Futbol bo‘yicha Yevropa Chempionlar Ligasining yarim finalida “Borussiya D” va “PSJ” 1 may, chorshanba kuni o‘zaro to‘qnash keladi. Dastlabki o‘yin Dortmundda bo‘lib o‘tadi. Quyida mazkur uchrashuvga oid ma’lumotlar va qiziqarli faktlar taqdim etiladi.
G‘alabaga chanqoq “Borussiya D”
Edin Terzich jamoasi chorak finalda “Atletiko”ni (4:2, 1:2) mag‘lub etib, yarim final yo‘llanmasini qo‘lga kiritdi. Bundesligadagi 5-o‘rin esa (kafolatlangan) “Borussiya” uchun keyingi mavsum Chempionlar Ligasiga chiqish imkonini bermaydi. 2024/25-yilgi mavsum guruh bosqichida ishtirok etish uchun joriy mavsum chempionlikni qo‘lga kiritishi zarur.
Daniyel Malen, Abdulaye Kamara, Sebastyan Aller va Rami Bensebaini jarohat sababli ushbu o‘yinni o‘tkazib yuboradi. Yan Matsen va Emre Jan kabi futbolchilar esa safga qaytgan.
Finalni maqsad qilgan “PSJ”
O‘tgan haftada parijliklar Fransiya chempionligini rasmiylashtirdi. Chempionlar Ligasida esa jamoa turlicha o‘yin namoyish etmoqda. Chorak finalda “Barselona”ga birinchi o‘yin boy berildi (2:3). Javob o‘yinida esa 4:1 hisobida zafar quchib, keyingi bosqichga yo‘l oldi. Ushbu o‘yinda kataloniyaliklar futbolchisi Arauxoning qizil olishi butun o‘yin kartinasini o‘zgartirib yubordi.
“PSJ” bugungi o‘yinda Presnel Kimpembening xizmatlaridan foydalana olmaydi. Shuningdek, uzoq muddatdan buyon lazaretda yotgan Serxio Riko ham qaydnomadan joy olmagan.
O‘yin oldidan qiziqarli faktlar:
“Borussiya D” ilk va hozircha so‘nggi bor Chempionlar Ligasida g‘alaba qozonganiga 27 yil bo‘ldi;
To‘rt yil oldin “PSJ” chempion bo‘lishga yaqin kelgandi va finalda imkoniyatni boy berib qo‘ygandi;
“PSJ” o‘tgan haftada Fransiya chempionligini qo‘lga kiritdi. E’tiborlisi, parijliklarning o‘zi emas, uning eng yaqin ta’qibchisi ochko yo‘qotishi hisobiga bu chempionlikka erishildi;
“PSJ” so‘nggi 30 o‘yindan 29 tasida mag‘lub bo‘lmagan;
“Borussiya D” turnirning 7 ta o‘yinidan 6 tasida mag‘lubiyat nimaligini bilmay kelmoqda.
“Borussiya D” — “PSJ” o‘zaro o‘yinlar tarixiga nazar:
Ushbu mavsumda jamoalar guruh bosqichidayoq o‘zaro to‘qnash keldi. Parijda mezbonlar 2:0 hisobida g‘alaba qozongan bo‘lsa, Germaniyadagi o‘yin 1:1 hisobi bilan yakunlangan.
Yana bir qiziq jihati, hozircha o‘z tarixida yagona bo‘lib turgan Chempionlar Ligasi finaliga “PSJ” aynan dortmundliklarni mag‘lub etib, yo‘l olgandi. Birinchi o‘yinda Parij klubi 2:0 hisobida g‘alaba qozongan va javob o‘yinida 1:2 hisobida mag‘lub bo‘lgandi.
Murabbiylarning o‘yin oldi fikrlari
G‘alaba uchun bor imkoniyatimizni ishga solishimiz zarur. Yarim finalga chiqqan jamoalar ichida eng kuchsizi bo‘lib ko‘rinayotgandirmiz, lekin eng g‘alabaga chanqoq jamoaligimiz aniq. “Uembli”ga borish uchun bor kuchimiz bilan harakat qilishimiz kerak.
180 daqiqa tinmasdan mehnat qilishimiz lozimligini tushunib turibman.
Edin Terzich, “Borussiya D” bosh murabbiyi
“PSJ” favorit? Mana nima uchun matbuot futbol haqida hech narsa bilmasligini doim ta’kidlab kelaman. Finalga chiqishdan tashqari istalgan natija yarim finalda ishtirok etayotgan jamoalarni xafa qilishi tayin.
O‘yin xuddi chorak finaldagidek qiyin kechadi. O‘z o‘yinimizni ko‘rsatib, g‘alaba qozonishga urinamiz. Uchrashuv qiziqarli va gollarga boy o‘tadi.
Luis Enrike, “PSJ” bosh murabbiyi
“Borussiya” va “PSJ” o‘rtasidagi uchrashuv O‘zbekiston vaqti bilan 1 maydan 2 mayga o‘tar kechasi 00:00 da start oladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
