Osiyoda 2026 yilgi Jahon chempionati saralash bosqichi o‘zining qizg‘in pallasiga kirib keldi. O‘zbekiston milliy terma jamoasi 25 mart kuni 8-tur doirasidagi navbatdagi bahsda Eronga qarshi maydonga tushadi.
Ushbu o‘yin oldidan har ikki terma jamoaning hozirgi holati, JCHga chiqish imkoniyatlari va tarkibidagi eng qimmat futbolchilari haqida batafsil to‘xtalamiz.
Hozirgacha qayd etilgan natijalar va turnir jadvali
O‘zbekiston terma jamoasi
O‘zbekiston terma jamoasi Mundial saralashidagi dastlabki o‘yinni Toshkentda Shimoliy Koreyaga qarshi o‘tkazib, kichik 1:0 hisobida g‘alaba qozongan. 2-turda esa Bishkekka safar uyushtirib, Qirg‘izistondan 3:2 hisobida ustun kelgan. 3-turda jamoaning azaliy raqiblaridan biri Eron bilan “Bunyodkor”da o‘yin o‘tkazildi. Uchrashuvda hisob ochilmadi — 0:0. Keyingi bahs ham Toshkentda bo‘lib o‘tdi. Bu safar jamoa Birlashgan Arab Amirligini qabul qildi va Otabek Shukurovning penaltidan kiritgan goli evaziga 3 ochkoni qo‘lga kiritildi. 5-turda O‘zbekiston Dohada Qatar bilan o‘yin o‘tkazdi. Birinchi taymda “oq bo‘rilar” ketma-ket ikkita gol o‘tkazib yubordi. O‘yinning ikkinchi bo‘limida jamoa qayta oldi va Abbosbek Fayzullayevning dubli evaziga hisob tenglashdi, biroq uchrashuv yakuni arafasida Qatar yana bitta gol urib, g‘alabani o‘z tomoniga og‘dirdi. O‘zbekiston 6-turda KXDR bilan o‘yin o‘tkazdi. Koreyadagi siyosiy vaziyatlar tufayli uchrashuv Laosda bo‘lib o‘tdi. Qiyin kechgan bahsda jamoa 1:0 hisobida g‘alaba qozondi.
22 yanvar kuni terma jamoa ustozi Srechko Katanes sog‘lig‘idagi muammolar sabab MTJ postidan ketishga majbur bo‘ldi va uning o‘rniga Temur Kapadze tayinlandi. 20 mart kuni jamoa uning qo‘l ostidagi rasmiy debyutini Qirg‘izistonga qarshi o‘tkazib, 1:0 hisobidagi qiyin g‘alabani qo‘lga kiritdi.
Eron terma jamoasi
A guruhidagi yagona mag‘lub bo‘lmagan jamoa — Eron. Forslar dastlabki turni Tehronda Qirg‘izistonga qarshi o‘tkazib, 1:0 hisobida g‘alaba qozondi. Keyin esa Al-Aynda BAAga qarshi maydonga tushib, 3 ochko bilan ortga qaytdi — 1:0. 3-turda Amir Galenoi boshchiligidagi jamoa Toshkentda O‘zbekiston bilan durang o‘ynadi. Keyin esa Qatar yirik hisobda taslim etildi (4:1). Ular 5-turda Shimoliy Koreyani (3:2), 6-turda Qirg‘izistonni (3:2), 7-turda BAAni (2:0) ham mag‘lub etishni uddaladi.
Turnir jadvalidagi holatga nazar solamiz. 7-turdan keyin A guruhida Eron yetakchilik qilmoqda. Hozirda forslar 19 ochko bilan JCH yo‘llanmasini 99 foizga hal qilgan. 8-turda bo‘ladigan O‘zbekistonga qarshi bahsdagi durang ham Eronni Amerika qit’asida bo‘ladigan Munidalga olib chiqadi. O‘zbekiston 16 ochko bilan 2-o‘rinni egallab turibdi. Jamoa ortda qolgan 7 turda 5 g‘alaba, 1 durang va 1 mag‘lubiyat qayd etgan. 10 ochko to‘plagan BAA va Qatar mos ravishda 3—4-o‘rinlardan joy olgan. Qirg‘iz Respublikasi (3 ochko) hamda Shimoliy Koreya (2 ochko) autsayder sifatida oxirgi o‘rinlarda ketmoqda.
A guruhi turnir jadvali
1. Eron — 19 ochko
2. O‘zbekiston — 16 ochko
3. BAA — 10 ochko
4. Qatar — 10 ochko
5. Qirg‘iziston — 3 ochko
6. Shimoliy Koreya — 2 ochko
Saralash bosqichi to‘purarlari
O‘zbekiston terma jamoasi ortda qolgan 7 turda 9 ta gol urishni uddalagan. Abbosbek Fayzullayev 3 marta raqib darvozasini ishg‘ol qilib, “oq bo‘rilar” to‘purari bo‘lib turibdi.
Qolgan 6 gol esa 6 nafar futbolchi tomonidan kiritilgan. Eldor Shomurodov, Jaloliddin Masharipov, Husniddin Aliqulov, Oston O‘runov, Hojiakbar Alijonov va Otabek Shukurov kabi futbolchilar o‘z hisobiga bittadan gol kiritishni uddalagan.
Eron 14 marta raqib darvozabonini ranjitgan. Forslar o‘tgan 7 turda faqat O‘zbekiston terma jamoasi darvozasiga gol kirita olmadi, qolgan 6 bahsning barchasida to‘p kiritgan. Sardor Azmun va Muhammad Mohebi 4 tadan gol urib, Eron terma jamoasi to‘purarlari bo‘lib turibdi. Shuningdek, Mehdi Taremi va Mehdi Gayedi 2 martadan raqib darvozasini ishg‘ol qilgan. Saleh Hardani bitta gol urgan bo‘lsa, bitta gol avtogol evaziga kiritilgan.
O‘zaro uchrashuvlar tarixi
O‘zbekiston va Eron 15 marta to‘qnash kelishgan. Forslar o‘tkazilgan bahslarning 10 martasida g‘alaba qozonishni uddalagan bo‘lsa, 1 marta imkoniyatni boy bergan. 4 ta uchrashuv esa durang bilan yakunlangan.
Ushbu jamoalar o‘rtasidagi ilk bahs 1998 yilda o‘tkazilgan bo‘lib, unda Eron yirik 4:0 hisobida g‘alaba qozongan. Oxirgi uchrashuv esa 2024 yilda bo‘lib o‘tgan. “Bunyodkor” stadionida kechgan bahs 0:0 hisobida yakunlangan.
O‘zbekiston yagona g‘alabasini 2012 yil 2014 yilgi Jahon chempionati saralash doirasidagi bahsda qo‘lga kiritgan. Tehronda kechgan bahs taqdirini bitta gol hal qilgan. 71-daqiqada Ulug‘bek Baqoyev tomonidan kiritilgan to‘p yakunda “oq bo‘rilar”ga g‘alaba taqdim etgan.
O‘zaro o‘yinlardagi to‘plar nisbati ham Eron tomonda. Forslar 18 marta o‘zbekistonliklar darvozasini ishg‘ol qilgan bo‘lsa, 5 marotaba darvozasidan to‘p olib chiqqan.
Eng qimmat futbolchilar
O‘zbekiston Osiyo qit’asida eng qimmat 3-jamoa hisoblanadi. Hozirda Temur Kapadze boshchiligidagi “oq bo‘rilar”ning umumiy qiymati 70 million yevroni tashkil qiladi.
Tarkibdagi eng qimmat futbolchi “Manchester Siti” a’zosi Abduqodir Husanov hisoblanadi. Himoyachi Transfermarkt tomonidan 35 million yevroga baholanmoqda. Keyingi o‘rinlardan Abbosbek Fayzullayev (8 million yevro) va Eldor Shomurodov joy olgan (4 million yevro).
O‘zbekistonning eng qimmat 10 nafar futbolchisi:
1. Abduqodir Husanov — 35 million yevro;
2. Abbosbek Fayzullayev — 8 million yevro;
3. Eldor Shomurodov — 4 million yevro;
4. Oston O‘runov — 2,5 million yevro;
5. Otabek Shukurov — 1,8 million yevro;
6. Jaloliddin Masharipov — 1,8 million yevro;
7. Husniddin Aliqulov — 1,7 million yevro;
8. Abduvohid Ne’matov — 1,5 million yevro;
9. Akmal Mozgovoy — 1,3 million yevro;
10. Sherzod Nasrullayev — 1,3 million yevro.
Eron terma jamoasi transfermarkt tomonidan 46,30 million yevroga baholangan. Forslar tarkibida harakat qiladigan eng qimmat futbolchi “Inter” hujumchisi Mehdi Taremi hisoblanadi — 8 million yevro. Keyingi o‘rinda esa BAAning “Ash-SHabab” klubi safida harakat qiladigan Sardor Azmun qayd etilgan, uning qiymati 7,5 million yevro deb belgilangan. Mehdi Gayedi esa 4 million yevro bilan kuchli uchlikka yakun yasagan.
Eronning eng qimmat 10 nafar futbolchisi:
1. Mehdi Taremi — 8 million yevro
2. Sardor Azmun — 7,5 million yevro
3. Mehdi Gayedi — 4 million yevro
4. Muhammad Mohebi — 3,5 million yevro
5. Alirizo Jahonbahsh — 2,3 million yevro
6. Husayn Kanoni — 2 million yevro
7. Saman G‘oddos — 1,8 million yevro
8. Ali G‘olizoda — 1,5 million yevro
9. Muhammad Amin — 1,2 million yevro
10. Milad Muhammadiy — 1,2 million yevro
Murabbiylar fikri:
Temur Kapadze Eronga qarshi bahs oldidan matbuot anjumanida qatnashdi.
"Bizni qiziqarli o‘yin kutib turibdi. Eron qanday kuchga egaligini bilamiz. O‘zbekiston terma jamoasi ham nimalarga qodirligini hamma xabardor. Ikkita kuchli jamoa JCH yo‘llanmasi uchun kurash olib boradi. O‘yinga yaxshi tayyorgarlik ko‘rdik.
Oxirgi yillarda bir necha bor to‘qnash kelganimiz uchun Eron terma jamoasini yaxshi bilamiz. O‘zimizda yetrlicha ma’lumot bor hamda va Eron Pro Ligasida o‘ynaydigan futbolchilardan ham ma’lumotlar oldik.
Masharipov jamoamizning muhim futbolchisi hisoblanadi. Futbolda diskvalifikasiyalar uchrab turadi. Oston bilan hammasi joyida. Kichik jarohati bo‘lsa-da, ushrashuvga tayyorgarlik ko‘rmoqda. Qolgan hech qaysi futbolchining sog‘lig‘i bilan muammo yo‘q".
Amir G‘alinoiy O‘zbekistonga qarshi bahs oldidan matbuot anjumanida qatnashdi.
"O‘zbekiston terma jamoasi tarkibida ajoyib futbolchilar bor, ulardan uch nafari Eron chempionatida to‘p tepadi. Biz og‘ir o‘yin kutayotganini bilamiz. O‘zbekiston 3-4-3 taktikasida o‘ynaydi. Ular ushbu sxema bilan o‘ynab natijaga erishib kelmoqda. Biz ham shu taktika ustida ishladik. Ehtimol, ertaga biz ham 3-4-3 taktikasida harakat qilishimiz mumkin.
O‘zbekistonga qarshi bahsdan keyin yana ikki muhim final bor. Milliy jamoada har bir o‘yin finalga teng, chunki u tarixga muhrlanadi. Shimoliy Koreyaga qarshi birinchi o‘yinda juda qiynalgan edik, shu bois hisob-kitob qiladigan narsalar bor.
BAAni mag‘lub etganimizdan keyin men barcha futbolchilarimga O‘zbekiston haqida o‘ylashimiz kerakligini aytdim. Ular ham yaxshi motivasiyaga ega va yaxshi natijaga erishishni istamoqda. Lekin natija Allohning qo‘lida".
Uchrashuv haqida:
Eron — O‘zbekiston terma jamoalari o‘rtasidagi bahs 25 mart, seshanba kuni bo‘lib o‘tadi. Uchrashuv Tehrondagi «Ozodiy» stadionida Toshkent vaqti bilan 21:00 da boshlanadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
