«Liverpul»ni «Real» va «MYU»dek grandlardan afzal ko‘rgan «Selta» yarim himoyachisi Stefan Baychetich nihoyat, yangi jamoasida maydonga tushish imkoniyatiga ega bo‘ldi.
Shu tariqa ispaniyalik serb o‘g‘loni Fabinyoni zaxira o‘rindig‘iga «elimlab» qo‘ydi. Mersisaydlar yosh iqtidor sohibini 2020 yil arafasida, Buyuk Britaniya YEIni rasman tark etishiga, APL esa 18 yoshdan kichik bo‘lgan xorijiy futbolchilarni xarid qilmaslik xususidagi yangi qonunni kuchga kiritishiga atigi bir necha soat qolganida xarid qilishgandi. «Liverpul» akademiyasining direktori va skautlar o‘ta tezkorlik evaziga bu yumushni uddaladilar. Tomonlar o‘rtasidagi bir necha oyga cho‘zilgan muzokaralar nihoyasiga yetishi arafasida «Selta» vakillari Stefan uchun «Real» va «MYU» ko‘proq mablag‘ taklif etganini aytishgan, «Liverpul» 16 yoshli o‘smir uchun qo‘shimcha 240000 funt to‘lashga majbur bo‘lgandi.
Baychetich va uning otasining transferga munosabatini ispan klubi akademiyasining murabbiyi quyidagicha izohladi: «Liverpul» qaysidir boshqa o‘yinchini emas, aynan Stefanni xarid qilishini bildirdi. Uning otasi o‘g‘li Angliyada va faqat «Liverpul»da to‘p surish niyatida ekanligini aytdi. Ular biror marta bo‘lsada, «MYU» yoki «Real»ni tilga olmadilar. Ular faqat «Liverpul» vakillari bilan muloqotda bo‘lishdi. Stefan va otasi Ispaniyada faqat «Selta»da, xorijda faqat «Liverpul»da o‘ynashga qaror qilishgandi».
Baychetich va Tyagolar taqdiri tutashib ketgan
Ularning otalari - Mazinyo va Srdan 1996|1997 yillar mavsumida «Selta»da yonmayon to‘p surishgan. «Liverpul»da bu ikki futbolchi yaxshi munosabatda bo‘lishdi, Tyago yoshi ulug‘ va tajribali o‘yinchi sifatida Baychetichni o‘z rahnamoligiga oldi. Oradan bir necha yil o‘tgach, Stefan va Tyago «Val Minor» futbol akademiyasida tahsil olganliklari ayon bo‘ldi. Alkantara «Barselona»ga o‘tishidan avval 2003-2005 yillarda, Stefan esa 2009-2012 yillarda akademiya jamoalarida to‘p surishgan, keyin Baychetich «Selta» safidan joy olgandi.
Mazinyolar oilasi futbolchilik faoliyatidan keyin Rio-de-Janeyroda istiqomat qilgan va Vigoga yo‘l olish arafasida bolalar futbol bilan shug‘ullanishlari uchun jamoa topishga uringan. Yakunda Mazinyo «Val Minor»ni tanlagan. Klubga Tyago bilan birgalikda tug‘ishgan ukasi Rafinya va amakivachchasi Rodrigo ham qabul qilingan. Rodrigo hozir «Lids» sharafini himoya qilmoqda. Bu haqda «Val Minor»ning sobiq murabbiyi va Baychetichning o‘zi «Liverpul» bilan 2027 yilgacha mo‘ljallangan shartnomani imzolaganidan keyin hikoya qildi: «Bu o‘ta ajoyib voqea. Chunki biz Vigodagi jajjigina akademiyada, o‘zim tug‘ilgan shaharda to‘p surgandik. Bu haqda Tyagoga aytganimda, u ham hayratda qoldi. O‘ta qiziq voqea. Menimcha, otam uning otasi bilan gaplashmagan. Endi bir tasavvur qiling: yaqinda biz mittigina shaharda edik, hozir bu yerga kelib qoldik!»
«Liverpul»ning asosiy tarkibidan Baychetich faqat joriy mavsumda joy oldi
Stefan joriy mavsumda «Liverpul» muxlislarining yuzlarida tabassum yugurtirgan sabablardan biri. 18 yoshli yarim himoyachining o‘yinlari kutilganidan ham yorqinroq bo‘lmoqda. Dastavval uni markaziy himoyachi pozisiyasi uchun xarid qilishgandi. Biroq u tobora ko‘proq maydonga tushib, yuqoriga odimlamoqda. O‘tgan yilning yozida «Liverpul»ning murabbiylar shtabi yosh iqtidor sohibini Osiyodagi mavsumoldi yig‘iniga olib ketdi. U yerda Stefan o‘zining ijobiy xislatlarini namoyish etdi va kuchli taassurot qoldirdi. Uning ustunligi sifatida to‘p bilan ishonchli harakatlanishi, ikkala oyog‘idan unumli foydalanishi, olis masofalarga diagonal uzatmalarni amalga oshirishi va havodagi kurashda samarali o‘ynashini keltirish mumkin. qisqasi, tayanch yarim himoyachisi uchun kerak bo‘lgan fazilatlarga ega. Mavsumoldi tayyorgarligi yakunida o‘rtoqlik uchrashuvlarida samarali o‘yin ko‘rsatgan Baychetichni professional shartnoma bilan mukofotlab, asosiy tarkibda olib qolishdi, yoshlar jamoasiga qaytarib yuborishmadi. «Liverpul» tarkibidagi rasmiy debyutini Stefan «Bornmut»ga qarshi bellashuvda, «qizillar» 9:0 hisobida oldinda borishayotgan pallada nishonladi.
Fabinyoning sport formasi Baychetichga o‘yin amaliyotini sovg‘a qildi
Braziliyalik tayanch yarim himoyachisiga nima bo‘lganligi mavsumning ilk kunidan boshlab Yurgen Klopp murabbiylar shtabi uchun jumboq bo‘lib qolmoqda. O‘z pozisiyasida dunyoning eng sara o‘yinchilaridan biri bo‘lgan Fabinyo o‘z o‘yinini yo‘qotib qo‘ygani tufayli «Liverpul» o‘yinlarining sifati pasayib ketdi. Shu sababli murabbiy o‘z e’tiborini Baychetichga qaratib, unga o‘yin amaliyoti bera boshladi. Yosh iqtidor ustozi ishonchini oqlashga kirishdi va 17-tur doirasidagi «Aston Villa»ga qarshi bahsda gol urdi. Hozir Stefan «Liverpul» safida gol urgan uchinchi eng yosh futbolchi. U ilk golini nishonlaganida 18 yosh, 65 kunlik edi. Faqat Maykl Ouen va Rahim Sterling Stefandan kichikroq paytlarida debyut gollarini amalga oshirishgan. Shundan beri asosiy tarkibdan joy olgan ispaniyalik serb jamoa yetakchilari safiga ko‘tarildi. Buni Yurgen Klopp va jamoadoshlari ko‘p e’tirof etishdi. Mersisayd derbisidagi g‘alabadan (2:0) keyin Muhammad Saloh yosh jamoadoshi xususida shunday dedi: «U ajoyib yigit va saviyali o‘yinchi, doimo bor kuch,mahorati bilan to‘p suradi. Tarkibimizda maydonga tushganidan beri, Stefan eng yaxshi o‘yinchi maqomida o‘ynayapti. Mana shu ishonch bilan doimo olg‘a intilishidan umidvorman».
«Everton»ga qarshi uchrashuvda bosh murabbiy tayanch yarim himoyachisi pozisiyasida ishonchli to‘p surgan debyutant shogirdiga sakkizlik rolini topshirdi. Baychetich bu safar ham ustozi ishonchini oqladi va «qizillar» safidagi eng yaxshi o‘yinchilar safida bo‘ldi. Tyago jarohat olgani bois, YECHL pley-off bosqichi doirasidagi «Real»ga qarshi bellashuvda Baychetich maydonga tushdi. Keyingi o‘yinlarda o‘rta chiziqda o‘zgarishlar yuz bergan taqdirda ham, Stefan uning asosiy bo‘g‘ini bo‘lib qolsa, ajablanmaymiz.
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
