Tan olish kerak, mamlakatimizda ko‘plab sohalar qatori futbolda ham o‘sish kuzatilmoqda.
Bunga so‘nggi yillarda yoshlar sektoriga ulkan e’tibor qaratilayotgani sababdir, albatta. Fikrimiz isboti o‘laroq, keng ko‘lamda zamonaviy futbol maktablari ishga tushirilayotganini keltirish mumkin. Ularda muhayyo qilingan sharoitlar tahsinga sazovor holatda. Ayniqsa, mashg‘ulot jarayoni uchun maydonlar, sport liboslari va hokazo...
Biz uchun quvonarlisi, yurtimizda yildan yilga oliy talablarga javob beradigan futbol dargohlari ko‘payib bormoqda. Muxlislarga allaqachon ma’lum bo‘lib ulgurgan «Paxtakor» va «Bunyodkor» (Toshkent), «Nasaf», «Mash’al» hamda «Sho‘rtan» (Qashqadaryo vil.) akademiyalari qatori qolgan barcha viloyatlarda futbol maktablari birin-ketin faoliyat boshlamoqda. Jumladan, «Odil Junior» maktabi ham oxirgi yillar jadal rivojlanmoqda. Dono xalqimizda ajoyib bir naql bor: «Qilingan mehnat samarasiz qolmas». Qisqasi, reja bo‘yicha amalga oshirilayotgan ishlar o‘zbek futbolida o‘z samarasini ko‘rsata boshladi.
Qarang, turli yosh toifasiga mansub terma jamoalarimiz nafaqat Osiyo, balki jahon arenalarida ham o‘z so‘zini baralla aytmoqda. Xususan, o‘smirlar va yoshlar terma jamoalarimiz qit’ada chempion bo‘lishga ulgurdi. Har ikki yosh toifasidagi jamoamiz kichik mundiallarda ham munosib ishtirok etmoqda. Ravshan Haydarov boshqaruvidagi yoshlar terma jamoamizni tilga olishimiz bilan qit’a birinchiligidagi qorli final yodimizga tushadi. Shu holda olimpiyachilarimiz finalda Vyetnam yoshlar termasini matonat bilan mag‘lubiyatga uchratishganini maroq bilan eslaymiz. Ravshan Haydarov shu bilan cheklanib qolmay, o‘tgan yili 20 yosh toifasidagi futbolchilar bilan ham Osiyo chempionatida g‘alabani ta’minladi. Yoshlarimiz keyinchalik mundialda ham chakki ishtirok etishmadi. 2023 yili Temur Kapadze boshqaruvidagi olimpiya terma jamoamiz ham Osiyo o‘yinlarida sovrindorlar qatoridan joy oldi. Jamoliddin Rahmatullayev shakllantirgan o‘smirlar termasi esa o‘z toifasida qit’a yetakchilari qatorida e’tirof etildi. Yakunda o‘smirlarimiz ham kichik mundialga yo‘l olib, Indoneziya maydonlarida chakki taassurot qoldirishmadi. Yigitlarimiz ayniqsa, guruh raundida ispaniyalik tengqurlariga qarshi kechgan bahsda kuchli matonatga ega ekanliklarini namoyon etishdi.
Aynan o‘smirlar va yoshlar terma jamoalarida toblangan iqtidorlarimiz bugun Yevropaning kuchli chempionatlariga talpinishmoqda. Xususan, Abduqodir Husanov («Lans»), Abbos Fayzullayev (SSKA), Umarali Rahmonaliyev («Rubin») kabi yigitlarimizni bo‘lajak yulduzchalarimizga o‘rnak sifatida ko‘rsatishimiz mumkin. Tabiiyki, bu kabi yutuqlar o‘z-o‘zidan kelayotgani yo‘q, albatta. Yuqorida ta’kidlaganimizdek, barchasining ortida mamlakatimiz bo‘ylab keng yoyilayotgan futbol maktablari turibdi. Hozir bemalol ta’kidlash mumkin - O‘zbekiston o‘z «futbol fabrikalari»ga ega mamlakat!
Samandar ARABOV
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
