2019 yili «Shtutgart» safiga qo‘shilgan yaponiyalik yarim himoyachi Vataru Endo qisqa vaqt ichida Bundesliga klubining ajralmas qismiga aylandi.
Endo maydonda beg‘ubor qiyofasini o‘zgartirmasdan mudom faol harakatlanishi bilan ko‘pchilik e’tiborini o‘ziga tortdi. Xususan, tinim bilmas yaponning ketma-ket ikki mavsum davomida Germaniya chempionatida yakkama-yakka duellarning aksar qismida ustun kelayotgani keng darajada e’tirof etildi. Yaponiya milliy jamoasi yulduzining ushbu sa’y-harakati besamar ketmadi - unga «Shtutgart» sardorlik bog‘ichini ishonib topshirishdi. «Kunchiqar yurt» futbolining bugungi eng ilg‘or vakillaridan biri hisoblangan 30 yoshli yarim himoyachi yaqinda FIFA rasmiy sayti jurnalistlarining intervyu haqidagi iltimoslarini rad etmadi. Muxbirlar shu tariqa undan o‘yini sifatini qanday yaxshilagani haqida so‘rashdi, futbolchining Qatar mundialiga bog‘liq taassurotlari bilan qiziqishdi. Endo shuningdek, yaqin kelajak uchun o‘z oldiga qo‘ygan maqsadi yuzasidan berilgan savolga ham javob qaytardi.
- Vataru, «Shtutgart»ga o‘tganingizdan buyon o‘yinning qaysi elementi bo‘yicha yaqqol o‘sishga erishdingiz?
- O‘ylaymanki, Bundesligadagi tajriba va raqobat ortidan o‘yinim umumiy holda rivojlandi, har bir jihat ma’lum darajada yaxshilandi. Shubhasiz, nisbatan keskin kurash va tezkor futbolga asoslangan ligada o‘ynash mendan umumiy ko‘nikmalar, ayniqsa, texnik-jismoniy tayyorgarlik, maydonda tezkor qaror chiqarish kabi xususiyatlarni yaqqol rivojlantirishni talab qildi. Lekin shaxsiy fikrimcha, Germaniyadagi qisqa faoliyatim davomida avvalo, tayanch yarim himoyachi rolidagi xususiyatlarim sezilarli darajada yaxshilandi. Shuningdek, yakkakurashlarda ustun kelish masalasida ham oldinga qadam tashladim. Ehtimol, eng katta o‘zgarish aynan tayanch zonasidagi harakat ko‘lami va yakkama-yakka duellarga bog‘liqdir. Umuman, menda o‘yinning har bir elementi yaxshilanganini his qilyapman. Shuning barobarida hali mukammallashtiriladigan jihatlar ham yetarli, albatta.
- Bundesligada barqaror o‘yiningiz bilan nazarga tushdingiz. Tezlikni hamisha bir maromda ushlab turishingiz sirini ayta olasizmi?
- Barqarorlikda qandaydir alohida sir yo‘q, menimcha. Faqat shuni aytishim mumkinki, haftada bir marta murabbiy bilan yakka tartibda onlayn-rejimda qo‘shimcha mashg‘ulotlar o‘tkazaman. Ushbu dars maydonda jarohatlardan qanday qochish mummkinligiga qaratilgan. Oddiy aytganda, qo‘shimcha mashg‘ulotlar vositasida jismoniy tayyorgarlik darajasini nazorat qilish va o‘yin vaqti tanamdan to‘g‘ri foydalanishni o‘rganyapman. Muhimi, buning foydasi sezilyapti.
- Oxirgi 2ta JCHda Yaponiya milliy jamoasi tarkibidan joy oldingiz. Aytingchi, jahon chempionati siz uchun mohiyatan nimani anglatadi?
- Tabiiyki, bolaligimdan katta futbolchi bo‘lishni orzu qilganman. O‘sha vaqtdayoq o‘zim uchun yakdil xulosa chiqargandim - jahon chempionatida o‘ynash professional darajaga ko‘tarilganingni anglatadi. Oddiy ifoda etganda, mundialga eng yuqori bosqich sifatida qaraganman va shuni ko‘zlaganman. Afsuski, 2018 yili Rossiyada o‘tkazilgan jahon forumida yetarli o‘yin vaqtiga ega bo‘lmadim. Shunga qaramay, harakatni susaytirmadim va Qatar mundialida o‘zim xohlagan darajada to‘p surdim. Chunki bu vaqtga kelib, kuchli bosimga qanday qarshi turishni o‘rgandim. Futbolchi ming iqtidorli bo‘lmasin, agar maydonda bosimni yengolmasa, o‘zini aslo ko‘rsatolmaydi. Bunisi ruhiy tayyorgarlik darajasiga bog‘liq, albatta. O‘ylaymanki, hozir ruhiy muvozanatni qanday ushlash masalasida aniq tushunchaga egaman. Deylik, Qatarda shuning evaziga bosimni sezmadim, aksincha, bolaligimdan orzu qilgan sahnada o‘zimni erkin tutdim, emosional holatim yuqori bo‘ldi.
- «Samuraylar» JCH-2022da chakki taassurot qoldirishmadi va tarixda to‘rtinchi marta 1/8 final bosqichini zabt etishdi. Ikkinchi tomondan chorak finalga qadam tashlash yana orzuligicha qoldi. Sizningcha, Yaponiya milliy jamoasiga o‘z hayotida eng yuqori bosqichga ko‘tarilishi uchun nima kerak?
- O‘ylaymanki, avvalo, 1/8 final to‘sig‘iga yopishib olmaslik kerak. Chunki bu jamoa zimmasiga ortiqcha bosim yuklaydi. Biroq jahon chempionati starti yaqinlashgan sari Yaponiya ommaviy axborot vositalarida aynan shu masala bo‘rttiriladi, muxlislar ham hamisha 1/8 final dovoni haqida bong urishadi. Shaxsiy fikrimcha esa, jamoa oldiga muayyan raunddan o‘tish vazifasini qo‘yishning foydasidan zarari ko‘proq. Terma jamoaning aksariyat futbolchilari bu boradagi xulosamga qo‘shilsalar kerak. Qisqasi, bunday maqsadni qo‘yish mantiqan to‘g‘ri emas. Futbolda hammasi tabiiy ravishda rivojlangani ma’qul. Savolingizga kelsak, yaponiyalik futbolchilar Yevropaning kuchli chempionatlariga ko‘proq intilishlari kerak. Bu o‘yinning texnik va strategik elementlarini rivojlantirish uchun muhim. Demoqchimanki, Yaponiya milliy jamoasi yanada kuchayishini istasak, futbolchilarimiz APL kabi dunyoning eng yetuk ligalari va YECHLdek katta turnirlarda tajriba oshirishlari kerak. Hozirgi holatda esa, terma jamoamiz jahonning top-ligalarida, eng kuchli klublar boshlang‘ich tarkibida muntazam o‘ynaydigan ijrochilar guruhiga muhtoj.
- Yaqin kelajak uchun asosiy maqsadingiz nima, buni oshkor eta olasizmi?
- Avvalo, joriy mavsum «Shtutgart»ning Bundesligadan quyi divizionga tushib ketmasligiga imkon doirasida yordam berishim kerak. Terma jamoaga kelsak, hozirdan keyingi jahon chempionatiga tayyorgarlik boshlash talab etiladi. Katta savol shuki, saralash turniri boshlanishiga qadar nimaning evaziga o‘yinni yanada jadallashtirish mumkin? To‘g‘ri, ungacha keyingi yil boshida bo‘ladigan Osiyo chempionati bor. Demak, milliy jamoaga bog‘liq eng yaqin maqsad yanvar oyida boshlanadigan turnirga qaratilgan - Osiyo kubogida chempionlikka erishish! Agar shu vazifa uddasidan chiqsak, 2026 yilgi mundial saralashi oldidan jamoada umumiy kayfiyat ko‘tariladi va bu bizni ulkan maqsad sari dadil odimlashga undaydi.
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
