Murabbiylik maktabining yorqin vakillaridan biri bo‘lmish Karlo Anchelotti Braziliya terma jamoasi boshqaruvini 2024 yilning yozida o‘z zimmasiga oladi.
Bunga qadar jamoa Fernando Diniz rahbarligida JCH-2026 turnirining saralash bosqichi musobaqalarida ishtirok etadi va Amerika Kubogi turniriga tayyorgarlik ko‘radi.
Italiyalik mutaxassisni «pentakampeonlar» Qatar mundialidagi omadsizlikdan keyinoq Braziliyaga olib kelmoqchi edilar. Biroq don Karlo o‘sha yilning yozida «Real»dan boshqa jamoani boshqarmasligi, shartnoma muddati tugagach, faoliyatini yakunlashini ma’lum qilgandi. Aftidan, ummon orti vakillari murabbiyning ko‘ngliga yo‘l topgan ko‘rinadilar: Ispaniyada mavsum may oyining oxirida nihoyasiga yetadi, agar «Real» YECHLda finalga chiqsa, iyungacha cho‘ziladi. Xullas, Anchelotti Braziliya terma jamoasini 20 iyun sanasida AQSHda start oladigan Amerika Kubogi turniri arafasida o‘z tasarrufiga oladi. Bungacha jamoa Fernando Diniz rahbarligida faoliyatini davom ettiradi.
Fernando Diniz - 49 yoshli mutaxassis. Shu paytgacha faqat klubni boshqargan. Shu o‘rinda mavzuga oid qisqacha ma’lumot:
JCH-2022 turnirining chorak finalida Braziliya Xorvatiyaga imkoniyatni boy bergach (3:5), Tite o‘z lavozimini tark etdi. Bunday omadsizlikni kutmagan mamlakat futbol federasiyasi rahbariyati nomzod xususida bosh qotirmagandi. Shu sababli terma jamoa 20 yoshlilar jamoasining murabbiyi Ramon Mendeshga topshirildi. Uning rahbarligida jamoa 3ta o‘rtoqlik uchrashuvida maydonga tushgach, hamkorlik uzoqqa cho‘zilmasligi ayon bo‘lgandi.
Braziliyaliklar don Karloni shu yilning yozida kutishgandi. Biroq murabbiy «Real»dagi hamkorlikni barvaqt to‘xtatishni istamadi. Shu sababli jamoa o‘yin uslubi, g‘oyalari Anchelottinikiga yaqin murabbiyni qidira boshladi. Ma’lumotlarga ko‘ra, Braziliya FF prezidenti Ednaldo Rodriges oxirgi o‘rtoqlik uchrashuvlari arafasida Alison, Kazemiro va Markinyos kabi yetakchi o‘yinchilar bilan uchrashib, ularning fikr-mulohazalari bilan tanishgan, futbolchilar bir ovozdan Fernando Diniz nomzodini ma’qullashgan. Joriy yilda terma jamoadan chetda qolayotgan Neymar ham jamoadoshlaridan shu murabbiy uchun ovoz berishlarini iltimos qilgan. Mana uning o‘tgan yil yozidagi e’tirofi: «Fernando Diniz menga juda yoqadi. Afsuski, Braziliyadagilar unga juda oz e’tibor qaratadilar».
Endi mamlakat FF rahbari Ednaldo Rodrigesning fikr-mulohazalari bilan tanishing: «Uning futboldagi falsafasi hech qachon o‘zgarmagan, doimo bir xil uslubdan foydalanadi. Undagi taktik taraqqiyotni yoqtiraman. Asosiysi, uning uslubi Karlo Anchelottiniki bilan bir xil. Ularning dunyoqarashlari ham o‘xshash. Bu juda muhim ahamiyat kasb etadi».
Qizig‘i shundaki, 49 yoshli Diniz terma jamoadagi faoliyatini «Fluminense» klubini boshqarish bilan birgalikda olib boradi. «Flu»ni u 2022 yil avvalida o‘z tasarrufiga olgandi. 2009 yildan hozirga qadar murabbiy ish joyini naq 17 (!) marta almashtirdi. Ular orasida «Atletiko Paranayense», «Santos», Vasko da Gama» va «San-Paulu» kabi grandlar ham bor. Murabbiy 2 marta San-Paulu va bir marta Rio-de-Janeyro shtatlari chempionatlarida g‘olib chiqqan.
Fernando Diniz terma jamoaning qaysi uchrashuvlarini boshqaradi? Unda omadsizlikka duch kelish xavotiri umuman yo‘q. Vaqtincha bosh murabbiy lavozimini bajarishi lozim bo‘lgan Diniz terma jamoani 8ta uchrashuvga tayyorlaydi: 6tasi JCH-2026 turnirining saralash bellashuvlari va 2tasi o‘rtoqlik uchrashuvlari. Shuningdek, unga 2024 yil yozida Karlo Anchelottining murabbiylar shtabidan joy olish va Olimpiya terma jamoasini Parij-2024 turniriga olib borishni taklif etishdi. Diniz hozircha rozilik bildirdi, lekin tayinlov rasman tasdiqlangan emas.
Vaqtinchalik murabbiyning «pentakampeonlar»dagi debyutini sentyabr oyida, AQSH mundiali saralash bosqichining Boliviya terma jamoasiga qarshi uchrashuvida nishonlaydi. Keyin uning jamoasi Peru bilan kuch sinashadi. Umuman, yangi yilning yoziga qadar «Selesao» Venesuela, Urugvay, Kolumbiya va Argentina jamoalariga qarshi maydonga tushadi. Bundan tashqari, Fernando Diniz Amerika Kubogi turniri arafasida o‘z shogirdlarini Yevropadagi 2ta o‘rtoqlik uchrashuvida sinovdan o‘tkazadi. Raqiblarning biri - Ispaniya, ikkinchisi hozircha, ma’lum emas.
Nima bo‘lganda ham, vaqtinchalik bosh murabbiy oldida uddalash qiyin bo‘lgan, Anchelottining JCH-2026 yo‘llanmasini qo‘lga kiritishiga monelik qiladigan vazifalar yo‘q. Chunki qit’aning 10ta terma jamoalaridan 6tasi mundialda ishtirok etadi, yettinchi jamoa to‘qnash uchrashuvlari orqali yo‘llanmani qo‘lga kiritishi mumkin. Rekordchi chempionning turnirdan chetda qolishini esa, hatto tasavvur qilish ham oson emas.
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
