Superliganing 25-turidan o‘rin olgan “Navbahor” – “Bunyodkor” (0:2) uchrashuvidan keyingi matbuot anjumanining birinchi qismida mehmonlar bosh murabbiyi Ilyos Zeytullayev qatnashib, jurnalistlarning savollariga javob berdi.
“Qaldirg‘ochlar” ustozi odatdagidek, o‘z so‘zini o‘yin haqidagi fikrlari bilan boshladi.
– Bugun har ikki jamoa o‘z xarakteriga namoyish etishga intildi. Bu bilan ikkala klub futbolchilarini tabriklasak bo‘ladi. O‘z jamoam haqida gapiradigan bo‘lsam, “Bunyodkor” 9 yildan buyon Namanganda g‘alaba qozona olmay kelayotgandi. Chunki bu yerda o‘ynash va zafar quchish qiyin. Shunga qaramay, uzoq davom etgan noxush an’anani sindira oldik. Buning uchun shogirdlarimga rahmat aytaman. Juda qimmatli uch ochkoni qo‘lga kiritdik.
– O‘yindan ham qoniqdingizmi yoki faqat natijadanmi?
– Bu yaxshi savol. To‘g‘risini aytaman, birinchi bo‘limdagi o‘yinimizdan to‘liq qoniqdim. Ikkinchi bo‘limdan ham qoniqdim, faqat ozgina. Chunki yanada yaxshiroq harakat qilishimiz mumkin edi. Futbolda raqib sizga qanday imkoniyat bersa, shunday o‘yin ko‘rsatasiz. Balki bugun natijani ko‘zlab harakat qilgandirmiz, lekin faqat natijani o‘ylashdan tashqari, chiroyli o‘yin ko‘rsatishga ham harakat qilamiz.
– Birinchi davrada Odil Hamrobekov ko‘plab bahslarda “Bunyodkor”ga yordam bergandi. Uni ketgani jamoaga qanday ta’sir qildi?
– Hamrobekov O‘zbekistonning eng yaxshi futbolchilaridan biri. U terma jamoa a’zosi va milliy jamoaning jahon chempionatiga chiqishida o‘z hissasini qo‘shdi. Shunday futbolchilar borki, maydonda ekanligida boshqalar xotirjam bo‘ladi. Hamrobekov shunday o‘yinchi. Lekin bu futbol, u faoliyatini boshqa joyda davom ettirish istagini bildirdi. Biz ham usiz qarab o‘tirganimiz yo‘q. Rasul Yo‘ldoshev, Amir To‘raqulov kabi futbolchilar uning o‘rnini yopishga harakat qilishmoqda. Meni futbol maktabimizdan chiqib kelayotgan yoshlar quvontirmoqda. Ular potensiali yuqori. Ammo tan olish kerak, bizga Hamrobekov yetishmayapti.
– Bugungi uchrashuvda 28-raqamli futbolchingiz (Matiya Krivokapich) 4–5 ta qulay vaziyatni ko‘kka sovurdi. Uni o‘yini haqida fikringiz qanday? Ikkinchi savol, jamoangiz oldiga hech bo‘lmasa, 3-o‘rinni qo‘lga kiritish vazifasi qo‘yilganmi?
– Ikkinchi savoldan boshlayman. Har qanday o‘yinda g‘alaba qozonishni maqsad qilamiz. Biz hatto mashg‘ulotda mini-futbol o‘ynasak ham, yutish uchun o‘ynaymiz. Raqib kim bo‘lishidan qat’i nazar, “Bunyodkor” g‘alaba uchun o‘ynaydi. Lekin bu doim ham o‘xshamasligi mumkin. Albatta, biz ham sovrinli o‘rinlarni xohlaymiz, faqat bugungacha sekin-asta qadam tashlash kerak bo‘ladi. Endi legioner futbolchimiz haqidagi savolga kelsak, Matiyaning holati bizni qoniqtiryapti. To‘g‘ri, u optimal formada emas, ammo harakat qilyapti. U endi-endi jamoaga kirishib ketyapti. Muntazam o‘yin amaliyotiga ega bo‘lsa, jamoamizga hali ko‘p foydasi tegadi.
– Sizningcha, qaysi jamoa O‘zbekiston chempioni bo‘ladi?
– Chempionlik uchun kurash uchta klub orasida kechadi: “Nasaf”, “Neftchi” va “Paxtakor”. Shuningdek, ozroq imkoniyat “Dinamo”da ham bor. Menimcha, chempionat finishi juda qizg‘in bo‘ladi. Lekin kim chempion bo‘lishini aytish mushkul.
– Siz Italiyada o‘ynagansiz va ishlagansiz. Fabio Kannavaroning O‘zbekiston terma jamoasi bosh murabbiyi etib tayinlanishiga munosabatingiz?
– Men Fabio Kannavaroni shaxsan tanimayman. Birga ishlamaganman va shu paytgacha ishini kuzatmaganman. U o‘zidan nimadir qoldirish uchun O‘zbekistonga keldi. Ishtiyoqi juda baland deb o‘ylayman. U bizni jahon chempionatiga olib boradi va bu o‘rinda bizning vazifamiz unga yordam berish – qo‘llab-quvvatlash bo‘ladi. Terma jamoamiz kuchli futbolchilardan iborat, mundialda o‘zimizni ko‘rsatishga ishonaman.
“Navbahor” PFK matbuot xizmati.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
