"Andijon" – "Surxon" (2:1) o‘rtasidagi o‘yindan keyin tashkil qilingan matbuot anjumanining ikkinchi qismida mezbonlar bosh murabbiyi Maksim Shaskix savollarga javob qaytardi.
- Birinchi navbatda butun Andijon xalqini bugungi g‘alaba bilan tabriklayman. Ayniqsa, jamoaning fidoiy muxlislari bu g‘alabani kutishgandi. Yigitlar kichik matonat ko‘rsatishdi. Chunki g‘alabadan uzoqlashib qolgandik. Qiyin vaziyatga tushib qolganimizdan keyin tiklanish murakkab edi. Shunday bo‘lsa-da, yigitlar buni uddalashdi. Xudoga shukr, barchasi biz uchun samarali yakunlandi. Aytishim mumkinki, futbolchilar sifatli o‘yin ko‘rsata oldi. Futbol xatolarsiz bo‘lmaydi. Biroq o‘yinchilarimiz kerakli vazifani bajarishdi. Ular azart bilan o‘ynashdi. Ayniqsa, Superkubokdan oldin bu g‘alaba bizga juda muhim edi. O‘ylaymanki, bugungi g‘alabadan so‘ng Superkubok uchrashuviga yaxshi kayfiyatda boramiz.
- Maksim Aleksandrovich, sizni "Andijon"dagi debyut g‘alabangiz bilan tabriklayman. Uchrashuvning dastlabki 20-25 daqiqasida "Surxon" yaxshi ko‘rindi. Shundan so‘ng "Andijon"ning o‘yini kuchaydi. Bu oldindan ko‘zlangan rejamidi?
- To‘g‘ri aytasiz. Qiyin o‘yinda bir qator xavotirli holatlar bilan maydonga chiqdik. Shuningdek, maydonga chiqqan futbolchilar ham robot emas. Yoqimsiz seriya to‘xtatildi. Bizda yetarlicha jarohat olgan o‘yinchilar bor edi. Shu sababli ba’zi chiziqlarimizda doimiy o‘ynaydigan futbolchilar o‘ynamasdan boshqa yigitlar to‘p surishdi. Natijada o‘zgarishlar qilishga majbur bo‘ldik. Jamoaning avvalgi uchrashuvlarini ko‘rib, tahlil qilib chiqib, qanotlardan bo‘ladigan hujumlarni va boshqa holatlarni o‘rganib, shunga asosan taktika tayyorladik. Ko‘plab o‘yinchilarimizda jarohat borligi sababli uchrashuvning dastlabki daqiqalari asabiy o‘tdi. Keyinchalik o‘yinimiz ochilgach, barchasi o‘z o‘rniga tushdi. Tanaffus paytida futbolchilar bilan erkakcha gaplashib oldik. Orqaga yo‘l yo‘qligini, maydonga tushamiz va g‘alaba qozonishimiz shartligini ular bilan gaplashib oldik. Aks holda muxislar bizni kechirmasligini yigitlar ham tushunib turishgandi. Xudoga shukr, ko‘zlagan maqsadimizga erishdik.
- Nima deb o‘ylaysiz, murabbiy sifatida, siz Xomyakov merosidan foydalanasizmi yoki butunlay boshqa jamoa bo‘ladimi?
- Biz endi atiga ikkita o‘yin o‘tkazdik. "Sho‘rtan"da 4-1-4-1 sxemasida o‘ynadik. Bugun esa 4-4-2 sxemasida maydonga tushdik. Ochig‘ini aytsam, "Andijon"ning o‘yinini bungacha taxminan bilardim. Shunday ekan, ularni faqat qanday sxemada o‘ynaganini ko‘rganman. Bir qator taktikalarda o‘ynashiga guvoh bo‘lganman. Biz esa endi uchta mashg‘ulotni o‘tkazdik va bunday qisqa vaqt ichida nimani o‘zgartirish mumkin? To‘g‘ri, tarkibni qisman bo‘lsa ham o‘zgartirdik. Yangiliklar kiritishga harakat qilyapmiz. Avvalgi murabbiylarning tarkibida hozirgi ayrim o‘yinchilar to‘liq o‘ynamagan bo‘lishi mumkin. Endi Superkubok o‘yini uchun tayyorgarlik ko‘ramiz. Navbatdagi sovrinni yutish yo‘lida harakat qilamiz. Og‘ir bo‘lishini tushunib turibmiz. Raqib "Nasaf"! "Nasaf"ga syurpriz tayyorlashga harakat qilamiz. Keyin chempionatimizda pauza bo‘ladi. Ushbu tanaffusni kutyapmiz. Bizda kichik yig‘in tashkil etiladi. Bunday tanaffus chog‘ida futbolchilar topshiriqlarni bajarib, murabbiylar o‘zlaridan nima xohlayotganliklarini bilishlari kerak. Men ish boshlagan dastlabki kunimdan boshlab ular avvalo o‘zlarini hurmat qilgan holda maydonda harakat qilishlari kerakligini ta’kidlab kelmoqdaman. Maydonda meni harakatlarim qanday bo‘lyapti deb vijdonan o‘ynashlarini tushuntirib kelyapman. Aks holda ishqibozlar bizni kechirmaydi. Bilasizmi, "Andijon"da hammamiz bir oila bo‘lishimiz kerak. Shundagina biror yaxshi natijaga erishishimiz mumkin bo‘ladi. Safimizda individual kuchli o‘yinchilar hozircha yo‘q. To‘g‘ri, yetakchilar bor. Masalan, Abdumannopov, Abdumannonov... Sohibjonov jarohat olgan. Yutug‘imiz birlashishimizda, buni boshidan aytib kelyapman. Bir-biriga yordam berish, qo‘llab-quvvatlash, maydonga chiqqanda jon-jahdi bilan kurashish shart. Bizda boshqa yo‘l yo‘q. Mashg‘ulotlarda yaxshi ishlash va maydonda qattiq ishlab maqsadga erishish asosiy vazifamiz bo‘lishi kerak. Shunda nimagadir erishish lozim. Oldimizda muhim pallalar turibdi. Osiyo Chempionlar ligasini ko‘pchilik kutib turibdi. Bo‘lajak muhim pallaga bosqichma-bosqich tayyorgarlik ko‘rib boramiz.
- Zaxiradan maydonga tushgan futbolchilar o‘yinni qanchalik kuchaytira oldi?
- Zaxiradan tushganlardan qoniqdim. Tarkibda yosh o‘yinchilar ham bor edi. Ularni bir-ikki marta ko‘rdim. Ertaga o‘rinbosarlar o‘rtasidagi o‘yinni ham borib ko‘raman. Yoshlar jamoamizning o‘yinlarini ham doimiy kuzatib boraman. Barcha yigitlar qattiq mehnat qilishdi, harakatda bo‘ldilar va natija ham shunga yarasha bo‘ldi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
