O‘zbekiston Superligasining 9-turidan o‘rin olgan “Navbahor” – “Xorazm” (1:0) uchrashuvidan keyingi matbuot anjumanining ikkinchi qismida mezbonlar bosh murabbiyi Sergey Lushan ishtirok etib, OAV xodimlarining savollariga javob berdi.
“Lochinlar” ustozi odatdagidek, o‘z so‘zini o‘yin haqidagi fikrlari bilan boshladi.
— Uchrashuv qiyin va asabiy ruhda kechdi. Ammo yakun biz uchun ijobiy bo‘ldi. Raqib bizga qandaydir jumboq bo‘ldi, deya olmayman. Muammo doimgidek vaziyatlardan foydalana olmaslikda. Birinchi bo‘limda ikkita, ikkinchi bo‘limda uchta yaxshi vaziyatlar yuzaga keldi. Ularni esa golga aylantirish kerak. Barcha muammo shunda. Ko‘rinishidan barchasini to‘g‘ri qilishmoqda, shu sababli, o‘yin asabiy kechmoqda. Oldin gol ura olishmaydi, Himoyadagilar asabiylashishni boshlashadi. Keyin esa o‘yin buziladi.
Uchrashuv natijasi adolatli bo‘ldi. Yigitlar sabrli. Oxirigacha ochilmaydigan bunday jamoalar bilan o‘ynash qiyin. Ularni ochish qiyin, ammo gol urish kerak, hammasi shunga qarab ketmoqda. Bo‘sh darvozaga to‘p kirita olmaslik nimani anglatadi? O‘sha o‘yinchida mahorat yo‘qliginimi? Yo‘q, axir u eng yaxshi to‘purar. Faqatgina aniq zarba bera olmadi.
Bunday jamoalarga qarshi o‘ynash qiyin, ular o‘zlari ham o‘ynashmaydi, raqibga ham o‘ynashga imkoniyat berishmaydi. Mehmonlarda vaziyat bo‘ldimi? Birorta ham bo‘lmadi.
Biz doim tekis joyda keraksiz gollarni o‘tkazyapmiz. Agar raqib bosim qilganida ham savollar bo‘lmasdi. O‘zlariga-o‘zlari olib kelishdi, ammo bugun ozmi-ko‘pmi mudofaada qat’iy o‘ynashdi.
— Nega Azimjon Ahmedov o‘ynamayapti, uning jismoniy holati yetarli darajada emasmi?
— U yaxshi jismoniy holatda. Bilishimcha, Azimni uchinchi yildirki, tizzasidagi og‘riq bezovta qilmoqda. U ayniqsa, maydon o‘zgarganida, yallig‘lanadi. Shunga qaramay, Ahmedov asosiy tarkib futbolchisi. Boshqa tomondan hozirda to‘rt nafar himoyachi sxemasiga o‘tdik va u bilan bu borada gaplashdik. Uch nafar markaziy himoyachi bilan o‘ynaganimizda, Ahmedov shubhasiz asosiy tarkib o‘yinchisi. Biz bunday jamoalarga qarshi hujumlar qilishimiz, gollar urishimiz kerak. Biz yigitlar golning ta’mini his qilishlarini xohlaymiz. Ushbu ibora uchun oldindan uzr so‘rayman, ammo biz juda oson tug‘amiz, lekin aqlbovar qilmas yo‘llar bilan. Har o‘yinda besh-oltita golli vaziyatlar yaratyapmiz, ammo hozircha o‘sha vaziyatlardan foydalana olmayapmiz.
— Nega Mirzohid G‘ofurov o‘ynamayaptimi? Unda jarohat bormi yoki boshqa bir sabab?
— Yo‘q, G‘ofurov mana uchinchi mashg‘ulotdirki, Mo‘minov bilan birgalikda umumiy guruhda shug‘ullanmoqda. Ular bunga qadar reabilitasiyadan o‘tishdi, jarohatlari bor edi. G‘ofurovning jarohati sakkiz yillik. U tizzada va bog‘lamlari yallig‘lanib turadi va hokazo. Uni qat’iy to‘qnashuvda qanday olganini ko‘rdingiz. Tiklandi. Asta-sekinlik bilan O‘zbekiston kubogi o‘yinlari orqali G‘ofurovni maydonga tushiramiz. Ikki kundan keyin kubok doirasidagi o‘yinimiz bor. Barcha tiklangan yigitlarni o‘sha uchrashuvda maydonga tushiramiz, sababi, uch kundan so‘ng, Toshkentda “Bunyodkor” bilan o‘yinimiz bor. Barcha safarlar ketma-ket o‘tadi. Barcha yigitlarning o‘yini ochilyapti. Sizlarning Iminjonov, G‘ofurov va Mo‘minovlarni ko‘rishingizga juda ham umid qilaman. Bundan tashqari, shug‘ullanayotgan yigitlar bor. Asosiy muammomiz — Pedro. Unga juda ham ishonch bildirgandik, Pedro juda ham yuqori darajadagi o‘yinchi. Ammo, uning eski jiddiy jarohati bor bo‘lib chiqdi. Bu esa hattoki, yugurishga ham imkon bermaydigan jarohat ekan. U ikki haftadan beri reabilitasiyada, ancha yengil. Tarkibga kirishni so‘ramoqda. Men buning qanday jarohatligini bilaman. Xullas, ko‘ramiz.
— Bugun ikki xil bo‘lim guvohiga aylandik...
— Bilmadim, tribunada o‘tirganlar qanday his qilishdi? Ammo, men maydon chetida yugurmagan bo‘lsam ham tezda terladim. Havo juda dim. Quyosh maydonga qaragan edi. Shunday ob-havo sharoiti bo‘lishi tushunarli. Organizm o‘rganishi uchun unga ko‘nikish kerak. Qoida bo‘yicha kechqurun 7-8 da o‘ynadik. Bu yerda birinchi bo‘lim va raqibda ham charchash holatlari. Qiyin. Shunchaki yugurish qiyin.
Ikkinchi bo‘limda o‘yinni to‘g‘ri boshladik, keyin qandaydir tushunarsiz harakat qilishni boshladik. Raqib darvozasiga markaz orqali kirishga urindik. O‘yindan oldingi mashg‘ulotlarda esa boshqa narsani shug‘ullangandik. Biz qanot orqali ishlashni ko‘zlagandik. Tanaffusda aynan biz so‘ragan o‘yinni ko‘rsatishlarini xohladik. Ayrim futbolchilar ko‘rpani o‘zlariga tortishga urinishyapti. O‘ylaymanki, buni aniq hal qilamiz.
— Jamoa hakam tomonidan qo‘shib berilgan daqiqalarda ikkita-uchta yaxshi imkoniyatlarga ega bo‘ldi. Mutaxassis sifatida foydalanilmagan vaziyatlarda nima yetishmadi, deb o‘ylaysiz?
— Bu mahoratga bog‘liq. Masalan, Pedroda vaziyat bo‘lsa, u to‘p kiritadi. Nega bir futbolchi bitta teginish va undan so‘ng gol uradi-yu, boshqasiga o‘nta vaziyat kerak bo‘lishini ayta olmaydi. Buni tushuntirish qiyin. Bu mahorat darajasi. Shu yerda o‘tgan yilgi voqealarni eslang, o‘yin yakunlanishiga 20 daqiqada qolganida gollarni urib bo‘lardik. Bizda Iskanderov kabi oldinda juda yuqori darajadagi futbolchilar bor edi. Vaziyat — gol. Agar adashmayotgan bo‘lsam, har bir o‘yinda biz birinchi bo‘lib, gol uramiz. Ilk daqiqalarda gol uramiz, keyin esa himoyalanishni boshlaymiz. Shu muammoni hal qila olmayapmiz. Biz futbolchilarni yana hujum qilishda davom etishga majbur qilolmayapmiz. Ularga oltita gol o‘tkazsak ham to‘xtab qolmaslikni, bosimni davom ettirishni tushuntiryapmiz. Chempion bo‘lishni xohlaganlar iqtidorli futbolchilardan tashqari, chempionlik maktabidan o‘tganlarni tarkibga olishga urinishadi. Faqat hisob qanday bo‘lishidan qat’iy nazar, to‘xtamaydigan futbolchilari bor jamoa chempion bo‘ladi. 3:0 ga yutyapmiz, ular to‘xtashmayapti, 3:0 ga yutqazyapmiz, ular to‘xtashmayapti. Biz esa goldan so‘ng, oxirigacha bormayapmiz, shu bilan birga mashg‘ulotlarda bunday muammo yo‘q. Bu ruhiy daraja bilan bog‘liq bo‘lsa kerak.
— Pro liga jamoasi bilan bo‘ladigan O‘zbekiston kubogi bahsida qandaydir rotasiyalar bo‘ladimi?
— Yuqorida aytganimdek, bizda barcha o‘yinga chiqadi, boshqa variantimiz yo‘q. Ertaga o‘rinbosarlar ham o‘ynaydi. Hozirda zaxira o‘rindig‘ida bo‘lganlardan kimdir o‘rinbosarlar safida ham o‘ynaydi. Ikki kundan keyin “FarDU”ga qarshi uchrashuv bor. O‘sha uchrashuvda kam o‘yin amaliyotiga ega bo‘layotgan va endi tiklangan o‘yinchilar bilan harakat qilishni reja qilganmiz. Umid qilamanki, bugungi o‘yindagi hech bir futbolchi o‘sha bahsda harakat qilmaydi. Hatto bizning o‘rinbosarlar jamoamizning asosiy tarkibi bugun shu yerda edi.
— O‘tgan yili “Navbahor”ni qabul qilib olganingizda jamoa juda ham yulduzli tarkibga ega edi. Shunday bo‘lsada, o‘sha tarkibdan Komiljon Tojidinov porlab chiqqandi. Ammo, bu yil uni maydonda kam ko‘ryapmiz. Buning sababi nimada?
— Bizda ikkita yig‘in bo‘ldi. O‘nta o‘yin va raqobat. Hammaga birdek imkoniyat berdik. O‘sha yig‘inlarda Tojidinov raqobatga dosh bera olmadi. Sababi shunda. U o‘zining paytini kutsin. Komil juda yaxshi futbolchi, men uni juda yaxshi bilaman. Yaxshi, tartibli yigit, mehnatkash. Oltinchi turda asosiy tarkibni aniqlab, keyin o‘zgartirib borishimizni aytganmiz. Xudo ko‘rsatmasin-u, kimdadir kartochkalar va jarohatlar bo‘ladi. Ularning barchasi hali o‘ynaydi. Bizning zaxiramiz juda kichkina. Barcha o‘ynashga ulguradi. Sizga mavsumni umuman boshqa jamoa yakunlashini kafolat beraman. Umuman boshqa jamoa. Hozir o‘ynamayotganlar asosiy tarkibda bo‘ladi. Bitta tarkib bilan shuncha o‘yinni ko‘tarib bo‘lmaydi. Bu imkonsiz. Aprel va may oyi juda tig‘iz, ulardan o‘tib olishimiz kerak. Pauzalar bo‘ladi, tayyorlanib olishimizga imkoniyat ham. Bo‘lajak bellashuvlarimiz raqobatchilarimizga qarshi. Bular “Bunyodkor”, “Qo‘qon-1912”... Shunday o‘yinlar bo‘lib o‘tadi. Shundoq ham boshqa jamoalar bilan bo‘lgan bahslarda 6-7 ochkolarni yo‘qotdik.
“Navbahor” PFK matbuot xizmati.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
