga kiritilmadi. Bilol bilan Yosovich keyingi uchrashuvda maydonga tushishadi. Normatov bilan Xojimirzayev jarohatda. Ular yaqin ikki turda bizga yordam bera olmaydilar. Murod Komilov esa yoshlar terma jamoasidan bugun qaytib keldi. Yoshlar mana shunday o‘yinlar orqali o‘sishga erishadi. Yoshlar bu berilgan imkoniyatdan foydalanishlari kerak.
– Jamoa xavfli “zona”ga tushib qoldi. Ochko olish kerak bo‘lgan o‘yinda Andrey Sidorovni sal ertaroq maydonga tushirsangiz bo‘lmasmidi?
– AGMKga qarshi himoyachini o‘yindan olib tavakkalchilikka qo‘l urish og‘ir bo‘lardi. AGMK 4-3-3 taktikasida o‘ynayotgandi. Shuning uchun tavakkal qilib bo‘lmasdi. Birinchi o‘rinda o‘z darvozamizni quruq saqlab qoldik. Xavfli “zona”ga kelsak, to‘g‘ri jamoamiz shu yerda turibdi. Oldimizda o‘yinlarimiz bor. Umid qilamanki, barchamiz birgalikda bu vaziyatdan chiqib ketamiz. Har turda klublar o‘rinlari almashib turibdi. Kimdir ochko yo‘qotyapti, kimdir to‘playapti. Baribir chempionat o‘ziga yarasha qiziq o‘tyapti. “Bo‘ridan qo‘rqqan o‘rmonga bormaydi” degan gap bor. Bizda eng asosiysi, ahil oilamiz bor.
– Azizxon Erkinov bugun Superligada debyut qildi. U ko‘rsatgan o‘yin haqida fikringiz?
– Javohir Sidiqov endi jarohatidan qutulib chiqdi. O‘zini biroz noqulay his qilayotgani uchun tavakkalchilikka qo‘l urdim. Aziz yomon bola emas. Mashg‘ulotlarda yaxshi harakat qilyapti. Baribir birinchi o‘yinida hayajon va bosim bo‘ldi. Sardor Yetovqo‘ziyevda ham shunday bo‘ldi. U ham anchadan buyon endi maydonga tushdi. Bizda iqtidorli yoshlar bor. Bundan keyin ham yoshlarga e’tibor berishga harakat qilamiz. Umid qilamanki ular berilgan imkoniyatdan unumli foydalanadilar.
– Futbolchilaringiz ko‘p xolatlarda o‘yindan tashqari xolatlarda qolib ketishdi…
– Bu narsa avvalo gol urishga bo‘lgan katta ishtiyoq tufayli. Meni talabim hujumchilar oldingi chiziqda to‘p so‘rashlari kerak. Bunda futbolchi vaziyatni ham baholashi kerak bo‘ladi. O‘yindan tashqari xolatda emasmi, yoki to‘pni ololmay qolsa qarshi hujum xavfi yuzaga kelib qolmaydimi, mana shularga e’tibor qaratishi lozim. Lekin bugungi raqibimiz safida tajribali futbolchilar bor edi, bunaqa o‘yinlar oson bo‘lmaydi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
