Aytish shart emas, vodiy, xususan, Namanganda futbolga qiziqish yuqori darajada.
Deylik, «Navbahor» mamlakatimizda muxlislar tashrifi bo‘yicha hamisha yetakchi o‘rinlardan joy olib keladi. Bundan tashqari, ijtimoiy tarmoqlarda klub muxlislari tomonidan tashkil etilgan guruh va kanallar ham talaygina. Mavsum yakunida shunday guruhlardan biri «Navbahor» rasmiy fan-klubi» kanalida jamoa himoyachisi Saidazamat Mirsaidov bilan samimiy muloqot uyushtirdi. Quyida shu suhbatning yozma shakli e’tiboringizga havola etilmoqda.
- Saidazamat, «Navbahor» safida o‘ynayotganingizdan bag‘oyat mamnunmiz. Eshitishimizcha, davralar oralig‘ida xizmatingizga «Paxtakor» ham jiddiy qiziqqan edi. Aytingchi, aynan Namangan klubi taklifini qabul qilishingizda qaysi jihat bosh omil bo‘ldi?
- Ha, chindan ham, «Paxtakor» sobiq klubim - «Olimpik»ning bir qator yetakchilari qatori menga ham taklif bilan chiqqandi. Ammo muzokara jarayoni yakuniy bosqichgacha yetib bormadi. Bu orada «Navbahor» vakillari ancha ishonarli kelishuv asosida chaqirishdi va yakunda Namanganda o‘ynashni ma’qul ko‘rdim.
- Aslida «Paxtakor» maktabi tarbiyalanuvchisi hisoblanasiz. Ammo faoliyatingizni boshqa klublarda davom ettirmoqdasiz. Buning sababi ko‘pchilik uchun qiziq...
- «Paxtakor»dan 2020 yil oxirida ketganman. O‘shanda yoshlar jamoasida o‘ynardik. Mavsum yakunlangach, bir qator safdoshlarim va bizni uzoq vaqt shug‘ullantirgan murabbiylarimiz boshqa jamoalarga yo‘l olishgandi. Xullas, sheriklarimdan ayrilgach, men ham «Paxtakor» tizimida qolishni istamadim. Bu orada «Olimpik» loyihasi boshlandi va faoliyatimni Temur Kapadze qo‘l ostida davom ettirdim.
- «Navbahor» muxlislari sizni kelasi yili ham jamoada ko‘rishdan umidvorlar. Bu borada shaxsiy rejalaringizni oshkor eta olasizmi?
- Mamnuniyat bilan aytishim mumkinki, amalda yana 1 yillik shartnomam bor. Agar rahbariyat «Navbahor»da faqat mahalliy futbolchilarni o‘ynatish yo‘lidan bormasa, unda kelasi mavsum ham Namanganda to‘p suraman. Ayni payt boshqa klublardan ham takliflar tushmoqda, lekin o‘zimga qolsa, hozircha «Navbahor»dan ketmayman.
- Jamoa «Andijon»ga qarshi kechgan kubok finalida burchak zarbalaridan so‘ng gollar qo‘yib yubordi. Aksiga olib, raqibning uchinchi goli bilan tugagan standart vaziyatga siz sababchi bo‘ldingiz. Aslida o‘sha holatda to‘pni burchak emas, yon chiziq tomon tepib yuborish ham mumkin edi-ku...
- Tan olaman, maydondagi holatni baholashda shoshilib qoldim, lekin burchak zarbasi mutlaqo boshqa epizod-ku. Deylik, men tufayli penalti belgilangani yo‘q yoki raqibga to‘pni oldirib ham qo‘ymadim... To‘pni burchakdan o‘yinga kiritilishi - bu mohiyatan yangi epizod. Shunday ekan, «Andijon»ning uchinchi golida yolg‘iz meni ayblash unchalik to‘g‘ri emas. O‘sha kuni standart vaziyatlarda mutlaqo ishonchsiz harakatlanganimiz esa ayni haqiqat.
- Kubok finali faoliyatingizdagi eng alamli o‘yin bo‘lsa kerak...
- Hozirga qadar finalda ikki marta mag‘lubiyat alamini totib ko‘rdim. Eng og‘riqlisi darhaqiqat, Farg‘onadagi o‘yin.
- «Navbahor»ning bir o‘yinda beshtalab gol urishini anchadan buyon ko‘rmayotgandik. Mavsum yakuniga kelib mahsuldorlik keskin oshgani o‘yin uslubi o‘zgarganiga bog‘liqmi yoki...?
- E’tibor qaratgan bo‘lsangiz, ikkinchi davrada ancha hujumkor va ochiq futbol namoyish etdik. Biroq ba’zi uchrashuvlarda vaziyatlardan samara chiqarishda oqsadik. So‘nggi turlarda esa bu borada omadimiz chopdi. Ehtimol, murabbiy ko‘rsatmalarini to‘g‘ri bajara boshlagandirmiz, balki finish marrasida o‘yinimiz ham mukammal darajada shakllangandir...
- «Navbahor»ga sobiq ustozingiz Temur Kapadzening kelishi ehtimoli haqida gap-so‘zlar ko‘paygandi. Sizningcha, nisbatan yaxshi natijalar qayd etgan Sergey Lushanga ishonch bildirish kerakmi yoki yangi mavsumga Kapadze boshqaruvida tayyorgarlik ko‘rish maqsadga muvofiq?
- O‘zingiz ta’kidlaganingizdek, Sergey Lushan qisqa vaqtda «Navbahor» natijalarini ancha yaxshiladi. Qolaversa, u o‘sib kelayotgan yoshlarga qo‘rqmasdan ishonch bildirdi. Klubning kelgusi rejalari ham ayni shu tamoyilga asoslangan. Ya’ni «Navbahor»ni qaysi murabbiy boshqarishidan qat’iy nazar, kelasi yilgi reja va maqsadlar aniq belgilangan. Menimcha, har ikki murabbiy tanlangan ushbu strategiya asosida samarali ish yurita oladi. Menga qolsa, xalqaro o‘yinlar orqali katta tajriba to‘plagan Temur Kapadze kelishini xohlardim, shuning barobarida Lushan bilan ishlashni davom ettirish ham yomon emas.
- Tasavvur qilaylik, Temur Kapadze «Navbahor»ga kelsayu, sizga xorijdan yaxshi taklif tushsa, qanday yo‘l tutardingiz?
- Qaytaraman, jamoa bilan hamkorligimiz yana 1 yil davom etishi kerak shartnoma bo‘yicha. Xullas, xorijdan taklif tushsa ham, Namanganda qolardim, baribir.
- Aslida mavsum boshidayoq «Navbahor» safiga qo‘shilishingiz mumkin edi. Biroq «Olimpik» rahbariyati sizni qo‘yib yubormadi...
- Ha, nafaqat men, balki «Olimpik»dagi ko‘plab futbolchilar boshqa klublar bilan kelishuvga erishib bo‘lishgandi. Yakunda O‘FA tashabbusi bilan barcha yigitlar ortga qaytarildi. O‘z navbatida biz ham bundan ko‘zlangan maqsadni tushundik. Zero, Osiyo kubogi va Olimpiada oldidan jamoa a’zolari yetarli o‘yin amaliyotiga ega bo‘lishlari, o‘zaro birdamlikni yanada yaxshilash muhim edi. Xullas, shu omil tufayligina bizni yana yarim mavsum «Olimpik»da ushlab turishdi. Bor gap shu.
- Milliy jamoamiz JCH-2026 saralashi uchinchi bosqichi 5-turidan o‘rin olgan Qatar termasiga qarshi uchrashuvda alamli tarzda mag‘lubiyatga uchradi. Sizningcha, Doxadagi o‘sha o‘yin natijasiga hakamlar chindan ham, ta’sir o‘tkazishdimi?
- Yo‘q, menimcha. O‘sha o‘yinda vakillarimiz 0:2 hisobida yutqaza turib, ikkinchi bo‘limda muvozanatni tiklash uddasidan chiqishdi. Shundan so‘ng murabbiylar shtabi durang natijani saqlab qolishni ma’qul ko‘rdi, shekilli, taktik o‘zgarishlarga qo‘l urildi. Nazarimda, ayni shu qaror noto‘g‘ri bo‘ldi va bu mag‘lubiyatga olib keldi.
- Terma jamoamizning Olimpiadadagi ishtirokidan qanday tassurotlar qoldi?
- Mazkur musobaqada birinchi marta qatnashdik va menimcha, yomon taassurot qoldirmadik. Agar 2-turda misrliklarni yenga olganimizda, keyingi bosqichga chiqish uchun yaxshi imkoniyat hosil qilardik. Turnirdagi ishtirokimiz qanday chiqishi asosan shu o‘yin natijasiga bog‘liq edi. Afsus, eng muhim pallada omad yuz o‘girdi. Shunga qaramay, Olimpiada faoliyatimizda chuqur iz qoldirishi muqarrar.
Xurshid YUSUPOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
