So‘nggi xabarlarda aytilishicha, "Manchester Yunayted" yozda Xarri Keynni sotib olish uchun qattiq kurashadi. Bu klub yaqin yillar ichida mana shunday tanlov qilmoqda. Ya’ni, yosh katta va tajribali yulduzlar xarid qilinmoqda. Masalan, Keyn bu yozda 30 yoshga to‘ladi. U hozirda "Tottenxem" va Angliya terma jamoasining tarixdagi eng yaxshi to‘purariga aylandi. Agarda hujumchi karyerasining qolgan qismini ham APLda o‘tkazsa, u holda, Keyn Alan Shirerning rekordini ham yangilashi mumkin. Afsuski, Xarri Keynga yirik sovrinlar yutish nasib qilmayapti. Agarda u "MYU"ga o‘tsa, uning kami to‘lishi mumkin. Biz bugun "qizil iblislar" tomonidan sotib olingan eng qariya futbolchilar va ularning keyingi taqdiri haqida so‘z yuritmoqchimiz.
Kazemiro
Braziliyalik yarim himoyachi yoshi katta bo‘lishiga qaramay, ancha qimmat narxga xarid qilingan edi. Ammo qaror to‘g‘ri bo‘lib chiqdi. Kazemiro "MYU"ga maydon markazidagi kamchilikni to‘ldirishga yordam berdi. Albatta, futbolchining tartib-intizom borasida muammolari bor. APLda Kazemiro qizillar olishdan charchamayapti. Shunga qaramay, 31 yoshli futbolchi "MYU" uchun o‘ta kerak figuradir.
Kristian Eriksen
"Brentford" safidagi muvaffaqiyatli yarim yillikdan so‘ng, "MYU" Eriksenni 2022 yilning yozida erkin agent sifatida qo‘lga kiritdi. Daniyalik yarim himoyachi "Old Trafford"da yanada yuksaldi. U mavsum davomida 9 ta assistga mualliflik qilgan. To‘pig‘idan olgan jarohat sababli Eriksenning o‘yin vaqti cheklanadigan bo‘ldi. Ammo 31 yoshli futbolchi jamoa uchun faqat foyda keltirdi.
Krishtianu Ronaldu
Ronalduning "MYU"ga qaytishini ikki xil qabul qilish mumkin. Masalan, uning klubdagi ilk mavsumi omadli kechdi. Portugaliyalik 2021-22 yilni jami 24 ta gol bilan yakunlagandi. Biroq, klub o‘sha mavsumni anti-rekord darajadagi kam ochko bilan tugatdi. Ikkinchi mavsum esa Ronaldu uchun yomon keldi. Kelishmovchiliklar fonida, Ronaldu ichidagi bor gapni aytib tashladi va klubni tark etdi.
Tom Xiton
Xitonning hikoyasi ko‘pchilikda, unga xayrixohlik uyg‘otadi. Darvozabon "qizil iblislar" safini tark etib, 11 yil davomida "Byornli" va "Aston Villa"da ikkinchi raqamli bo‘lib o‘tirdi. 2021 yili "MYU" yana uni sotib olgandi. Qaytib kelganidan beri Xiton jami 3 ta bahsda maydonga tushdi. U asosan ikkinchi yoki uchinchi darvozabon vazifasini bajarmoqda.
Edinson Kavani
Urugvay terma jamoasi a’zosining klubdagi ilk mavsumi ajoyib kechgandi. Kavanining aqlli harakatlari va bog‘lamlardagi ishi, uni jamoada asosiy figuraga aylantirdi. Ilk mavsumda Kavani 17 ta golga mualliflik qiladi. Ikkinchi mavsum esa mutlaqo boshqacha kechdi. Kavani jarohat oldi. Yetgmaganiga, uning asosiy tarkibdagi o‘rni Ronalduga berildi. Shunga qaramay, aytish mumkinki, Kavani erkin agent sifatida klubga kelgandi. Shu sababli, u jamoaga kamida ziyon keltirmadi.
Li Grant
Darvozabon "MYU"da 4 ta mavsum o‘tkazgan. Ammo shu davrda faqat 2 ta bahsda maydonga tushgan. Grant "Stok Siti"dan uchinchi darvozabon sifatida xarid qilinadi. Uning asosiy ishi zaxira o‘rindig‘ida o‘tirish edi.
Zlatan Ibragimovich
Ayni damda 41 yoshni qarshi olgan shvesiyalikni, vinoga o‘xshatish mumkin. U vaqt o‘tgan sari faqat kuchli va foydali bo‘lib bordi. Xarizmatik hujumchi 2016 yilda "MYU"ga keladi. Ibragimovich o‘zining birinchi mavsumida jami 28 ta golga mualliflik qilgandi. "Ferrari" shaydosi, MYU"dagi davrida 3 ta titulni qo‘lga kiritdi.
Bastian Shvaynshtayger
"Men "MYU"da baxtli edim. U paytlarni juda yaxshi eslayman. Jamoadagi murabbiy, futbolchi va xizmatchilarning hammasi yodimda turibdi. Afsuski, ikkinchi mavsum men uchun ancha qiyin kechgandi", – deya eslaydi futbolchi, o‘zining "MYU"dagi davrini. Shvaynshtayger Lui van Gal davrida jamoaga keladi va Angliya kubogini qo‘lga kiritadi. Joze Mourinyo esa germaniyalik futbolchini "daf" qilgandi.
Viktor Valdes
Sobiq "Barselona" darvozaboni "MYU" bilan bir yillik qisqa davrni o‘tkazadi. U David De Xeaga o‘rinbosar sifatida olib kelinadi. Valdes "qizil iblislar" bilan atigi ikkita bahsda maydonga tushadi.
ISMATOV J.