Angliyaning gigant klublari tarixda ko‘plab omadli xaridlarni amalga oshirgan. Ammo shunday transferlar ham bo‘lganki, ular «Arsenal», «Liverpul» yoki «MYU»ning o‘yin uslubi va qarashlarini butunlay o‘zgartirib yuborgan. Ularning ayrimlari jamoa tarixida yangi davrni boshlab bergan. Quyida shunday futbolchilardan tuzilgan ramziy terma jamoa bilan tanishasiz. Planetfootball.com sayti ularni 4-4-2 taktik sxemasiga joylashtiribdi.
Darvozabon: Petr CHEX
«Chelsi» 2004 yilda «Renn»dan yoshgina darvozavon sotib oladi. O‘shanda 21 yoshli Chexni nimalarga qodir ekanini deyarli hech kim bilmasdi. Uning kelajagini muxlislar tasavvur ham qilishmagan. Chexiya afsonasi o‘zining debyut mavsumidayoq APLda 15tagina gol o‘tkazib, chempionga aylangandi.
Markaziy himoyachi: Virjil VAN DEYK
2017-18 yilgi mavsum Klopp jamoasi uchun zo‘r boshlanadi. Jamoa g‘alabalarga erishadi. Ammo bir muammo bor edi. U ham bo‘lsa, himoyada. Shu sababli 2018 yilning yanvarida 75 million funt evaziga Virjil van Deyk olib kelindi. Mavsum yakunida hammasi darrov sezildi. «Liverpul» YECHL finaliga yetib bordi. APLda esa chempion bo‘la olmagan bo‘lsa ham, 90dan ko‘proq ochko to‘play oldi.
Markaziy himoyachi: Sol KEMPBELL
2001 yilda kutilmagan voqea yuz beradi. «Tottenxem»da 300dan ortiq o‘yinlar o‘tkazgan Kempbell «Arsenal»ga yo‘l oladi. Bu voqea Arsen Venger jamoasining 2002 yilni chempionlik bilan tugatishiga sabab bo‘ladi. Kempbell «Arsenal» himoyasini yangi darajaga olib chiqqan edi. Bu narsa 2003-04 yilgi mag‘lubiyatsiz mavsumda o‘z aksini topadi.
O‘ng qanot himoya: Kiran TRIPPYER
«Atletiko» bilan 2021 yilgi La Liga chempionligini yutgach, Trippyer yana APLga yo‘l oldi. 2022 yilning yanvarida ligada qolish uchun kurashayotgan «Nyukasl», himoyachini sotib oladi. Trippyer kelgach, hammasi o‘zgardi. Jamoa xavfli hududdan jadval yuqorisiga ko‘tarildi.
Chap qanot himoya: Patris EVRA
Balki Evra «MYU»da unchalik katta o‘zgarishlarga sabab bo‘lmagandir. Ammo u, shubhasiz, Fergyuson jamoasining eng yaxshi davrlarida, eng yaxshilardan biri edi. 2005-06 yilgi mavsumning qishida xarid qilingan himoyachi, darrov jamoaga kirishib ketadi. 24 yoshli futbolchi shundan keyin 3ta APL, 3ta liga kubogi va YECHL bosh sovrinini 8 yarim yil davomida qo‘lga kiritdi.
Markaziy yarim himoyachi: KAZEMIRO
Oradan atigi bir yil o‘tganiga qaramay, Kazemironi bemalol o‘zgartiruvchi effektga ega futbolchi bo‘ldi deya olamiz. Uning kelishi «MYU»ni titul yutishini ta’minladi. Bundan oldin, 6 yil davomida «qizil iblislar» hech vaqo yuta olmagandi. Kazemiro esa maydon markazida turib, ham hujumni, ham himoyani yaxshilanishiga xizmat qildi.
Markaziy yarim himoyachi: Kevin DE BRYUYNE
«Manchester Siti» 2015 yilda rekord summa, 55 million funt evaziga De Bryuyne xaridini amalga oshiradi. Uning kelguniga qadar ham «shaharliklar» maydon markazida David Silva va Yaya Turelar bilan APLda g‘olib bo‘lishga ulgurgan. Biroq, butunlay dominantlik qilish De Bryuyne bilan, Gvardiola davrida boshlanadi. Futbolchi o‘z klassini namoyish etishda davom etib kelmoqda.
O‘ng qanot vingeri: Muhammad SALOH
Saloh 2017 yilning yozida «Roma»dan olib kelinadi. U Klopp «Liverpul»ida ko‘p narsani o‘zgartira olgan figuraga aylanadi. Yangi mavsumdagi mersisaydliklarning muvaffaqiyatlari asosida aynan Saloh fenomeni yotgandi. Hujumchi mavsumni jami 32ta gol bilan tugatadi.
Chap qanot vingeri: Eden AZAR
Azar 2012 yilning yozida «Chelsi»ga kelgan va 7 yil davomida YECHL g‘olibligiga erisha olmagan. Ammo uning darajasi sabab London klubi boshqa sovrinlarga ega chiqadi. Belgiyalik «Chelsi» bilan 352ta bahsda 110ta gol va 92ta assistga mualliflik qilgan edi. Azar sababli jamoa hujumi o‘zgacha tus oladi.
Markaziy hujumchi: Erik KANTONA
Fransuz futbolchisining 1992 yilda «MYU»ga kelishi, ko‘p narsani o‘zgartirgan. Aynan Kantona sababli Fergyuson jamoasi may oyida APLning ilk mavsumi chempioniga aylanadi. Aytish mumkinki, Kantona kabi 30 yilda hech bir futbolchi katta ta’sirga ega bo‘la olmadi.
Markaziy hujumchi: Tyerri ANRI
1997-98 yilgi mavsum «Arsenal» uchun chempionlik bilan tugaydi. Ammo jamoaga hujumchi zarur edi. Shu sababli rekord summa evaziga 1999 yilda Anri olib kelinadi. Uning kelishi «MYU» bilan tengma-teng kurasha oladigan jamoani shakllantirdi. Anri «Arsenal»dagi 7 mavsumi davomida 370ta o‘yinda 226ta gol uradi. Bu davr esa klubning eng shonli paytlari edi.
A.ABDUVALIXO‘JAYEV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
