«Brayton» topilmasi - Evan Fergyuson 29 oktyabr kuni APL 10-turidan o‘rin olgan «Fulxem»ga qarshi o‘yin (1:1)da navbatdagi golini nishonlash asnosida alohida natijaga erishdi.
Aniqroq aytsak, 19 yoshli hujumchi APLda muayyan yil taqvimida 10ta gol marrasiga yetgan ikkinchi yosh futbolchiga aylandi. Bu boradagi rekord 2005 yili Ueyn Runi tomonidan o‘rnatilganini eslatish kerak. Xullas, hozirda Evanni Angliya milliy jamoasi tarixidagi eng yaxshi to‘purar sanalgan «Shrek» bilan taqqoslash yana avj oldi. E’tiborlisi, mashhur familiya egasi kimsan Runi bilan tenglashtirilayotganidan xursand. Aytishicha, bunday qiyoslash unga qo‘shimcha motivasiya bag‘ishlaydi.
- Mana, joriy yil hisobidan APLda 10ta gol marrasiga yetdingiz. Chempionat tarixida birgina Ueyn Runi muayyan yilda 10-golini sizdan yoshroq payti nishonlagan...
- Ha, yomon emas, chindan ham, yaxshi natija. Ayniqsa, bolaligimda aynan Ueyn Runi o‘yinlarini tomosha qilib, unga o‘xshashga intilganimni hisobga olsak. Xullas, Runi ortidan borayotganimdan xursandman.
- Demak, sizni Ueynga qiyoslashayotganida ham ma’no bor. Qiziq, bolalikda Runi o‘yinlariga nechog‘li mahliyo bo‘lgansiz?
- Ueyn o‘smirlik chog‘iyoq APL jamoasi asosiy tarkibiga kirish asnosida nafaqat men, balki ko‘plab yosh yigitlarga o‘ziga xos namuna ko‘rsatgani - ayni haqiqat. Yashirmayman, unga havas bilan boqqanman. Shubhasiz, Runi katta iqtidor edi. Deylik, yoshligida shiddat bilan o‘ynagani va qanday ishlarni amalga oshirgani hozir aqlga sig‘maydi. Xususan, Runi faoliyati haqida olingan hujjatli filmni tomosha qilsangiz, imkonsizdek ishlarni uddalaganini tushunasiz. Bilasizmi, hozir nimalarni nazarda tutyapman? Ko‘pchilik Runi natijalarini takrorlash imkonsiz ekanligini aytadi. Lekin teran o‘ylasak, bunday natijalar futbolning bir qismi. Axir Ueyn 18-19 yoshida APLga yorib kirib, barchasini amalda isbotlagan-ku. Uning faoliyati - yoshlarga haqiqiy ko‘zgu.
- Siz uchun yaxshi xabar shuki, «Brayton» 2023 yil yakuniga qadar APLda yana 9ta o‘yin o‘tkazadi. Bu Runining 2005 yili 20 yoshiga qadar qayd etgan mahsuldorlik ko‘rsatkichini yaxshilashingiz uchun ajoyib imkoniyatdir...
- Albatta, Runi rekordini yangilashdan umidvorman. Har holda, bunga harakat qilishim tabiiy.
- Sentyabr oyida «Nyukasl» darvozasiga 3ta gol urdingiz va shundan ko‘p o‘tmay, jarohatlanib, safdan chiqdingiz. Aks holda, allaqachon Runidan o‘zib ketarmidingiz...
- Bilmadim, lekin tig‘iz pallada chetda qolganimdan qattiq siqildim. Ayniqsa, jarohat xronologiyasini o‘ylasam, o‘zimdan xafa bo‘lib ketaman. Chunki avvaliga arzimas jarohatga yo‘liqdim va tezda qaytib, yana safdan chiqdim. Balki shoshilmaslik kerakmidi? Lekin bu taqdir, undan esa qochib qutulolmaysiz. Muhimi, hozir yaxshi holatdaman.
- «Qarg‘alar»ga qarshi o‘yindagi «xet-trik» obro‘ngizni ancha oshirdi. Ya’ni ko‘plab mutaxassislar sizni maqtashga tushishdi, jumladan, afsonaviy Alan Shirer o‘yiningizga yuqori baho berdi. Irlandiyada esa sizni ancha oldin milliy jamoa kelajagi sifatida ta’riflay boshlagandilar. Bunday maqtovlar qo‘shimcha bosim yuklamayaptimi?
- Yo‘q. Har holda, qandaydir bosimni yaqqol his qilmayapman. Aksincha, Shirer kabi afsonalarning maqtovi yosh futbolchini ruhan tetiklashtiradi. Axir tanqiddan maqtov yaxshi-ku, baribir. Shunday ekan, e’tirof uncha yomon emas, faqat ularga berilib ketmaslik talab etiladi. Zero, barchasi shunchaki, baho. Siz maydonda mahoratingizni ko‘rsatasiz, chetdagilar esa fikr bildirishadi. Xullas, hamma o‘z bahosini beradi, ularni qanday qabul qilish esa har bir futbolchining o‘zigagina bog‘liq. Irlandiyada menga katta umid bog‘layotganlariga kelsak, bundan chinakamiga g‘ururlanaman. Agar mamlakatim bosh jamoasida ishonchni oqlay olsam, bu dunyoda mendan baxtiyorroq odam topilmaydi. Hozir bizda yosh va salohiyatli tarkib bor, umid qilamanki, jamoamiz hali ancha kuchayadi. Bir necha yil ichida Irlandiya futbolining katta turnirlarga qaytishiga ham ishonaman, albatta.
- Evan, «Brayton» joriy mavsum YELda ham ishtirok etyapti. Zich taqvim og‘irlik qilmayaptimi?
- Ha, o‘yinlar orasida tiklanish uchun vaqt kam, lekin yevrokuboklardagi ishtirokdan shunchaki, zavqlanyapman. Qolaversa, futbolchi uchun doimiy bandlik ayni muddao. Binobarin, har bir o‘yin - yangi tajriba. Jamoa shunday tajribalar ortidan shakllanib boradi, futbolchilar ham, albatta.
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
