Italiya. Eldor Shomurodov nihoyat, maydonga qaytdi va «Kalyari» 6ta o‘yinga cho‘zilgan g‘alabasiz seriyasiga chek qo‘ydi.
«A» seriya 27-turidan o‘rin olgan «Empoli»ga qarshi safar uchrashuvi masalasini yagona gol hal qildi. Hamyurtimiz esa 87-daqiqada maydonga tushdi. Ma’lumot uchun, Shomurodov 2 oy oldin jarohatlangan edi.
Fransiya.
«Lans» himoyachisi Abduqodir Husanov 29 fevral kuni tug‘ilgan ayyomini nishonladi. Shu munosabat bilan lensois.com sayti hamyurtimizni alohida qutladi: «2004 yilning 29 fevral kuni O‘zbekiston poytaxti - Toshkentda tug‘ilgan «Lans» futbolchisi Abduqodir Husanov 20 yoshga to‘ldi. Iste’dodli himoyachi Fransiya chempionati ikkinchi qismida o‘zini ko‘rsatib, ko‘proq amaliyotga ega bo‘lishdan tashqari, joriy yil mart va iyun oylarida o‘tkaziladigan JCH saralash o‘yinlarida O‘zekiston milliy jamoasining muhim ijrochilaridan biriga aylanishi kerak. Hozircha lensois.com nomidan Abduqodirni tug‘ilgan kuni bilan muborakbod etamiz». 3 mart kuni esa Husanov «Lion»ga qarshi safar o‘yini (3:0)ning 87-daqiqasida maydonga tushirildi.
Rossiya.
«Rubin» RPL 19-turi doirasidagi safar o‘yinida chempionat peshqadami - «Krasnodar»dan ochko tortib oldi (1:1). E’tiborli tomoni, Qozon jamoasini mag‘lubiyatdan qutqarib qolgan golga so‘nggi daqiqada Rustam Ashurmatov mualliflik qildi. Shu kuni O‘zbekiston milliy jamoasi himoyachisi to‘liq vaqt to‘p surgan bo‘lsa, «Rubin»dagi yana bir vakilimiz Umarali Rahmonaliyev zaxirada qoldi. «Har bir o‘yindan oldin standart vaziyatlar ustida ishlaymiz. Ya’ni bunga tayyor edim. To‘g‘risi, gol sari borgandik. Agar men bo‘lmaganimda ham, gol urardik, baribir», - dedi burchak zarbasidan keyin to‘pni boshi bilan chiroyli tarzda raqib darvozasiga yo‘llagan hamyurtimiz o‘yindan keyin. SSKA aksincha, o‘z maydonida «Orenburg» bilan o‘yinning 90+3-daqiqasida qo‘yib yuborilgan gol tufayli g‘alabani qo‘ldan chiqardi - 1:1. «Armiyachilar» yarim himoyachisi Abbos Fayzullayev ushbu uchrashuvning 73-daqiqasiga qadar maydonda doimgidek faol ko‘rindi.
Eron.
«Persepolis» Oston O‘runovning debyut o‘yinida «Zob-Ohan» maydonidan 1ta gol va 3 ochko bilan qaytdi. Hamyurtimiz Eron chempionati 18-turidan o‘rin olgan mazkur bahsning 66-daqiqasida zaxiradan maydonga tushdi. «Istiqlol» (Huziston) esa Doston Tursunov to‘liq vaqt to‘p surgan bahsda «Traktorsozi»ga 0:2 hisobida imkoniyatni boy berdi. Peshqadam «Istiqlol»ga kelsak, Jaloliddin Masharipov jamoasi «Sepahon»ni yagona gol evaziga dog‘da qoldirdi. Tehron klubi boshlang‘ich tarkibida maydonga tushgan o‘zbekistonlik yarim himoyachi 77-daqiqada zaxiraga olindi.
Turkiya.
«Rizespor» Superliga 28-turida «Qaysarispor»dan yaqqol ustun keldi - 3:0. G‘olib jamoa himoyachisi Husniddin Aliqulov to‘liq 90 daqiqa to‘p surgan bo‘lsa, mag‘lub tomon yarim himoyachisi Otabek Shukurov maydondan chetda qoldi. Aziz Turg‘unboyev 90+4-daqiqagacha to‘p surgan bahsda esa «Sivasspor» jamoasi «Qosimposho» darvozasiga yo‘l topolmadi - 0:0. Mashhur Arda Turon boshqaruvidagi «Eyupspor» esa kelasi mavsum Superligada qatnashish masalasini deyarli hal qildi. Jahorgir O‘rozovning jamoasi Birinchi liga finishiga 10ta tur qolgan bir pallada eng yaqin ta’qibchisi «Gyuztepe»dan 11 ochko ilgarilab ketdi. To‘g‘ri, hamyurtimiz «Eyupspor»ning so‘nggi o‘yinlarida hattoki qaydnomaga ham kiritilmayapti.
BAA.
Hojimat Erkinovning klubi «Al-Vahda» mamlakat chempionati 15-turida «Al-Jazira»ni qabul qilib, qiyin g‘alabaga erishdi - 3:2. Legionerimiz bunga 90 daqiqalik faolligi bilan munosib hissa qo‘shdi. «Xorfakkan» - «Shabab Al-Ahli» o‘yinida esa ikki hamyurtimiz maydonda o‘zaro to‘qnash keldi. Ya’ni mezbonlar himoyachisi Abdulla Abdullayev va mehmonlar yarim himoyachisi Aziz G‘aniyev boshlang‘ich tarkibdan joy olishdi. Biroq har ikki legionerimiz tanaffusda almashtirildi. «Xorfakkan»ning oldingi o‘yinida gol urgan Aziz Amonov esa 67-daqiqada safga qo‘shildi. «Shabab»ning 3:0 hisobidagi g‘alabasi bilan yakunlangan bahsda Aziz G‘aniyev va Aziz Amonov sariq kartochka olishganini ham aytish kerak.
Qozog‘iston.
«Qayrat» yangi mavsumni o‘z maydonida «Qiziljar»ga qarshi o‘yin bilan boshladi va 2:1 hisobida g‘alaba qozondi. Qishda qo‘shni yurt chempionatiga yo‘l olgan Ibrohimxalil Yo‘ldoshev to‘liq 90 daqiqa harakatlanib, «Qayrat» tarkibida ajralib turdi. Amaldagi chempion - «Ordabasi» startda «Shaxtyor» darvozasiga javobsiz 5ta gol urdi. E’tiborli tomoni Shimkent jamoasining boshlang‘ich tarkibiga kirgan hamyurtlarimiz Jasur Yaxshiboyev va Shahboz Umarov bu uchrashuvda o‘z hisoblariga 1tadan gol hamda assist yozdirib qo‘yishdi. Jasur tanaffusda o‘z o‘rnini zaxira vakiliga bo‘shatib bergan bo‘lsa, Shahboz 65-daqiqagacha maydonda bo‘ldi. Yakunda bir bo‘lim harakatlangan Yaxshiboyev uchrashuvning eng yaxshi futbolchisi sifatida maxsus sovrin oldi. «Qaysar» safiga qo‘shilgan Shohnazar Norbekovgina startda yetarli amaliyotga ega bo‘lmadi. U «Aktobe»ga qarshi kechgan omadsiz uy uchrashuvi (1:3) 80-daqiqasida maydonga tushirildi.
Surxon
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
