Angliya terma jamoasining Jahon chempionatiga tayyorgarligi yomon tomonga keta boshladi. 1-0 hisobida Italiyaga imkoniyat boy berilganidan keyin, Garet Sautgeyt shogirdlarining g‘alabasiz seriyasi 5 taga yetdi. Angliya 1992 yildan beri bunday yomon natija ko‘rsatmagan edi. G‘alaba mayli, jamoa, hattoki, gol urish nimaligini unutib qo‘ya boshladi. Ha, oldinda Keyndek raqiblar kushandasi mavjud. Ammo bu ham yordam bermayotir. Quyida Angliyaning Qatarga ketguncha to‘g‘irlashi kerak bo‘lgan besh muammosi haqida so‘z boradi.
O‘ta ehtiyotkorlik
Angliya Italiyaga qarshi bahsda, go‘yoki, sinovdan o‘tkazilgan beshtalik himoyachi tizimidan foydalandi. Markazda Uoker, Maguayr va Dayer harakat qildi. Bu esa qolgan ijodkor futbolchilar uchun yetarlicha maydon qolmasligiga sabab bo‘ldi. Aynan shu narsa Angliyaning gol ura olmayotganiga sabablardan biri sanaladi. Jamoa ustozi Sautgeyt tabiatan ehtiyotkor. Shu tufayli, mundialga o‘ta yaqin qolmagunicha, taktik sxemani o‘zgartirmasa kerak. Ammo uning mudofaani mahkam ushlash rejasi, hujumdagi muammolarga sabab bo‘lmoqda. Jamoa ochiq futbolda 450 daqiqadan beri gol ura olmadi. Vaholangki, Angliyaning hujum chizig‘i Yevropadagi eng kuchlilaridan biri hisoblanadi. Endilikda Sautgeyt bu masalani jiddiy ko‘rib chiqib, prinsiplarini o‘zgartirishi kerak.
Asosiy futbolchilarning formada emasligi
Sautgeyt ixtiyoridagi bir nechta futbolchilar o‘z klublari safida formada emas. Ro‘yxatning old qatorida Xarri Maguayr turibdi. U "MYU"da zaxira vakiliga aylangan. Ammo Italiyaga qarshi maydonga tashlandi. Chap qanotda Lyuk Shou va Ben Chilvellar jarohat sababli jamoaga yordam bera olmadi. Bu esa qanot himoyachisi sifatida, hujumchi Sakadan foydalanilishiga olib keldi. Meyson Mountning darajasi ham oldingidek emas. Sterling esa "Chelsi"da hali moslashish davrini boshdan o‘tkazmoqda. Fillips "Manchester Siti"da deyarli maydonda harakat qilmadi. Aynan mana shu sabablar ham Angliyaning umumiy natijalariga ta’sir o‘tkazmoqda. Sautgeyt esa tanlovlarda maksimum e’tiborli bo‘lishi kerak.
Keynga suyanib qolish
Angliya hujumi Keyn, Sterling va Fodendan tuzilgan. Aynan mana shu trio Italiyaga qarshi maydonga tushirilgandi. Ha, Keyn terma jamoada 50 ta golga mualliflik qilgan. Lekin u ham yordamga kuchi yetmayapti. Angliyada esa B reja yo‘q. Ya’ni, Keyn bo‘lmasa, Touni yoki Abraxamdan foydalanish yaramasligi mumkin. Chunki bu ikkisi, xalqaro bahslar uchun ancha tajribasizlik qiladi. Markus Reshfordni aytmasa ham bo‘ladi. U jarohatlar bilan o‘z darajasini saqlab qolishga qiynalmoqda. Aynan, masalaning mana shu tomoni ham chuqur o‘ylashni taqozo etadi.
Yosh futbolchilarga ishonch
Bukayo Saka Angliyaning eng yorqin iqtidor egalaridan biridir. Ammo unga Italiya bilan bahsda himoya vazifasi topshirildi. Jyud Bellingem ham yarim himoyada siqilib qolgan edi. Fil Fodendan esa Gvardiola qanday foydalanishni biladi xolos. Sautgeyt u bilan qanday ishlashga boshi qotgan. Mana shunday yosh futbolchilardan foydalana olmaslik, yakunda jamoa pand yeyishiga sabab bo‘lmoqda. Masalaga e’tibor berilishi kerak.
Milliy qo‘llab-quvvatlash
Sautgeytning ishi, u 2016 yilda jamoaga olib kelinganidan buyon yaxshi tomonga o‘zgarib kelayotgandi. Ammo 2022 yildan boshlab hammasi yomonlashdi. U va uning jamoasi "Molinyu" stadionidagi sharmandali mag‘lubiyatda muxlislar tomonidan xushtakbozlik va noroziliklarga uchradi. O‘shanda Vengriya 4-0 hisobida g‘alaba qozongan edi. Qolaversa, Sautgeyt Italiyadagi mag‘lubiyatda ham Angliyadan kelgan 4000 mindan ortiq muxlislarga kulgu bo‘ldi. Bu shuni ko‘rsatadiki, inglizlarda toqatsizlik kuchaygan. Albatta, Angliyaning so‘nggi natijalari bu bilan chambarchas bog‘langan. Sautgeyt esa muammoga yechim izlashi lozim.
ISMATOV J.
Al-G‘arafa
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
