O‘zbekiston U-17 terma jamoasi ertaga, 8-noyabr kuni FIFA U-17 Jahon chempionati “J” guruhi 2-turi doirasida Irlandiyaga qarshi bahs olib boradi.
Ushbu uchrashuv oldidan, FIFA rasmiy sahifasida O‘zbekiston U-17 terma jamoasi, bosh murabbiy Islombek Ismoilov hamda futbolchimiz Azizbek Abdumo‘minov haqida maqola e’lon qilindi.
Uni to‘liq o‘zbek tilida o‘qishingiz mumkin:
O‘zbekiston Qatar mezbonlik qilayotgan FIFA U-17 Jahon chempionatidagi ishtirokini ajoyib tarzda boshlab, Paragvay ustidan 2:1 hisobi bilan g‘alaba qozondi va barchani hayratda qoldirdi. Bu natijaga bosh murabbiy Islombek Ismoilovning muhim qarori sabab bo‘ldi.
Taktik sirlar uzoqqa cho‘zilmaydigan zamonda Ismoilov odatda hujumkor yarim himoyachi sifatida o‘ynaydigan, qanotda ham harakatlana oladigan Azizbek Abdumo‘minovga hujumdagi asosiy rolni topshirdi — va futbolchi Paragvayga qarshi bahsda o‘zini ko‘rsatdi.
Ushbu qaror va jamoaning maqsadlari haqida Ismoilov ham, Abdumo‘minov ham o‘z fikrlarini bildirib o‘tdi.
“Har bir o‘yinga ikki asosiy maqsad bilan chiqamiz: mamlakatimiz uchun g‘alaba qozonish va har bir futbolchidan maksimal foydalanish. Tan olishim kerak, Abdumo‘minov bu uchrashuv uchun bizning maxfiy qurolimiz edi. U ham jismonan, ham ruhan tayyor edi”, — dedi murabbiy.
Ismoilov shogirdining barqarorligini ham ta’kidladi: “U mashg‘ulotlarda tinimsiz ishladi va o‘sha mehnatini maydonda namoyish etdi”.
Abdumo‘minovning U-17 terma jamoasidagi statistikasiga qaraganda, bu o‘yin uning “portlashi” bo‘lishi kutilmagan edi. U bungacha faqat nazorat uchrashuvlarida 2 ta gol kiritgan, Osiyo chempionatida esa faqat bir marta asosiy tarkibda maydonga tushgan edi.
Ismoilov futbolchining moslashuvchanligini qayd etdi: “U tabiatan yarim himoyachi, ammo turli pozisiyalarda o‘ynay oladi va o‘z imkoniyatlarini namoyish etadi”.
Abdumo‘minov esa ikki gol va “Eng yaxshi futbolchi” sovrini bilan o‘yindan so‘ng o‘z quvonchini yashirmadi:
“Men nihoyatda baxtiyorman. Bu hisni so‘z bilan ifoda etish qiyin. Bu jamoaviy g‘alaba. Menga ishonch bildirgan murabbiylardan juda minnatdorman. Barchamiz juda yaxshi o‘yin ko‘rsatdik. Murabbiylar menga o‘zimni ko‘rsatish imkonini berganidan juda minnatdorman. Maydonga tushgan zahoti bor kuchimni berdim va "Eng yaxshi futbolchi" sovrinini olish men uchun katta faxr”.
Osiyo chempionatining eng yaxshi to‘purari bo‘lgan Asilbek Aliyevni tarkibdan qoldirish — dadil qaror edi. Ammo Abdumo‘minovning o‘yini O‘zbekiston jamoasi uchun g‘alaba keltirdi:
“Biz bu yerga kubokni qo‘lga kiritish uchun keldik. Bu oson bo‘lmaydi, lekin biz turnirda ilgarilash va yurtimizni faxrlantirish uchun bor kuchimizni sarflaymiz,” — dedi Abdumo‘minov.
Krishtianu Ronaldu va Jud Bellingemning ashaddiy muxlisi bo‘lgan Abdumo‘minov birinchi golini murabbiy bilan, ikkinchisini esa Ronaldu uslubida nishonladi. Endi u shunga o‘xshash gollarni Irlandiya Respublikasi bilan bo‘ladigan uchrashuvda ham kiritish umidida.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
