Doimo APLning yangi mavsum boshlanishi arafasida «Arsenal» istehzolarga sabab bo‘lardi....
Nihoyat, bu sho‘rlik jamoa 1-o‘rindan joy oldi, hatto ro‘yxat hech qaysi jamoa ochkolarga ega bo‘lmagan, alfavit bo‘yicha tuzilgan bo‘lsa ham mayli. Biroq mavsum boshlanib, 7ta tur (xo‘p, 6,5 bo‘la qolsin) ortda qolgan bo‘lsa hamki, «Arsenal» yaqqol peshqadamligicha qolmoqda. 6 g‘alaba va safardagi «MYU»dan qabul qilingan mag‘lubiyat.
Hozir «To‘pchilar» har bir uchrashuvda favorit maqomida o‘ynab, haqqoniy ravishda ochkolar olishmoqda. Yaqin o‘tmishda jamoaga ana shu barqarorlik yetishmayotgandi. Atigi bir yil muqaddam yangi asrda ilk bora yevrokubok musobaqalaridan chetda qoldi, keyin mavsumni 3ta mag‘lubiyat bilan boshladi. O‘shanda Artetaga chiqish eshiklari ko‘rsatilishi aniqdek tuyulgandi. Lekin Mikel hech qayoqqa ketmadi, jamoa ingliz futbolining kazo-kazolari safiga qaytdi. Xo‘sh, nimaning hisobiga jamoa ijobiy tomonga o‘zgardi?
1. «Arsenal» futbolchilari o‘smoqdalar
Bu muvaffaqiyatning asosiy sabablaridan biri. Remsdeyl «Arsenal» libosini kiyishi bilanoq Angliya terma jamoasida debyutini nishonladi. To‘g‘ri, bu masalada Sakachi, degan savol bilan hazillashish mumkin. Martinelli Braziliyaning «D» seriyasidan keldi-yu, boshlang‘ich tarkibga mixlandi-qoldi.
O‘ta sezilmaydigan shiddatni Saliba namoyish etdi. Sezilmasligining boisi shuki, u «surgunlar»dan «mulla» bo‘lib qaytdi. U o‘z xatolari tufayli raqiblariga gollar sovg‘a qilishni to‘xtatishdan tashqari, o‘zi gol uradigan bo‘lib qoldi. 7ta o‘yinda 2ta gol - himoyachi uchun a’lo ko‘rsatkich!
Jakadagi shiddatli taraqqiyot xususida butun bir kitobni yozish mumkin. Uning joriy mavsumdagi barcha ko‘rsatkichlari kasbdoshlarinikidan yuqori.
Debyutini yuksak saviyada nishonlagan Edegor endi sardorlik bog‘ichi bilan maydonga tushmoqda.
2. Darchaning so‘nggi kunlaridagi samarali kelishuvlar
Jezus - ideal xarid. Bugungi «Arsenal»ning eng yaxshi o‘yinchisi. Ha, avvaliga uning oldingi chiziqda qanday o‘ynashi shubha ostida edi, chunki Gvardiola uni vinger pozisiyasiga qayta tayyorlagandi. Zinchenko hozircha ajoyib taassurot qoldirmoqda. Jarohat olmaganida, yanada yaxshiroq o‘ynardi. Fabiu Viyeyra - Edegorning o‘rinbosari, lekin maydonga tushishi bilan ajoyib gol urdi.
Oxirgi ikki transfer darchalari tahlil etilsa, Edegor, Remsdeyl, Martinellilar yoniga Ben Uaytni qo‘shish mumkin. Tomas Parti - jamoaning hal qiluvchi o‘yinchisi. Pepening 80 mln. yevrolik transferi kabi omadsizliklar endi takrorlanmayapti.
3. «Arsenal»da bir-birining o‘rnini to‘ldirish xislati paydo bo‘ldi
Oxirgi yilda jamoaning bir qator a’zolari o‘z pozisiyalarini o‘zgartirdilar. Universallik xislati evaziga Ben Uayt himoya chizig‘ining o‘ng qanotiga o‘tdi. Jaka markazdan tashqari, chap qanotda ham ishonchli to‘p surmoqda. «To‘pchilar»ning o‘yin davomida joy almashishlari alohida e’tirofga loyiq. Martinelli himoya chizig‘idagi sheriklariga ko‘maklashadi, «Brentford»ga qarshi o‘yinda Sakada ham shunday harakatlarni ko‘rdik. Jezus esa aynan shu xislati evaziga jamoadoshlarini qulay vaziyatga olib chiqmoqda. GolQpas tizimida u 7 (4}3) ball bilan faqat Xolanddan 12 (11}1) ortda bormoqda.
4. YECHL yo‘q, YELda esa 2-tarkib bilan o‘ynash mumkin
O‘tgan mavsumda yevrokubok musobaqalaridan chetda qolgani va Angliya Kubogi turnirini barvaqt tark etgani «Arsenal»ga ancha qo‘l kelgandi. Ana shu erkinlik evaziga dastlabki 8 turdan keyin 12-o‘rinda turgan jamoa mavsumni yetakchi kvartetda yakunladi.
Endi «to‘pchilar»ga barcha raqobatchilarga nisbatan («MYU»dan tashqari) ECHLda ishtirok etmayotganligi yordam bermoqda. «Tottenxem», «Liverpul» va «Chelsi» nufuzli musobaqa tufayli kuch yo‘qotayotgan (faqat «Man.Siti» xotirjam o‘ynamoqda) pallada «Arsenal» 2-tarkibi bilan YELda muvaffaqiyatli to‘p surmoqda.
5. Jamoa nostandart yurishlarni o‘ylab topmoqda
«Arsenal» muvaffaqiyatni ta’minlayotgan 4x2x3x1 sxemasini o‘zgartirmagan bo‘lsada, murabbiylar shtabi doimo qandaydir yangi yechimlarni o‘ylab topmoqda. «MYU»ga qarshi bahsda jamoa g‘ayri-tabiiy jarima zarbasini namoyish etdi:
Edegor nigohlari bilan to‘pni jarima maydonchasi ichiga yo‘llashini ko‘rsatib, keyin to‘pga nazar tashladi. Lekin «MYU» himoyachilari o‘z darvozalari tomon yo‘l olishganida, u to‘pni jarima maydonchasi tashqarisidagi yarim aylanaga yo‘lladi. U yerda yolg‘iz qolgan Saka to‘pni to‘xtatmasdan darvozaga yo‘lladi. Gol ura olmadi, lekin o‘ylangan reja chakki emasdi.
6. Intizomga munosabat o‘zgardi
O‘tgan mavsum jamoada bir qator muhim o‘zgarishlar yuz berdi. Klub rahbariyati mavsum o‘rtasida Obameyangni tarkibdan chetlatdi. Qizig‘i shundaki, sal avvalroq sardor bilan shartnoma muddati uzaytirilgandi. Undan avvalroq klub Genduzi bilan aloqani uzgandi. Jaka bilan bog‘liq vaziyat ham maqtaydigan darajada emasdi, lekin u jamoada qoldi. Emeri ketganidan keyin, yarim himoyachi va Arteta o‘rtasida kelishmovchiliklar kuzatilmadi. Aksincha, murabbiy shveysariyalik shogirdiga sardorlik bog‘ichini qaytardi. Hozir Granit sardorning 1-o‘rinbosari, Edegor maydonga tushmasa, bog‘ich uniki.
7. «Arsenal» o‘z o‘yinini topib oldi, bahsni dadil o‘tkazmoqda
So‘nggi band - avvalgilarining davomi. Unda futbolchilarning o‘ziga xos xislatlari va o‘yin uslubi ahamiyatli. «Arsenal» ochiq-oydin, hujumkor o‘yindan cho‘chimaydi. Bu borada Artetani «Siti»dan nusxa ko‘chirganlikda ayblash mumkin. Axir u Gvardioladan ta’lim olgan.
Taqqoslash uchun misol oladigan bo‘lsak, «Tottenxem» hatto «Nottingem Forest»ga qarshi hujum taktikasini qo‘llashi mumkin. Ehtimol, Kontening taktikasi oxir-oqibat ko‘proq ochkolarni keltirayotgandir. Lekin «To‘pchilar»ning maftunkor futboli o‘yinchilarning o‘zlariga ham huzur bag‘ishlaydi. Remsdeyl hozir APLning eng dadil darvozaboni, g‘ayrati jo‘sh urishi uchun u raqib jamoa muxlislarini olqishlashdan ham toymaydi.
Avgust oyida «Arsenal»ning o‘tgan mavsumdagi faoliyati haqida «Hammasi yoki hech narsa» nomli hujjatli film yaratildi. Unda Obameyang bilan xayrlashish va Arteta o‘z shogirdlarini qay usulda o‘yinga da’vat etishi lavhalari namoyish etildi. Murabbiy futbolchilarning kayfiyatini nazorat qilishga va shunga yarasha ish tutishga intiladi. Hozircha, hammasi risoladagidek ketmoqda. To‘plar go‘yo o‘z ixtiyori bilan darvozaga yo‘l olayotgan, Jezus esa o‘z raqsi bilan Vinisiusga salom yo‘llayotgandek. Keyin «to‘pchilar» 15 yoshli Nvanerini jangga tashlaydilar. Eslab qoling, u - APL tarixidagi dastlabki 15 yoshli futbolchi!
Yanada ta’sirchan voqea «Bornmut» - «Arsenal» (0:3) uchrashuvida kuzatildi. Unda londonlik muxlislar 8-daqiqadan boshlab suyukli jamoalarining har bir to‘p uzatishini «ole» hayqirig‘i bilan qo‘llab,quvvatlab turdilar. Shunaqa da’vatni qayerda ko‘rgansiz? To‘g‘ri, bu arzimas taktik usuldek tuyulishi mumkin, ammo faqat hozirgi «Arsenal»ga xos.
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
